ಒಂದೇ ಆಸ್ತಿಗೆ ಪ್ರತ್ಯೇಕ ಮೊತ್ತದ ತೆರಿಗೆ ಚಲನ್ !

ಹುಬ್ಬಳ್ಳಿ : ನಿಗದಿತ ಆಸ್ತಿವೊಂದರ ಪಿಐಡಿ ನಂಬರ್​ಗೆ ಬೇರೆ ಬೇರೆ ತೆರಿಗೆ ಚಲನ್​ಗಳನ್ನು ನೀಡಿದ್ದಲ್ಲದೆ, ಆನ್​ಲೈನ್ ಹಾಗೂ ಖುದ್ದಾಗಿ ತೆರಿಗೆ ಪಾವತಿಸುವರಿಗೂ ಪ್ರತ್ಯೇಕ ಮೊತ್ತದ ತೆರಿಗೆ ಚಲನ್​ಗಳನ್ನು ನೀಡುವ ಹುಬ್ಬಳ್ಳಿ-ಧಾರವಾಡ ಮಹಾನಗರ ಪಾಲಿಕೆ ನಾಗರಿಕರಲ್ಲಿ ಗೊಂದಲ ಮೂಡಿಸಿದೆ.

ಪ್ರಾಮಾಣಿಕವಾಗಿ ತೆರಿಗೆ ಹಣ ಪಾವತಿಸಬೇಕೆನ್ನುವವರಿಗೂ ಮಹಾನಗರ ಪಾಲಿಕೆ ಅಧಿಕಾರಿಗಳು ಅವೈಜ್ಞಾನಿಕವಾಗಿ ಚಲನ್​ಗಳನ್ನು ನೀಡುತ್ತಿರುವುದು ಬೆಳಕಿಗೆ ಬಂದಿದೆ. ಅದೂ, ಒಂದೇ ದಿನದಲ್ಲಿ ಒಂದೇ ಪಿಐಡಿ ಸಂಖ್ಯೆಗೆ ಬೇರೆ ಬೇರೆ ಮೊತ್ತದ ತೆರಿಗೆ ಹಣದ ಚಲನ್​ಗಳನ್ನು ನೀಡುವ ಮೂಲಕ ಪಾಲಿಕೆ ಸಿಬ್ಬಂದಿ ಬೇಜವಾಬ್ದಾರಿತನ ತೋರಿದ್ದಾರೆ.

ಯಾವುದೇ ವಲಯ ಕಚೇರಿಯಲ್ಲಿ ಕಂಪ್ಯೂಟರ್ ಆಪರೇಟರ್​ಗಳು ನಿಗದಿತ ಪಿಐಡಿ ಸಂಖ್ಯೆಯನ್ನು ನಮೂದು ಮಾಡಿದರೆ ಸಾಕು, ಆ ಆಸ್ತಿಯ ಪಿಐಡಿ ಸಂಖ್ಯೆಗೆ ನಿಗದಿತಗೊಂಡಿರುವ ಮೊತ್ತದ ತೆರಿಗೆ ಚಲನ್ ಬರುತ್ತದೆ. ಆದರೆ, ಒಂದು ಪಿಐಡಿ ಸಂಖ್ಯೆಯ ಚಲನ್​ಗಳನ್ನು ಬೇರೆ ಬೇರೆ ಅವಧಿಯಲ್ಲಿ ಪಡೆದರೆ, ಪ್ರತ್ಯೇಕ ತೆರಿಗೆ ಮೊತ್ತದ ಚಲನ್​ಗಳನ್ನು ಪಾಲಿಕೆ ಸಿಬ್ಬಂದಿ ನೀಡಿದ್ದಾರೆ. ಈ ರೀತಿಯ ಬೇಜವಾಬ್ದಾರಿ ನಾಗರಿಕರ ಆಕ್ರೋಶಕ್ಕೆ ಕಾರಣವಾಗಿದೆ.

ಆನ್​ಲೈನ್ ಮೂಲಕ ತೆರಿಗೆ ಪಾವತಿಸುವ ನಾಗರಿಕರೂ ಪಾಲಿಕೆ ಬೇಜವಾಬ್ದಾರಿತನದ ಪರಿಣಾಮ ಎದುರಿಸುತ್ತಿದ್ದಾರೆ. ಆನ್​ಲೈನ್​ನಲ್ಲಿ ನಿಗದಿತ ಆಸ್ತಿಯ ಪಿಐಡಿ ಸಂಖ್ಯೆಗೆ ಒಂದು ಮೊತ್ತದ ತೆರಿಗೆ ಕಾಣಿಸಿದರೆ, ಅದೇ ಪಿಐಡಿ ಸಂಖ್ಯೆಗೆ ಪಾಲಿಕೆ ವಲಯ ಕಚೇರಿಯಲ್ಲಿ ಬೇರೆಯದ್ದೇ ತೆರಿಗೆ ಮೊತ್ತ ತೋರಿಸಲಾಗುತ್ತಿದೆ.

ವಲಯ ಕಚೇರಿಯಲ್ಲಿ ನೀಡುವ ತೆರಿಗೆ ಮೊತ್ತದ ಚಲನ್​ಗೂ, ಆನ್​ಲೈನ್​ನಲ್ಲಿ ಕಾಣಿಸುವ ತೆರಿಗೆ ಮೊತ್ತದ ಚಲನ್​ಗಳಿಗೂ ಅಜಗಜಾಂತರ ವ್ಯತ್ಯಾಸ ಕಾಣಿಸುತ್ತಿದೆ. ಒಂದು ವೇಳೆ ನಾಗರಿಕರು ಆನ್​ಲೈನ್​ನಲ್ಲಿ ಕಾಣಿಸುವ ಪಿಐಡಿ ಸಂಖ್ಯೆಯ ಕಡಿಮೆ ಮೊತ್ತದ ತೆರಿಗೆಯನ್ನು ಪಾವತಿಸಿದರೆ, ಕಡಿಮೆ ತೆರಿಗೆ ಪಾವತಿಸಿದ್ದಕ್ಕೆ ಭವಿಷ್ಯದಲ್ಲಿ ನಾಗರಿಕರು ದಂಡ ತುಂಬಬೇಕಾಗುತ್ತದೆ ಎನ್ನುವ ಭಯ. ಒಂದು ವೇಳೆ ಹೆಚ್ಚಿನ ತೆರಿಗೆ ಪಾವತಿಸಿದ್ದರೆ, ಮುಂದಿನ ವರ್ಷದ ತೆರಿಗೆ ಹಣಕ್ಕೆ ಹೊಂದಾಣಿಕೆಯಾಗುತ್ತದೆ.