ರಾಮನಗರ: ನಿಗಮದಿಂದ ಜಿಲ್ಲೆಯ 3 ಸರ್ಕಾರಿ ಶಾಲೆಗಳು ಸೇರಿ 8 ಶಾಲೆಗಳನ್ನು ದತ್ತು ತೆಗೆದುಕೊಂಡು ಹೈಟೆಕ್ ಶಾಲೆಗಳನ್ನಾಗಿ ಅಭಿವೃದ್ಧಿಪಡಿಸಲು ಚಿಂತಿಸಲಾಗಿದೆ ಎಂದು ಕೆಆರ್ಐಡಿಎಲ್ ಅಧ್ಯಕ್ಷ ಎಂ. ರುದ್ರೇಶ್ ತಿಳಿಸಿದರು. ನಗರದಲ್ಲಿ ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ರಾಮನಗರ ಜಿಲ್ಲೆಯ ಮರಳವಾಡಿ ಹೋಬಳಿಯ ಅಣ್ಣೇದೊಡ್ಡಿ, ತೇರು ಬೀದಿ ಗ್ರಾಮದ ತಲಾ ಒಂದು ಸರ್ಕಾರಿ ಶಾಲೆ, ಕಸಬಾ ಅಥವಾ ಕೈಲಾಂಚ ಹೋಬಳಿಯ ಒಂದು ಶಾಲೆ, ಚಾಮರಾಜನಗರ ಜಿಲ್ಲೆಯ ನಾಲ್ಕು ಸರ್ಕಾರಿ ಶಾಲೆಗಳು ಹಾಗೂ ಶಿವಮೊಗ್ಗ ಜಿಲ್ಲೆಯ ಒಂದು ಶಾಲೆಯನ್ನು ದತ್ತು ತೆಗೆದುಕೊಳ್ಳಲಾಗುತ್ತಿದ್ದು, ಮುಂದಿನ ಸಭೆಯಲ್ಲಿ ಅನುಮೋದನೆ ಪಡೆದುಕೊಳ್ಳಲಾಗುವುದು. ಈ ಶಾಲೆಗಳ ಅಭಿವೃದ್ಧಿ ಜತೆಗೆ, ಎಸ್ಸೆಸ್ಸೆಲ್ಸಿ ಮಕ್ಕಳಿಗೆ ಲ್ಯಾಪ್ಟಾಪ್ ಇಲ್ಲವೇ ಐಪಾಡ್ ಕೊಡಿಸಲಾಗುವುದು ಎಂದರು.
