ಭೂಮಿಪೂಜೆಗೆ ಮುನ್ನ ಗ್ರಾಮದ ದೇವಾಲಯದಲ್ಲಿ ಶಾಸಕ ಎ.ಮಂಜುನಾಥ್ ಪೂಜೆ ಸಲ್ಲಿಸುವ ವೇಳೆ ಬಸವನಪಾಳ್ಯ ಹಾಲು ಉತ್ಪಾದಕರ ಸಹಕಾರ ಸಂಘದಲ್ಲಿ ಅವ್ಯವಹಾರ ನಡೆದಿದೆ ಎಂದು ದೂರು ನೀಡಿ ಡೇರಿ ಕಾರ್ಯದರ್ಶಿಯನ್ನು ವಜಾಗೊಳಿಸಲು ಕಾರಣರಾದ ಬಾಳೇನಹಳ್ಳಿ ರಾಜಣ್ಣ ಶಾಸಕರ ಜತೆ ಇದ್ದುದನ್ನು ನೋಡಿ ಆಕ್ರೋಶಗೊಂಡ ಕಾರ್ಯದರ್ಶಿ, ಗ್ರಾಮದ ಕಾಂಗ್ರೆಸ್ ಮುಖಂಡರು, ಕಾರ್ಯಕರ್ತರು, ಗ್ರಾಮಕ್ಕೆ ಸಂಬಂಧಪಡದ ರಾಜಣ್ಣ ಇಲ್ಲಿಗೆ ಏಕೆ ಬರಬೇಕು ಎಂದು ಶಾಸಕರನ್ನು ಪ್ರಶ್ನಿಸಿದರು. ಈ ವೇಳೆ ಗ್ರಾಪಂ ಮಾಜಿ ಸದಸ್ಯ ಹಾರೋಹಳ್ಳಿ ಮೂರ್ತಿ ಈ ಸಂದರ್ಭದಲ್ಲಿ ಕೂಗಾಟ ಬೇಡ ಎಂದಾಗ ಯುವಕನೊಬ್ಬ ಮೂರ್ತಿಯವರ ಕೊರಳಪಟ್ಟಿ ಹಿಡಿದು ಎಳೆದಾಡಿದ. ಆಗ ಕಾಂಗ್ರೆಸ್-ಜೆಡಿಎಸ್ ಕಾರ್ಯಕರ್ತರು, ಮುಖಂಡರ ನಡುವೆ ಪರಸ್ಪರ ಗದ್ದಲ ಏರ್ಪಟ್ಟು ಕೈಕೈ ಮಿಲಾಯಿಸಿದರು. ಈ ವೇಳೆ ಶಾಸಕರ ಶರ್ಟ್ ಹರಿದುಹೋಗಿದ್ದು, ಪರಿಸ್ಥಿತಿ ವಿಕೋಪಕ್ಕೆ ಹೋಗುವುದನ್ನು ಅರಿತ ಎರಡೂ ಪಕ್ಷಗಳ ಹಿರಿಯ ನಾಯಕರು ಪರಿಸ್ಥಿತಿ ತಿಳಿಗೊಳಿಸಿದ ನಂತರ ಶಾಸಕ ಮಂಜುನಾಥ್ ರಸ್ತೆ ಕಾಮಗಾರಿಗೆ ಭೂಮಿಪೂಜೆ ನೆರವೇರಿಸಿ ತೆರಳಿದರು.
