ಕಾರವಾರ: ಪರಿಶಿಷ್ಟ ಜಾತಿಯ ಒಳ ಮೀಸಲಾತಿ ಜಾರಿ ಸಂಬAಧ ನ್ಯಾ.ನಾಗಮೋಹನದಾಸ್ ಸಮಿತಿಯ ಸೂಚನೆಯಂತೆ ನಡೆದ ಪರಿಶಿಷ್ಟ ಜಾತಿಗಳ ಕುಟುಂಬದ ಸಾಮಾಜಿಕ, ಆರ್ಥಿಕ ಸಮೀಕ್ಷೆಯಲ್ಲಿ ಜಿಲ್ಲೆಯಲ್ಲಿ ಶೇ. 100.32 ರಷ್ಟು ಗುರಿ ಸಾಧಿಸಲಾಗಿದೆ.
ಜಿಲ್ಲೆಯಲ್ಲಿ 2011 ಜನಗಣತಿಯಂತೆ ಪ.ಜಾತಿಯ 26,617 ಕುಟುಂಬಗಳಿವೆ ಎಂದು ಅಂದಾಜಿಸಲಾಗಿದ್ದು, ಅವುಗಳ ಭೇಟಿ ನೀಡುವ ಗುರಿ ಹೊಂದಲಾಗಿತ್ತು. ಮೇ 27ಕ್ಕೆ ಮನೆಗಳ ಭೇಟಿ ಪೂರ್ಣಗೊಂಡಿದ್ದು, 28,964 ಪ.ಜಾತಿಯ ಮನೆಗಳನ್ನು ಗುರುತಿಸಿ ಸಮೀಕ್ಷೆ ನಡೆಸಲಾಗಿದೆ. ಮನೆ ಗಣತಿಯಲ್ಲಿ ಶೇ.108.82 ಸಾಧನೆ ಆಗಿದೆ. 1,16,781 ಪರಿಶಿಷ್ಟ ಜಾತಿಯ ಜನಸಂಖ್ಯೆ ಜಿಲ್ಲೆಯಲ್ಲಿದೆ ಎಂದು ಅಂದಾಜಿಸಲಾಗಿತ್ತು. ಆದರೆ, 1,17,156 ಪ.ಜಾತಿಯ ಜನರನ್ನು ಸಮೀಕ್ಷೆಗೆ ಒಳಪಡಿಸಿದ್ದು ಶೇ.100.32 ಸಾಧನೆ ಮಾಡಲಾಗಿದೆ. ಮೇ 30 ರಿಂದ ಜೂನ್ 1 ರವರೆಗೆ ಶಿಬಿರಗಳನ್ನು ಮರು ನಿಗದಿ ಮಾಡಲಾಗಿದೆ. ಅಲ್ಲಿ, ಪ್ರತಿ ಗ್ರಾಮ ಹಂತದಲ್ಲಿ ಸಭೆಗಳನ್ನು ಮಾಡಿ, ಪರಿಶಿಷ್ಟ ಜಾತಿಯ ಜನಸಂಖ್ಯೆಯನ್ನು ಖಚಿತ ಮಾಡಿಕೊಳ್ಳಲಾಗುವುದು. ಈ ದತ್ತಾಂಶ ಆಧರಿಸಿ, ಒಳ ಮೀಸಲಾತಿ ನಿಗದಿ ಮಾಡಲು ಸರ್ಕಾರಕ್ಕೆ ಅನುಕೂಲವಾಗಲಿದೆ.
ಜಿಲ್ಲೆಯಲ್ಲಿ ಈ ಸಮೀಕ್ಷೆಗಾಗಿ 1,445 ಗಣತಿದಾರರು, 156 ಕಾಯ್ದಿರಿಸಿದ ಗಣತಿದಾರರು, 144 ಮೇಲ್ವಿಚಾರಕರು ಮತ್ತು 19 ಕಾಯ್ದಿರಿಸಿದ ಮೇಲ್ವಿಚಾರಕರನ್ನು ನೇಮಕ ಮಾಡಲಾಗಿತ್ತು. ಇವರಿಗೆ ಅಗತ್ಯ ತರಬೇತಿ ನೀಡಲು 4 ಜಿಲ್ಲಾ ಮಾಸ್ಟರ್ ಟ್ರೇನ್ನರ್, 57 ತಾಲೂಕು ಮಾಸ್ಟರ್ ಟ್ರೇನರ್ಗಳನ್ನು ನಿಯೋಜಿಸಿದ್ದು, ಸಮೀಕ್ಷೆ ಸಂದರ್ಭದಲ್ಲಿ ಕಂಡು ಬರುವ ತಾಂತ್ರಿಕ ಸಮಸ್ಯೆಗಳನ್ನು ಬಗೆಹರಿಸಲು ಒಬ್ಬ ತಾಂತ್ರಿಕ ಸಮಾಲೋಚಕರನ್ನು ನೇಮಿಸಲಾಗಿತ್ತು.
