ಡಿ. 1ರಂದು ಸಂಜೆ 5.30ಕ್ಕೆ ನವದೆಹಲಿಯ ಅಭಯ ಸೊಪೋರಿ ಅವರ ಸಂತೂರ ವಾದನದ ನಿನಾದದೊಂದಿಗೆ ಸಂಗೀತೋತ್ಸವಕ್ಕೆ ಚಾಲನೆ ದೊರೆಯಲಿದೆ. ನಂತರ ಪದ್ಮಶ್ರೀ ಪುರಸ್ಕೃತ ಗಾನಪಂಡಿತ ಡಾ. ಎಂ. ವೆಂಕಟೇಶಕುಮಾರ ಗಾಯನ ಪ್ರಸ್ತುತಪಡಿಸುವರು. 2ರಂದು ಬೆಂಗಳೂರಿನ ಗೋಪಾಲಕೃಷ್ಣ ಬಿ.ಎಂ. ಅವರ ಸಿತಾರವಾದನ ಝೇಂಕಾರ ಮೊಳಗಲಿದೆ. ನಂತರ ಜೈಪುರ- ಅತ್ರೌಲಿ ಘರಾಣೆಯ ವಿದುಷಿ ಮುಂಬೈನ ಅಶ್ವಿನಿ ಭಿಡೆ ಅವರಿಂದ ಗಾಯನ, 3ರಂದು ಧಾರವಾಡದ ಶ್ರುತಿ ಅರ್ಚಕ ಹಾಗೂ ನೂರಜಹಾನ್ ನದಾಫ್ ಅವರ ಸಿತಾರ್ ಜುಗಲಬಂದಿ ಹಾಗೂ ಕಿರಾನಾ ಘರಾಣೆಯ ಪಂ. ಜಯತೀರ್ಥ ಮೇವುಂಡಿ ಅವರ ವಿದ್ವತ್ಪೂರ್ಣ ಗಾಯನ ಮೂಡಿಬರಲಿದೆ. 4ರಂದು ಮುಂಬೈನ ಯುವ ಕಲಾವಿದ ಎಸ್. ಆಕಾಶ ಅವರಿಂದ ಬಾನ್ಸುರಿ ವಾದನ, ಬೆಂಗಳೂರಿನ ಪಂ. ಪರಮೇಶ್ವರ ಹೆಗಡೆ ಅವರಿಂದ ಗಾಯನ ಕಾರ್ಯಕ್ರಮ ನಡೆಯಲಿದೆ. 5ರಂದು ಪುಣೆಯ ಪಂ. ಅತುಲಕುಮಾರ ಉಪಾಧ್ಯೆ ಅವರಿಂದ ವಯೋಲಿನ್ ವಾದನ ಹಾಗೂ ಬೆಂಗಳೂರಿನ ಕೌಶಿಕ ಐತಾಳ- ಓಂಕಾರ ಹವಾಲ್ದಾರ ಅವರ ಗಾಯನ ಜುಗಲ್ಬಂದಿ ಹರಿದುಬರಲಿದೆ.
