ಬಂಗಾರಪೇಟೆ: ಜನರಿಂದ ಆಯ್ಕೆಯಾದ ಚುನಾಯಿತ ಪ್ರತಿನಿಧಿಗಳು ಹೊಣೆಗಾರಿಕೆ ಮತ್ತು ಜವಾಬ್ದಾರಿ ನಿರ್ವಹಿಸಲು ಅಗತ್ಯವಿರುವ ಓದು ಮತ್ತು ಬರಹ ತಿಳಿದವರಾಗಿರಬೇಕು. ಇಲ್ಲವಾದರೆ ಅವರ ಅಧಿಕಾರವನ್ನು ಮತ್ತೊಬ್ಬರು ಚಲಾಯಿಸಿ, ಪ್ರಜಾಪ್ರಭುತ್ವದ ಆಶಯಕ್ಕೇ ಧಕ್ಕೆಯಾಗುವ ಸಂಭವ ಹೆಚ್ಚಿದೆ. ಆದ್ದರಿಂದ ಓದು ಬರಹ ಬಾರದ ಗ್ರಾಪಂ ಸದಸ್ಯರಿಗೆ ಅಕ್ಷರ ಕಲಿಸುವ "ಸಾಕ್ಷರ ಸಮ್ಮಾನ್' ಯೋಜನೆ ರೂಪಿಸಿದ್ದ್ದು, ತಾಲೂಕಿನಲ್ಲಿ ಸೆ.1 ರಿಂದ ತರಗತಿಗಳು ಆರಂಭವಾಗಲಿವೆ.
ದಶಕಗಳ ಹಿಂದೆ ಅನಕ್ಷರಸ್ಥ ಜನರಿಗೆ ಅಕ್ಷರ ಕಲಿಸುವ ಸಲುವಾಗಿ ರಾತ್ರಿ ಶಿಕ್ಷಣವೊಂದು ಜಾರಿಯಲ್ಲಿತ್ತು. ಕಾಲ ಕಳೆದಂತೆ ರಾತ್ರಿ ಶಾಲೆಗಳು ಮರೆಯಾದವು. ಅದೇ ಮಾದರಿಯಲ್ಲಿ ಅನಕ್ಷರಸ್ಥ ಗ್ರಾಪಂ ಸದಸ್ಯರಿಗೆ ಅಕ್ಷರ ಕಲಿಸಲು ಸಾಕ್ಷರ ಸಮ್ಮಾನ್ ಎಂಬ ಹೊಸ ಸಾಕ್ಷರತಾ ಯೋಜನೆ ವರದಾನವಾಗಿದೆ.
ಗ್ರಾಪಂ ಸದಸ್ಯರು ಅಧಿಕಾರದ ಚುಕ್ಕಾಣಿ ಹಿಡಿಯಲು ಸರ್ಕಾರ ಯಾವುದೇ ಕನಿಷ್ಠ ಶಿಕ್ಷಣದ ನಿಯಮ ನಿಗದಿಪಡಿಸಿಲ್ಲ. ಜನಪರ ಕಾಳಜಿಯುಳ್ಳ ಅನಕ್ಷರಸ್ಥರು ಸಹ ಗ್ರಾಪಂ ಸದಸ್ಯರಾಗಿ, ಅಧ್ಯಕ್ಷರಾಗಿ ಅಧಿಕಾರ ಚಲಾಯಿಸುತ್ತಿದ್ದಾರೆ. ಜಿಲ್ಲೆಯ ಅನೇಕ ಗ್ರಾಪಂ ಚುನಾಯಿತ ಸದಸ್ಯರಿಗೆ ಓದು, ಬರಹ ತಿಳಿದಿಲ್ಲದ ಕಾರಣ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ರಾಜ್ ಇಲಾಖೆ ಓದು, ಬರಹ ಕಲಿಸಲು ಮುಂದಾಗಿದೆ.
