ನರಸಿಂಹ ದೇವರೇ ಗುರು: ಸಮಾಜದ ಎಲ್ಲ ವರ್ಗದ ಜನರು ತಮ್ಮದೇ ಆದ ಒಂದು ಗುರುಮಠ, ಪೀಠಾಧಿಪತಿಗಳನ್ನು ಹೊಂದಿರುವುದು ಸಾಮಾನ್ಯ. ಆದರೆ ಮೂಲತಃ ಕೋಟ ಪ್ರದೇಶದ 14 ಗ್ರಾಮಗಳಲ್ಲಿ ವಾಸವಾಗಿದ್ದು, ಪ್ರಸ್ತುತ ಪ್ರಪಂಚದಾದ್ಯಂತ 7ರಿಂದ 8 ಲಕ್ಷ ಅಂದಾಜು ಸಂಖ್ಯಾ ಬಾಹುಳ್ಯ ಹೊಂದಿರುವ ಕೋಟ ಬ್ರಾಹ್ಮಣರೆಂಬ ಪಂಗಡದವರು ಶ್ರೀಗುರುನರಸಿಂಹ ದೇವಸ್ಥಾನವನ್ನು ತಮ್ಮ ಗುರುಮಠವೆಂದು, ಇಲ್ಲಿನ ಪ್ರಧಾನ ದೇವರಾದ ಶ್ರೀನರಸಿಂಹನನ್ನೇ ಗುರುವಾಗಿ ಸ್ವೀಕರಿಸಿರುವ ಕಾರಣ ಗುರುನರಸಿಂಹ ಎಂದು ಖ್ಯಾತಿ ಪಡೆದಿದೆ. ಕೋಟೇಶ್ವರ ಮಾಗಣೆಯವರು ಗುರುನರಸಿಂಹ ದೇವರನ್ನು ಕುಲದೇವರಾಗಿ ಆರಾಧಿಸಿಕೊಂಡು ಬಂದಿದ್ದು, ಕೋಟ 14 ಗ್ರಾಮಗಳಾದ ಬಾಳ್ಕುದ್ರು, ಐರೋಡಿ, ಪಾಂಡೇಶ್ವರ, ಮೂಡಹಡು, ಗುಂಡ್ಮಿ, ಕೋಡಿ, ಕಾರ್ಕಡ, ಪಾರಂಪಳ್ಳಿ, ಚಿತ್ರಪಾಡಿ, ಕೋಟತಟ್ಟು, ಕಾರ್ತಟ್ಟು, ಹಂದಟ್ಟು, ಗಿಳಿಯಾರು, ಮಣೂರು ಗ್ರಾಮಗಳ ಅಧಿದೇವತೆಯಾಗಿ ಪ್ರತಿಯೊಬ್ಬರು ಆರಾಧಿಸುತ್ತಾರೆ.
