ದುರ್ಬಲರು, ಮಾನಸಿಕ ಅಸ್ವಸ್ಥರ ಸೇವೆ :ಸ್ಪೀಕರ್ ಯು.ಟಿ.ಖಾದರ್ ಹೇಳಿಕೆ

ಕಾಸರಗೋಡು: ದುರ್ಬಲರು, ಮಾನಸಿಕ ಅಸ್ವಸ್ಥರ ಪುನಶ್ಚೇತನಕ್ಕಾಗಿ ನಡೆಸುವ ಸೇವೆ ನೈಜ ದೇಶ ಸೇವೆಯಾಗಿದೆ ಎಂದು ವಿಧಾನಸಭಾ ಸ್ಪೀಕರ್ ಯು.ಟಿ.ಖಾದರ್ ತಿಳಿಸಿದರು.

ಮಂಜೇಶ್ವರದ ಬಾಚಳಿಕೆಯಲ್ಲಿ ಕಳೆದ 15 ವರ್ಷಗಳಿಂದ ಮಾನಸಿಕ ಅಸೌಖ್ಯಪೀಡಿತರ ಆರೈಕೆಯಲ್ಲಿ ತೊಡಗಿರುವ ‘ಸ್ನೇಹಾಲಯ’ ವತಿಯಿಂದ ಆರಂಭಿಸಲಾದ ವ್ಯಸನಮುಕ್ತ ಕೇಂದ್ರದ ಉದ್ಘಾಟನಾ ಸಮಾರಂಭದಲ್ಲಿ ಮುಖ್ಯ ಅತಿಥಿಯಾಗಿ ಮಾತನಾಡಿದರು.

ಬದ್ಧತೆ ಕಾಯ್ದುಕೊಳ್ಳುತ್ತಿರುವ ಸಂಘಟನೆಗಳಿದ್ದಲ್ಲಿ, ಸಹಾಯ ಒದಗಿಸುವ ಸಮಾಜ ಸದಾ ಜತೆಗಿರುತ್ತದೆ ಎಂಬುದಕ್ಕೆ ಸ್ನೇಹಾಲಯ ನಿದರ್ಶನವಾಗಿದೆ. ವ್ಯಸನಮುಕ್ತ ಪರಿಕಲ್ಪನೆಯಿಂದ ಆರೋಗ್ಯಪೂರ್ಣ ಸಮಾಜದ ನಿರ್ಮಾಣ ಸಾಧ್ಯ. ಸ್ನೇಹಾಲಯ ಎಂಬ ಸಂಸ್ಥೆ ಮನಪರಿವರ್ತನೆಯ ಕೇಂದ್ರವಾಗಿದ್ದು, ನಿಜವಾದ ದೇಶ ಪ್ರೇಮ ಇಲ್ಲಿ ಅಡಕವಾಗಿದೆ. ಸ್ನೇಹಾಲಯದ ಉತ್ತಮ ಸೇವಾ ಕಾರ್ಯಗಳಿಂದ ದೇಶಕ್ಕೆ ಉದಾತ್ತ ಸಂದೇಶ ರವಾನೆಯಾಗಿದೆ ಎಂದರು.

ಮಂಗಳೂರು ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷ ಪೀಟರ್ ಪಾವ್ಲ್ ಸಲ್ದಾನಾ ನೂತನ ಕೇಂದ್ರ ಲೋಕಾರ್ಪಣೆಗೈದರು. ದೆಹಲಿ ಧರ್ಮ ಪ್ರಾಂತ್ಯದ ಸಹಾಯಕ ಧರ್ಮಾಧ್ಯಕ್ಷ ದೀಪಕ್ ವಲೇರಿಯನ್ ತಾವೊ, ಅನಿವಾಸಿ ಭಾರತೀಯ ಉದ್ಯಮಿ ಮೈಕೆಲ್ ಡಿಸೋಜ, ಶಾಸಕ ಎ.ಕೆ.ಎಂ.ಅಶ್ರಫ್, ಪತ್ರಕರ್ತ ವಾಲ್ಟರ್ ನಂದಳಿಕೆ ಮುಖ್ಯ ಅತಿಥಿಯಾಗಿದ್ದರು. ಪತ್ರಕರ್ತೆ ವಿಜಯಲಕ್ಷ್ಮೀ ಶಿಬರೂರು ಮುಖ್ಯ ಭಾಷಣ ಮಾಡಿದರು. ಧಾರ್ಮಿಕ ಜ್ಞಾನಿ ಆತ್ಮಾದಾಸ್ ಯಾಮಿ ಆಶೀರ್ವಚನ ನೀಡಿದರು. ಸದಾಶಿವ ಶೆಟ್ಟಿ ಕುಳೂರು ಕನ್ಯಾನ, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಪದ್ಮರಾಜ್ ಆರ್.ಪೂಜಾರಿ, ಮಂಜೇಶ್ವರ ಗ್ರಾಪಂ ಅಧ್ಯಕ್ಷೆ ಜೀನ್ ಲವಿನಾ ಮೊಂತೆರೋ, ಗ್ರಾಪಂ ಸದಸ್ಯೆ ಹಾಜಿರಾಮೂಸಾ, ಕೆ.ಆರ್.ಜಯಾನಂದ ಮೊದಲಾದವರು ಉಪಸ್ಥಿತರಿದ್ದರು.

https://www.vijayavani.net/ganja-case-8

https://www.vijayavani.net/street-light-problem-on-national-highway-66