ಸಹ್ಯಾದ್ರಿ ರಾಜ್ಯದ ಪ್ರಗತಿಪರ ಶಿಕ್ಷಣ ಸಂಸ್ಥೆ

ಮಂಗಳೂರು: ಸಹ್ಯಾದ್ರಿ ಕಾಲೇಜ್ ಆಫ್ ಇಂಜಿನಿಯರಿಂಗ್ ಆಂಡ್ ಮ್ಯಾನೇಜ್‌ಮೆಂಟ್ ಸಂಸ್ಥೆಯಲ್ಲಿ ಉದ್ಯಮ ಮತ್ತು ಶೈಕ್ಷಣಿಕ ವಲಯದ ನಡುವಿನ ಬಾಂಧವ್ಯವನ್ನು ಬಲಪಡಿಸುವ ನಿಟ್ಟಿನಲ್ಲಿ ಒಂದು ಪ್ರಮುಖ ಮೈಲಿಗಲ್ಲು ದಾಖಲಾಗಿದೆ. ಸಂಸ್ಥೆಯಲ್ಲಿ ‘ಡಿಸ್ಕವರ್ ಡಾಲರ್’, ‘ಎಂಬಿಸಲ್ಟ್ ಟೆಕ್ನಾಲಜೀಸ್ ಪ್ರೈವೇಟ್ ಲಿಮಿಟೆಡ್’ ಮತ್ತು ‘ಆಲ್‌ಕಾರ್ಗೊ ಗ್ರೂಪ್’ ಸಂಸ್ಥೆಗಳ ಉದ್ಯಮ ಸಂಯೋಜಿತ ಕೇಂದ್ರಗಳನ್ನು ಶನಿವಾರ ಉದ್ಘಾಟಿಸಲಾಯಿತು.

ವೈದ್ಯಕೀಯ ಶಿಕ್ಷಣ ಮತ್ತು ಕೌಶಲ್ಯಾಭಿವೃದ್ಧಿ ಸಚಿವ ಡಾ. ಶರಣಪ್ರಕಾಶ್ ಆರ್. ಪಾಟೀಲ್ ಹಾಗೂ ಆಲ್‌ಕಾರ್ಗೊ ಗ್ರೂಪ್‌ನ ಸಂಸ್ಥಾಪಕ ಮತ್ತು ಅಧ್ಯಕ್ಷ ಶಶಿಕಿರಣ್ ಶೆಟ್ಟಿ ಅವರು ಈ ಕೇಂದ್ರಗಳನ್ನು ಜಂಟಿಯಾಗಿ ಉದ್ಘಾಟಿಸಿದರು.

ಸಹ್ಯಾದ್ರಿ ಸಂಸ್ಥೆಯ ಅಧ್ಯಕ್ಷ ಮಂಜುನಾಥ್ ಭಂಡಾರಿ, ಐಐಎಂ ಮುಂಬೈನ ಪ್ರಾಧ್ಯಾಪಕ ಪ್ರೊ. ವಿವೇಕಾನಂದ ಖಾನಾಪುರಿ ಮತ್ತು ಪ್ರೊ. ಬಾಲಕೃಷ್ಣ ಇ. ನಾರಖೇಡೆ, ಕಹಾನಿ ಡಿಸೈನ್ ವರ್ಕ್ಸ್ ಪ್ರೈವೇಟ್ ಲಿಮಿಟೆಡ್‌ನ ವ್ಯವಸ್ಥಾಪಕ ನಿರ್ದೇಶಕ ರಮಣ್ ಮಾಧೋಕ್ ಮತ್ತು ಆಲ್‌ಕಾರ್ಗೊ ಲಾಜಿಸ್ಟಿಕ್ಸ್‌ನ ಗ್ರೂಪ್ ಚೀಫ್ ಎಚ್‌ಆರ್ ಆಫೀಸರ್ ಇಂದ್ರಾಣಿ ಚಟರ್ಜಿ ಉಪಸ್ಥಿತರಿದ್ದರು.

ವಿವಿಧ ಕಂಪನಿಗಳ ಮುಖ್ಯಸ್ಥರಾದ ಶ್ರೀ ಸುಬ್ರಮಣ್ಯ ರಾವ್ (ಸಿಇಒ, ಡಿಸ್ಕವರ್ ಡಾಲರ್), ಅಕ್ಷಯ್ ಶೆಟ್ಟಿ (ಎಐ ಮುಖ್ಯಸ್ಥರು, ಜಿಂಥೋರಾ ಎಐ), ರಾಜೇಶ್ ಕೋಟ್ಯಾನ್ (ಸಿಇಒ, ಡೇಟಾವೆಕ್ಸ್ ಎಐ), ಪದ್ಮಶ್ರೀ ಆಳ್ವ (ಉಪಾಧ್ಯಕ್ಷರು, ಎಂಬಿಸಲ್ಟ್ ಟೆಕ್ನಾಲಜೀಸ್ ಪ್ರೈವೇಟ್ ಲಿಮಿಟೆಡ್) ಮತ್ತು ಶ್ರೇಯಸ್ ಕೋಟ್ಯಾನ್ (ಉತ್ಪನ್ನ ವಿಭಾಗದ ಮುಖ್ಯಸ್ಥರು, ಫ್ಲೋಕೇರ್) ಅವರು ತಮ್ಮ ಸಂಸ್ಥೆಗಳು ಮತ್ತು ಹೊಸ ಆವಿಷ್ಕಾರಗಳ ಕುರಿತು ವಿವರಿಸಿದರು.

ಸಚಿವ ಡಾ. ಶರಣಪ್ರಕಾಶ್ ಪಾಟೀಲ್ ಮಾತನಾಡಿ, ಉನ್ನತ ಶಿಕ್ಷಣ ಕ್ಷೇತ್ರಕ್ಕೆ ಮಂಜುನಾಥ್ ಭಂಡಾರಿ ಅವರ ಅಸಾಧಾರಣ ಕೊಡುಗೆಯನ್ನು ಶ್ಲಾಘಿಸಿದರು. ಅವರ ತ್ಯಾಗ ಮತ್ತು ದೂರದೃಷ್ಟಿಯಿಂದ ಸಹ್ಯಾದ್ರಿ ಸಂಸ್ಥೆಯನ್ನು ರಾಜ್ಯದ ಪ್ರಗತಿಪರ ಶಿಕ್ಷಣ ಸಂಸ್ಥೆಗಳಲ್ಲಿ ಒಂದಾಗಿ ರೂಪಿಸಿದ್ದಾರೆ ಎಂದು ಹೇಳಿದರು.

ವೃತ್ತಿಪರ ಕಾಲೇಜುಗಳನ್ನು ಸ್ಥಾಪಿಸಲು ಖಾಸಗಿ ಸಂಸ್ಥೆಗಳಿಗೆ ಪ್ರೋತ್ಸಾಹದಾಯಕ ವಾತಾವರಣವನ್ನು ನಿರ್ಮಿಸುವ ಮೂಲಕ ಕರ್ನಾಟಕವು ಯಾವಾಗಲೂ ಪ್ರಗತಿಪರ ದೃಷ್ಟಿಕೋನವನ್ನು ಹೊಂದಿದೆ, ಹೀಗಾಗಿಯೇ ರಾಜ್ಯವು ವೈದ್ಯಕೀಯ, ಇಂಜಿನಿಯರಿಂಗ್ ಮತ್ತು ವೃತ್ತಿಪರ ಶಿಕ್ಷಣಕ್ಕೆ ಪ್ರಮುಖ ಆದ್ಯತೆಯ ತಾಣವಾಗಿದೆ ಎಂದು ಸಚಿವರು ತಿಳಿಸಿದರು.

ಸಂಸ್ಥೆಯ ಪ್ರಾಮಾಣಿಕ ಪ್ರಯತ್ನ ಶಶಿಕಿರಣ್ ಶೆಟ್ಟಿ ಅವರು ಮಾತನಾಡಿ, ಸಹ್ಯಾದ್ರಿ ಸಂಸ್ಥೆಯನ್ನು ಆಯ್ಕೆ ಮಾಡಿಕೊಂಡ ವಿದ್ಯಾರ್ಥಿಗಳಿಗೆ ಗರಿಷ್ಠ ಪ್ರಯೋಜನ ಸಿಗುವಂತೆ ಮಾಡಲು ಸಂಸ್ಥೆಯು ಪ್ರಾಮಾಣಿಕ ಪ್ರಯತ್ನ ಮಾಡುತ್ತಿದೆ. ಸಮಾಜದ ಸಮಸ್ಯೆಗಳಿಗೆ ಸ್ಪಂದಿಸಲು ಸಹ್ಯಾದ್ರಿ ಹಮ್ಮಿಕೊಳ್ಳುವ ಸಮುದಾಯ ತಲುಪುವ ಕಾರ್ಯಕ್ರಮಗಳು ವಿಶಿಷ್ಟವಾಗಿದ್ದು, ಇವು ವಿದ್ಯಾರ್ಥಿಗಳಲ್ಲಿ ಜವಾಬ್ದಾರಿ ಮತ್ತು ಮಾನವೀಯ ಮೌಲ್ಯಗಳನ್ನು ರೂಪಿಸುತ್ತದೆ ಎಂದರು.

ಸಹ್ಯಾದ್ರಿಯಲ್ಲಿ ಆರಂಭಿಸಲಾದ ಸೈನ್ಸ್ ಟ್ಯಾಲೆಂಟ್ ಹಂಟ್ ಮತ್ತು ಉದ್ಯಮಾಧಾರಿತ ಕಾರ್ಯಕ್ರಮಗಳನ್ನು ಸಚಿವರು ಪ್ರಶಂಸಿಸಿದರು. ಪದವೀಧರರಲ್ಲಿ ಕಂಡುಬರುತ್ತಿರುವ ಕೌಶಲ್ಯದ ಕೊರತೆಯ ಬಗ್ಗೆ ಕಳವಳ ವ್ಯಕ್ತಪಡಿಸಿದ ಅವರು, ಸಹ್ಯಾದ್ರಿಯ ಈ ಉದ್ಯಮ ಸಂಯೋಜಿತ ಕೇಂದ್ರಗಳು ಉದ್ಯಮ ಮತ್ತು ಶೈಕ್ಷಣಿಕ ವಲಯದ ನಡುವಿನ ಕಂದಕವನ್ನು ನೀಗಿಸಲು ಪ್ರಮುಖ ಪಾತ್ರ ವಹಿಸುತ್ತಿವೆ ಎಂದರು.

ಸಹ್ಯಾದ್ರಿಯು ಉದ್ಯಮ-ಸಂಯೋಜಿತ ಕಲಿಕೆ ಮತ್ತು ವಿದ್ಯಾರ್ಥಿಗಳಿಗೆ ಕಡ್ಡಾಯ ಕೌಶಲ್ಯ ಪ್ರಯೋಗಾಲಯಗಳನ್ನು ಪರಿಚಯಿಸುವ ಮೂಲಕ ಉದ್ಯಮ-ಶೈಕ್ಷಣಿಕ ನಡುವಿನ ಕಂದಕವನ್ನು ಮುಂಚಿತವಾಗಿಯೇ ಸರಿಪಡಿಸಿದೆ.

— ಮಂಜುನಾಥ್ ಭಂಡಾರಿ, ಸಹ್ಯಾದ್ರಿ ಸಂಸ್ಥೆಯ ಅಧ್ಯಕ್ಷರು