ಸಾಹಿತ್ಯ ಪರಿಷದ್ ಹಲ್ಮಿಡಿ ಘಟಕ ನಾಳೆ ಉದ್ಘಾಟನೆ

ಬೆಂಗಳೂರು: ರಾಷ್ಟ್ರೀಯ ಸಾಹಿತ್ಯ ಪ್ರಚಾರದ ಅಗ್ರಗಣ್ಯ ಸಂಸ್ಥೆಯಾಗಿರುವ ಅಖಿಲ ಭಾರತೀಯ ಸಾಹಿತ್ಯ ಪರಿಷದ್​ನ ಕರ್ನಾಟಕ ಘಟಕವು ಲಾಕ್​ಡೌನ್ ಅವಧಿಯಲ್ಲಿ ಆಧುನಿಕ ತಂತ್ರಜ್ಞಾನದ ಸದ್ಬಳಕೆ ಮೂಲಕ ಆನ್​ಲೈನ್​ನಲ್ಲೇ 50 ಹೊಸ ಘಟಕಗಳನ್ನು ಆರಂಭಿಸಿದ್ದು, ಇದೀಗ 51ನೇ ಘಟಕದ ಉದ್ಘಾಟನೆಗೆ ಸಜ್ಜಾಗಿದೆ.

5 ವರ್ಷಗಳ ಹಿಂದೆ ಆರಂಭಗೊಂಡ ಸಾಹಿತ್ಯ ಪರಿಷದ್​ನ ಕರ್ನಾಟಕ ಘಟಕ ರಾಜ್ಯದ ವಿವಿಧ ಜಿಲ್ಲೆಗಳಲ್ಲಿ 50 ಘಟಕಗಳೊಂದಿಗೆ ಕಾರ್ಯಾಚರಿಸುತ್ತಿತ್ತು. ಲಾಕ್​ಡೌನ್ ಅವಧಿಯಲ್ಲಿ 50 ಘಟಕಗಳ ಆರಂಭದೊಂದಿಗೆ ಇದೀಗ ಒಟ್ಟು ಘಟಕಗಳ ಸಂಖ್ಯೆ 100ಕ್ಕೇರಿದೆ. ಜೂ.20ರಂದು ಹಾಸನ ಜಿಲ್ಲೆಯ ಹಲ್ಮಿಡಿಯಲ್ಲಿ ಉದ್ಘಾಟನೆ ಆಗಲಿರುವುದು 101ನೇ ಘಟಕ.

ಅಭ್ಯಾಸ ವರ್ಗ: ವಿಭಾಗ ಸಂಚಾಲಕರು ಮತ್ತು ಘಟಕ ಸಂಚಾಲಕರ ಮುಂದಾಳತ್ವದಲ್ಲಿ ಸಂಪನ್ಮೂಲ ವ್ಯಕ್ತಿಗಳಿಂದ ವೆಬಿನಾರ್ ಮೂಲಕ ಪರಿಷದ್ ಅಭ್ಯಾಸ ವರ್ಗ ನಡೆಯುತ್ತಿದೆ. ರಾಷ್ಟ್ರೀಯ ಸಾಹಿತ್ಯದ ಸೃಷ್ಟಿ ಮತ್ತು ಪ್ರಚಾರ, ಸಾಹಿತ್ಯದ ಕಾರ್ಯಕರ್ತರು ಹೇಗಿರಬೇಕು, ಕಾರ್ಯಕರ್ತರನ್ನು ಮಾನಸಿಕವಾಗಿ ಸಿದ್ಧಗೊಳಿಸುವುದನ್ನು ಅಭ್ಯಾಸ ವರ್ಗದಲ್ಲಿ ತಿಳಿಸಲಾಗುತ್ತದೆ. ರಾಮನಗರದಲ್ಲಿ ಯುವ ಬರಹಗಾರರಿಗೆ ಒಂದು ವಾರದ ಅಭ್ಯಾಸ ವರ್ಗ ಈಗ ನಡೆಯುತ್ತಿದೆ. ಕಥಾ ಕಮ್ಮಟದಲ್ಲಿ 60 ಉತ್ಸಾಹಿಗಳು ಭಾಗವಹಿಸಿದ್ದಾರೆ. ಸಮಾಜಕ್ಕೆ ಎಂಥ ಕತೆಗಳು ಬೇಕು ಎನ್ನುವುದರ ವಿಮರ್ಶೆಯೂ ಇಲ್ಲಿ ನಡೆಯುತ್ತಿದೆ. ಜತೆಗೆ ಮೈಸೂರಿನಲ್ಲಿ ನಾಟಕ ಕಮ್ಮಟ ಮತ್ತು ದಾವಣಗೆರೆಯಲ್ಲಿ ಕಾವ್ಯ ಕಮ್ಮಟಕ್ಕೆ ಸಿದ್ಧತೆ ನಡೆಯುತ್ತಿವೆ.

ಹಲ್ಮಿಡಿಯಲ್ಲಿ ಸಾಹಿತ್ಯ ಸಂಧಾನ: ಕನ್ನಡದ ಮೊದಲ ಶಾಸನ ಪತ್ತೆಯಾದ ಹಾಸನ ಜಿಲ್ಲೆ ಹಲ್ಮಿಡಿ ಗ್ರಾಮದಲ್ಲಿ 51ನೇ ಘಟಕ ಶನಿವಾರ ಉದ್ಘಾಟನೆಗೊಳ್ಳಲಿದೆ. ಅ.ಭಾ.ಸಾ.ಪ. ರಾಷ್ಟ್ರೀಯ ಸಂಘಟನಾ ಕಾರ್ಯದರ್ಶಿ ಗ್ವಾಲಿಯರ್​ನ ಶ್ರೀಧರ ಪರಾಡಕರ ಉದ್ಘಾಟಿಸಲಿದ್ದಾರೆ. ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಋುಷಿಕುಮಾರ್ ಮಿಶ್ರ ಅಧ್ಯಕ್ಷತೆ ವಹಿಸಲಿದ್ದಾರೆ. ರಾಜ್ಯ ಘಟಕದ ಅಧ್ಯಕ್ಷ ಪ್ರೊ. ಪ್ರೇಮಶೇಖರ ಉಪಸ್ಥಿತರಿರುತ್ತಾರೆ.

https://www.vijayavani.net/vhp-announces-nationwide-campaign-for-boycotting-chinese-goods/