ನರಗುಂದ: ಹೆತ್ತವರ ಮನವೊಲಿಸಿ ಸಣ್ಣ ವಯಸ್ಸಿನಲ್ಲೇ ಮದುವೆ ಬಂಧನದಿಂದ ಪಾರಾಗಿದ್ದ ಹಳ್ಳಿ ಯುವತಿಯೊಬ್ಬಳು ಈಗ ತನ್ನದೇ ಕಥೆ ಮೂಲಕ ವಿಶ್ವದ ಗಮನ ಸೆಳೆದಿದ್ದಾಳೆ! ಗದಗ ಜಿಲ್ಲೆಯ ನರಗುಂದ ತಾಲೂಕಿನ ಕುರುಗೋವಿನಕೊಪ್ಪ ಗ್ರಾಮದ ಅಶ್ವಿನಿ ದೊಡ್ಡಲಿಂಗಪ್ಪನವರ (24) ಈ ಸಾಹಸಿ ಯುವತಿ. ಅಮೆರಿಕದ ಲೆನೋವೊ ಕಂಪನಿ ಆಯೋಜಿಸಿದ್ದ ನ್ಯೂ ರಿಯಾಲಿಟಿ ಲೈಫ್ ಸ್ಟೋರಿ ಸ್ಪರ್ಧೆಗೆ ಈಕೆಯ ಕಥೆ ಆಯ್ಕೆ ಆಗಿದೆ. ಒಟ್ಟಾರೆ ವಿಶ್ವದ 10 ದೇಶಗಳಿಂದ ತಲಾ ಒಬ್ಬರು ಸ್ಪರ್ಧೆಗೆ ಆಯ್ಕೆ ಯಾಗಿದ್ದಾರೆ. ಅಶ್ವಿನಿಯದು ರೈತಾಪಿ ಕುಟುಂಬ. ಗ್ರಾಮದ ಸರ್ಕಾರಿ ಶಾಲೆಯಲ್ಲಿ ಪ್ರಾಥಮಿಕ, ಪ್ರೌಢಶಿಕ್ಷಣ ಪೂರೈಸಿದ್ದ ಈಕೆ ನರಗುಂದದ ಸರ್ಕಾರಿ ಪದವಿಪೂರ್ವ ಕಾಲೇಜಿನಲ್ಲಿ ಪಿಯುಸಿ, ಬಿಎ ಪದವಿ ಮುಗಿಸಿ ಉನ್ನತ ವ್ಯಾಸಂಗದ ಗುರಿ ಹೊಂದಿದ್ದರು. ಆದರೆ, ಆಕೆಯ ಹೆತ್ತವರು ಮದುವೆಗೆ ಸಜ್ಜಾಗಿದ್ದರು. ಕೊನೆಗೂ ಮನವಲಿಸಿದ ಆಕೆ ವಿದ್ಯಾಭ್ಯಾಸ ಮುಗಿಸಿ ಗುರಿ ಮುಟ್ಟಿದ್ದಾರೆ.
