ಬಂಗಾರಪೇಟೆ ತಾಲೂಕು ಆಲಂಬಾಡಿ ಗ್ರಾಮದ ಸರ್ವೇ ನಂ.44ರಲ್ಲಿ ಪುರಾತನ ಕಾಲದ ಸಪ್ಪಲಮ್ಮ ದೇವಾಸ್ಥಾನವಿದ್ದು, ಅನಾದಿ ಕಾಲದಿಂದಲೂ ಕಾರಮಾನಹಳ್ಳಿ, ಆಲಂಬಾಡಿ, ಜ್ಯೋತೇನಹಳ್ಳಿ, ಹುನಕಲದೊಡ್ಡಿ ಮತ್ತು ಬನಹಳ್ಳಿ ಗ್ರಾಮಸ್ಥರು ಪೂಜೆ ಮಾಡಿಕೊಂಡು ಬರುತ್ತಿದ್ದಾರೆ. ಈ ಸ್ಥಳದಲ್ಲಿ ಇತಿಹಾಸ ಸಾರುವ ಪುರಾತನ ಕಾಲದ ಹತ್ತಾರು ವೀರಗಲ್ಲುಗಳು ಮತ್ತು ಮಂಟಪಗಳಿವೆ. ದೇವಾಲಯ ಶಿಥಿಲಗೊಂಡಿದ್ದ ಕಾರಣ ಇತ್ತೀಚೆಗೆ ಗ್ರಾಮಸ್ಥರು ಜೀಣೋರ್ದ್ದಾರ ಮಾಡಿದ್ದರು. ಸ್ಥಳದಲ್ಲಿ ನಾಲ್ಕೆ$ದು ಮಂಟಪ ಮತ್ತು ಹಲವು ಅವಶೇಷಗಳಿದ್ದು, ಅವುಗಳು ಸಹ ಶಿಥಿಲಗೊಂಡಿವೆ. ಪುರಾತನ ಅವಶೇಷಗಳ ರಕ್ಷಣೆ ಮಾಡಬೇಕಾದ ಕೆಲವರು ಹಣದಾಸೆಗೆ ಕೊಟ್ಯಾಂತರ ಬೆಲೆ ಬಾಳುವ ಭೂಮಿ ತಮ್ಮ ಹೆಸರಿಗೆ ಮಾಡಿಕೊಂಡು ಅವಶೇಷ ಕೆಡವಲು ಹುನ್ನಾರ ನಡೆಸುತ್ತಿದ್ದಾರೆ. ಕಳೆದ ಎರಡು ದಿನಗಳಿಂದ ಪಕ್ಕದ ಜಮೀನಿನ ಮಾಲೀಕರೊಬ್ಬರು ಜಮೀನನ್ನು ಬೆಂಗಳೂರು ಮೂಲದ ರಿಯಲ್ ಎಸ್ಟೇಟ್ ಅವರಿಗೆ ಮಾರಾಟ ಮಾಡಲು ದೇವಾಲಯಕ್ಕೆ ಸೇರಿದ ಭೂಮಿಯಲ್ಲಿ ರಸ್ತೆ ಮಾಡುತ್ತಿದ್ದಾರೆ. ರಸ್ತೆಗೆ ಅಡ್ಡವಾಗುತ್ತಿದೆ ಎಂಬ ಕಾರಣಕ್ಕೆ ಮಂಟಪದ ಕಲ್ಲುಗಳನ್ನು ಕಿತ್ತು ಹಾಕಿದ್ದಾರೆ. ಪ್ರಶ್ನಿಸಿದರೆ ಈ ಭೂಮಿ ನಮಗೆ ಸೇರಿದ್ದು, ಭೂನ್ಯಾಯಮಂಡಳಿ ಮೂಲಕ ನಮಗೆ ಹೆಸರಿಗೆ ವರ್ಗಾವಣೆಯಾಗಿದೆ ಎಂದು ಮುನಿಚಂದ್ರಪ್ಪ ಮತ್ತು ಕುಟುಂಬದವರು ತಗಾದೆ ತೆಗೆಯುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.
