ಜಲಾಗಾರದ ಶುಚಿತ್ವ ಕಾಪಾಡುವಂತೆ ಸವಣೂರ ಮುಖ್ಯಾಧಿಕಾರಿ ಸೂಚನೆ

ಸವಣೂರ: ಪಟ್ಟಣದ ನೀರು ಸರಬರಾಜಿನ ಜಲಾಗಾರಕ್ಕೆ ಗುರುವಾರ ಪುರಸಭೆ ಮುಖ್ಯಾಧಿಕಾರಿ ರೇಣುಕಾ ದೇಸಾಯಿ ಹಾಗೂ ಅಧಿಕಾರಿಗಳ ತಂಡ ಭೇಟಿ ನೀಡಿ ಪರಿಶೀಲನೆ ಕೈಗೊಂಡು, ಜಲಾಗಾರದ ಶುಚಿತ್ವ ಕಾಪಾಡುವಂತೆ ಸೂಚನೆ ನೀಡಿದರು.

ಆ. 24ರಂದು ವಿಜಯವಾಣಿ ಪ್ರಕಟಿಸಿದ ‘ಜಲಾಗಾರ ಜನಾರೋಗ್ಯಕ್ಕೆ ಸಂಚಕಾರ’ ಶೀರ್ಷಿಕೆಯಡಿ ಸವಣೂರಿನಲ್ಲಿ ಕಲುಷಿತ ನೀರು ಪೂರೈಕೆ ಕುರಿತು ವರದಿ ಹಿನ್ನ್ನೆಲೆಯಲ್ಲಿ ಪುರಸಭೆ ಅಧಿಕಾರಿಗಳ ತಂಡ ಪಟ್ಟಣದ ಧರ್ಮರಾಜ ನಗರದಲ್ಲಿರುವ ಜಲಾಗಾರಕ್ಕೆ ಭೇಟಿ ನೀಡಿ, ನೀರು ಸಂಗ್ರಹ ಹಾಗೂ ಸರಬರಾಜಿನ ಕುರಿತು ಸಂಪೂರ್ಣ ಮಾಹಿತಿ ಪಡೆದರು.

ಮೆಳ್ಳಾಗಟ್ಟಿ ವರದಾ ನದಿಯಿಂದ ಹರಿದು ಬರುವ ನೀರನ್ನು ಸೂಕ್ತ ನಿರ್ವಹಣೆಯೊಂದಿಗೆ ಶುದ್ಧೀಕರಿಸಿ ಪಟ್ಟಣಕ್ಕೆ ಸರಬರಾಜು ಮಾಡಲು ಮುಂದಾಗಬೇಕು ಹಾಗೂ ನೀರು ಶುದ್ಧೀಕರಣ ಯಂತ್ರಗಳ ದುರಸ್ತಿ ಕೈಗೊಳ್ಳಲು ಯೋಜನೆ ರೂಪಿಸಲು ಅಧಿಕಾರಿಗಳ ತಂಡಕ್ಕೆ ಸೂಚಿಸಿದರು.

ಮುಖ್ಯ ಇಂಜಿನಿಯರ್ ನಾಗರಾಜ ಮಿರ್ಜಿ, ವ್ಯವಸ್ಥಾಪಕ ಮಹೇಶ ದೊಡ್ಡಣ್ಣವರ, ನೋಡಲ್ ಇಂಜಿನಿಯರ್ ನಾಗರಾಜ ಆರ್. ಚೌವ್ವಾಣ, ಸಿಬ್ಬಂದಿ ಜಗದೀಶ ಕಾಳಶೆಟ್ಟಿ, ಅಶೋಕ ಕಾಳೆ ಹಾಗೂ ಇತರರು ಇದ್ದರು.