ಮೂರು ತಿಂಗಳ ಹಿಂದೆ ನಿಶ್ಚಿತಾರ್ಥ ನೆರವೇರಿದ್ದು, ಹಿರೇಮಗಳೂರಿನಲ್ಲಿ ಮದುವೆ ನಿಗದಿಯಾಗಿತ್ತು. ಕರೊನಾ ಲಾಕ್ಡೌನ್ ಏ.14ಕ್ಕೆ ಪೂರ್ಣಗೊಳ್ಳುತ್ತದೆ. ಬಂಧು ಬಾಂಧವರು, ಸ್ನೇಹಿತರನ್ನು ಕರೆದು ಮದುವೆ ಮಾಡಬಹುದು ಎಂಬ ವಿಶ್ವಾಸ ಹೊಂದಿದ್ದರು. ಆದರೆ ಲಾಕ್ಡೌನ್ ಮುಂದುವರಿದಾಗ ಹಿರಿಯರಿಗೆ ಕೊಂಚ ನಿರಾಸೆ ಮೂಡಿಸಿತ್ತಾದರೂ ಮನೆಯ ಮುಂದೆ ಕನ್ಯಾದಾನ ಮಾಡಿಕೊಟ್ಟ ನೆಮ್ಮದಿಯೂ ಪಾಲಕರಲ್ಲಿ ಕಂಡು ಬಂತು. ವರ ಮೈಸೂರಿನ ಮಂಜುನಾಥ್ 25 ದಿನಗಳಿಂದ ನಗರದಲ್ಲೆ ವಾಸ್ತವ್ಯ ಹೂಡಿದ್ದರು. ವಧುವಿನ ಸಂಬಂಧಿಕರಾದ ಮಹೇಶ್ ಮತ್ತು ಮಂಜುಳಾ ದಂಪತಿ ವರನ ಪಾಲಕರ ಸ್ಥಾನದಲ್ಲಿ ಮದುವೆಯಲ್ಲಿ ಭಾಗಿಯಾದರು. ಲಕ್ಷ್ಮೀಶನಗರದ ವಧುವಿನ ಸ್ವಗೃಹದಲ್ಲಿ ನಡೆದ ಈ ಕಾರ್ಯಕ್ರಮದಲ್ಲಿ ವಿವಿಧ ಪೂಜಾ ಕೈಂಕರ್ಯಗಳೊಂದಿಗೆ ಕುಟುಂಬದವರು ಧಾರೆ ಎರೆದರು. ಮನೆಯಲ್ಲೆ ತಯಾರಿಸಿದ ಸಿಹಿಯೂಟ ಸವಿದು ಸರಳ ಮದುವೆಗೆ ನಾಂದಿ ಹಾಡಿದರು.
