ವೀರೇಶ್ವರ ದೇವಸ್ಥಾನದ ಪಕ್ಕದ ಸೋಮಪ್ಪ ಸಜ್ಜನ ಅವರ ಮನೆಯಲ್ಲಿ ಬಾಡಿಗೆಗೆ ವಾಸವಾಗಿರುವ ಆಶಾ ಕಾರ್ಯಕರ್ತೆ ಅಂಬ್ರಮ್ಮ ಮಡಿವಾಳಯ್ಯ ಹಿರೇಮಠ ಅವರ ಮನೆಯಲ್ಲಿ 6 ತೊಲೆ ಬಂಗಾರ ಹಾಗೂ 20 ಸಾವಿರ ರೂಪಾಯಿ ನಗದು ಹಣ, ನಾಡಗೌಡ ಓಣಿಯ ನಿವಾಸಿ ಚನ್ನಬಸಪ್ಪ ಗುರಿಕಾರ ಎಂಬುವವರ ಮನೆಯಲ್ಲಿ ಬೀರು ಒಡೆದು ಅದರಲ್ಲಿದ್ದ 20 ಸಾವಿರ ರೂಪಾಯಿ ಹಾಗೂ 2 ತೊಲಿ ಬಂಗಾರವನ್ನು ಕದ್ದಿದ್ದಾರೆ. ಬಸವರಾಜ ಹೌಶಟ್ಟಿ ಎಂಬುವವರ ಮನೆಯ ಬಾಗಿಲು ಮುರಿದು ಮನೆಯ ತುಂಬ ತಡಕಾಡಿ ನಗದು, ಚಿನ್ನಾಭರಣ ಸಿಗಲಿಲ್ಲವೆಂದು ಬೆಲೆಬಾಳುವ 2 ಸೀರೆಗಳನ್ನು ಹೊತ್ತುಕೊಂಡು ಹೋಗಿದ್ದಾರೆ. ಇನ್ನು ಗುರುಲಿಂಗಪ್ಪ ಕುಂಬಾರ ಹಾಗೂ ಅಬ್ದುಲಸಾಬ ಹಣಗಿ ಅವರ ಮನೆಯ ಬಾಗಿಲು ಮುರಿದು ಹೋಗಿದ್ದಾರಾದರೂ ಅವರ ಮನೆಯಲ್ಲಿ ಯಾವುದೇ ವಸ್ತು ಕಳ್ಳತನವಾಗಿಲ್ಲ ಎಂದು ತಿಳಿದುಬಂದಿದೆ. ಮುದ್ದೇಬಿಹಾಳ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಕಳ್ಳತನ ನಡೆದಿದೆ.
