ನಮಗೂ ಪರಿಹಾರ ನೀಡಿ: ಮದಿಹಳ್ಳಿ ಗ್ರಾಮದ ಚಮ್ಮಾರರು ತಯಾರಿಸುವ ಪಾದರಕ್ಷೆಗಳಲ್ಲಿ ಕಾಫಸಿ, ಕೊಲ್ಲಾಪುರಿ, ಕುರಂದವಾಡಿ, ಎಂಎಲ್ಎ ಮತ್ತು ಮೋಚಿಶೇಪ್ ಪ್ರಸಿದ್ಧಿ ಪಡೆದಿವೆ. ಇವು 300 ರೂ.ಗಳಿಂದ 3 ಸಾವಿರ ರೂ.ವರೆಗೆ ಮಾರಾಟವಾಗುತ್ತವೆ. ಚರ್ಮದಿಂದ ತಯಾರಿಸಿದ ಪಾದರಕ್ಷೆಗಳು ಬೇಸಿಗೆಯಲ್ಲಿ ಕಾಲಿಗೆ ತಂಪು ನೀಡುತ್ತವೆ. ಹಾಗಾಗಿಯೇ ಜನವರಿಯಿಂದ ಮೇ ತಿಂಗಳ ವರೆಗೆ ಪಾದರಕ್ಷೆ ವ್ಯಾಪಾರ ಹೆಚ್ಚಾಗಿ ನಡೆಯುತ್ತದೆ. ಆದರೆ, ಈ ವರ್ಷ ಕರೊನಾ ವೈರಸ್ ಭೀತಿ ಹಾಗೂ ಲಾಕಡೌನ್ನಿಂದ ನಮ್ಮ ಬದುಕೇ ಮೂರಾಬಟ್ಟೆಯಾಗಿದೆ ಎಂದು ಪಾದರಕ್ಷೆ ತಯಾರಕ ಅರ್ಜುನ ಪಾಂಡರೆ ಅಲವತ್ತುಕೊಂಡಿದ್ದಾರೆ. ಇನ್ನಾದರೂ ಸರ್ಕಾರ ಮತ್ತು ಸಂಬಂಧಪಟ್ಟ ಇಲಾಖೆ ಅಧಿಕಾರಿಗಳು ಚಮ್ಮಾರರ ಸಂಕಷ್ಟಕ್ಕೆ ನೆರವಾಗಬೇಕು. ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪ ಅವರು ವಿವಿಧ ಉಪಕಸುಬು ಮಾಡುತ್ತಿರುವವರಿಗೆ ಆರ್ಥಿಕ ನೆರವು ನೀಡಿದ್ದಾರೆ. ಅದೇ ಮಾದರಿಯಲ್ಲಿ ಚಮ್ಮಾರರಿಗೂ ಪರಿಹಾರ ಧನ ನೀಡಬೇಕು ಎಂದು ಮದಿಹಳ್ಳಿ ಗ್ರಾಮದ ಪಾದರಕ್ಷೆ ತಯಾರಕರು ಒತ್ತಾಯಿಸಿದ್ದಾರೆ.
