ರಾತ್ರಿಯಿಡಿ ಸುರಿದ ಮಳೆಗೆ ಸರ್ವೀಸ್​ ರಸ್ತೆ ಜಲಾವೃತ

ಬಂಗಾರಪೇಟೆ: ತಾಲೂಕಿನ ಹುಣಸಿನಹಳ್ಳಿಯಲ್ಲಿ ಬಂಗಾರಪೇಟೆ ಮತ್ತು ಬೂದಿಕೋಟೆಗೆ ಸಂಪರ್ಕ ಕಲ್ಪಿಸುವ ರೈಲ್ವೆ ಮೇಲ್ಸೇತುವೆ ಅವೈಜ್ಞಾನಿಕ ಕಾಮಗಾರಿಯಿಂದ ಸರ್ವೀಸ್​ ರಸ್ತೆಯಲ್ಲಿ ಮಳೆ ನೀರು ನಿಂತು ಕೆರೆಯಂತಾಗಿದ್ದು, ನಾಗರಿಕರ ಸುಗಮ ಸಂಚಾರಕ್ಕೆ ಕಂಟಕ ಎದುರಾಗಿದೆ.

ಮೇಲ್ಸೇತುವೆ ಪಕ್ಕದಲ್ಲಿ ಐನೂರಹೊಸಳ್ಳಿ, ಒಂಬತ್ತುಗುಳಿ, ಕಾರಮಂಗಲ, ಹೊಸ ಮನೆಗಳು ಸೇರಿ ಹತ್ತಾರು ಗ್ರಾಮಗಳಿಗೆ ಕಲ್ಪಿಸುವ ಸರ್ವೀಸ್​ ರಸ್ತೆ ಇದಾಗಿದ್ದು, ರಸ್ತೆಯಲ್ಲಿ ವಾಹನ ಸಂಚಾರ ಮತ್ತು ನಡೆದುಕೊಂಡು ಹೋಗುವುದು ದುಸ್ತರವಾಗಿದೆ. ದೊಡ್ಡ ದೊಡ್ಡ ವಾಹನಗಳು ಸಲೀಸಾಗಿ ಹೋದರೂ, ಬೈಕ್​ನಲ್ಲಿ ಹೋಗುವರು, ಪಾದಚಾರಿಗಳ ನಿಂತ ಮಳೆ ನೀರನ್ನು ಮೈಮೇಲೆ ಎರಚಿಕೊಂಡು ಹೋಗಬೇಕಾದ ದುಸ್ಥಿತಿ ಎದುರಾಗಿದೆ.

ಬುಧವಾರ ರಾತ್ರಿ ಸುರಿದ ಮಳೆಗೆ ಸರ್ವೀಸ್​ ರಸ್ತೆ ಜಲಾವೃತಗೊಳ್ಳುವಂತೆ ಆಗಿದೆ.

ಸರ್ವೀಸ್​ ರಸ್ತೆಯಲ್ಲಿ ಮಳೆ ನೀರು ಹೋಗಲು ಎಡ ಪಕ್ಕದಲ್ಲಿ ಚರಂಡಿ ವ್ಯವಸ್ಥೆ ಇಲ್ಲದ ಕಾರಣ ನೀರು ನಿಂತು ಕೆರೆಯಂತಾಗಿದೆ. ಈಗಲಾದರೂ ಸಂಬಂಧಪಟ್ಟ ಅಧಿಕಾರಿಗಳು ಗಮನಹರಿಸಿ ರಸ್ತೆ ಮೇಲೆ ನಿಂತಿರುವ ನೀರನ್ನು ತೆರುವುಗೊಳಿಸಲು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.