ಜಲ ಮೂಲಗಳನ್ನು ಸ್ವಚ್ಛಗೊಳಿಸಿ: ಆರ್‌ವಿ ದೇಶಪಾಂಡೆ ಸೂಚನೆ

ಹಳಿಯಾಳ: ಸ್ವಚ್ಚತೆಯೇ ದೇವರು ಎಂದು ಭಾವಿಸಿ ಗ್ರಾಮ, ಪಟ್ಟಣ ಹಾಗೂ ನಗರ ಪ್ರದೇಶಗಳಲ್ಲಿರುವ ಚರಂಡಿ, ಕೆರೆ ಕಟ್ಟೆಗಳು ಸೇರಿದಂತೆ ಜಲ ಮೂಲಗಳನ್ನು ಸ್ಚಚ್ಚಗೊಳಿಸಲು ಅಧಿಕಾರಿಗಳಿಗೆ  ಶಾಸಕರು ಹಾಗೂ ರಾಜ್ಯ ಆಡಳಿತ ಸುಧಾರಣಾ‌ ಆಯೋಗದ ಅಧ್ಯಕ್ಷ ಆರ್ ವಿ ದೇಶಪಾಂಡೆ ಸೂಚಿಸಿದರು.

ಪಟ್ಟಣದ ತಾಪಂ ಸಭಾ ಭವನದಲ್ಲಿ ಗುರುವಾರ ನಡೆದ  ಹಳಿಯಾಳ, ದಾಂಡೇಲಿ ಮತ್ತು ಜೋಯಿಡಾ ತಾಲೂಕುಗಳ ಅಧಿಕಾರಿಗಳ ಮುಂಗಾರು ಪೂರ್ವ ತಯಾರಿ ಸಭೆಯ ಅಧ್ಯಕ್ಷತೆಯನ್ನು ವಹಿಸಿ ಮಾತನಾಡಿದರು.

ಮಳೆಗಾಲವು ಅವಧಿ ಪೂರ್ವವೇ ಆರಂಭವಾಗಿದೆ. ಗ್ರಾಮೀಣ ಭಾಗಗಳಲ್ಲಿ ಸ್ವಚ್ಚತೆಯು ಮಾಯವಾಗಿದೆ. ಪಂಚಾಯತಿಗಳು ಅನೈರ್ಮಲ್ಯದಿಂದ ಕೂಡಿದ್ದು, ಪಿಡಿಓಗಳು ತಕ್ಷಣ ಕಾರ್ಯಪ್ರವೃತ್ತರಾಗುವುದರ ಮೂಲಕ ಸ್ವಚ್ಚತೆಯನ್ನು ಮಾಡಬೇಕಾಗಿದೆ. ಮಲಿನತೆಯಿಂದ ರೋಗಗಳು ಹರಡುವುದನ್ನು ತಡೆಯಬೇಕಾಗಿದೆ ಎಂದರು.

ರಸ್ತೆಗಳನ್ನು ಅತಿಕ್ರಮಿಸಿ ಕೆಲವು ಕಡೆಗಳಲ್ಲಿ ಶೆಡ್‌ಗಳನ್ನು ನಿರ್ಮಿಸಲಾಗಿದೆ. ಅಲ್ಲದೇ ಇಕ್ಕೆಲಗಳಲ್ಲಿ ಹುಲ್ಲು ಬೆಳೆದಿದ್ದು, ಇದರಿಂದ ವಾತಾವರಣವು ನೈರ್ಮಲ್ಯ ಕಳೆದುಕೊಂಡಿದ್ದು ಇದರ ಬಗ್ಗೆ ಗಂಭೀರತೆ ಹೊಂದಬೇಕಾಗಿದೆ ಎಂದು ಎಚ್ಚರಿಕೆ ನೀಡಿದ ಶಾಸಕರು  ಮುಂದಿನ ದಿನಗಳಲ್ಲಿ ಕೆಲವು ಗ್ರಾಮಗಳಿಗೆ ಆಕಸ್ಮಿಕ ಭೇಟಿ ನೀಡಿ ಪರಿಶೀಲಿಸುವುದಾಗಿ ಹೇಳಿದರು.

ಮಳೆಗಾಲ ಆರಂಭವಾಗಿದ್ದರಿಂದ ಸರ್ಕಾರಿ ನೌಕರರರು ಸ್ವಕ್ಷೇತ್ರವನ್ನು ಬಿಟ್ಟು ಬೇರೆಕಡೆ ತೆರಳುವಂತಿಲ್ಲ. ಸಾರ್ವಜನಿಕರಿಗೆ ಅವರ ಮನೆ ಮತ್ತು ಸುತ್ತಮುತ್ತಲಿನ ಪರಿಸರವನ್ನು ಸ್ವಚ್ಚಗೊಳಿಸಿಕೊಳ್ಳಲು ಅರಿವು ಮೂಡಿಸುವುದರ ಜೊತೆಗೆ ಕಸವನ್ನು ಸೂಕ್ತವಾಗಿ ವಿಲೇವಾರಿ ಮಾಡದವರ ಮೇಲೆ ದಂಡ ಪ್ರಯೋಗ ಮಾಡಲು ಸೂಚಿಸಿದರು.

ನಗರ ಪ್ರದೇಶಗಳಲ್ಲಿರುವ ಖಾಲಿ ನಿವೇಶನಗಳಲ್ಲಿ ಹುಲ್ಲು ಮತ್ತು ಕಸವು ಬೆಳೆದಿದ್ದು ಅದನ್ನು ತೆರವುಗೊಳಿಸಲು ನೋಟಿಸ್ ಜಾರಿ ಮಾಡಲು ನಿರ್ದೆಶನ ನೀಡಿದರು.

ಈ ಸಂದರ್ಭದಲ್ಲಿ ಪುರಸಭೆ ಅಧ್ಯಕ್ಷೆ ದ್ರೌಪದಿ ಅಗಸರ, ತಾಪಂ ಆಡಳಿತಾಧಿಕಾರಿ ಎಮ್.ನಾಗರಾಜು, ಹಳಿಯಾಳ ತಹಶೀಲದಾರ ಪ್ರವೀಣ ಹುಚ್ಚನ್ನವರ, ಇಒ ವಿಲಾಸರಾಜ್ ಪ್ರಸನ್ನ, ದಾಂಡೇಲಿಯ ಶೈಲೇಸ್ ಪರಮಾನಂದ, ಟಿ.ಎಸ್.ಹಾದಿಮನಿ, ಜೋಯಿಡಾದ ಮಂಜುನಾಥ ಮುನವಳ್ಳಿ, ಭಾರತಿ ಎನ್, ಪೌರಾಯುಕ್ತ ವಿವೇಕ ಬನ್ನೆ, ಮುಖ್ಯಾಧಿಕಾರಿ ಅಶೋಕ ಸಾಳೇನ್ನವರ, ಸಿಪಿಐ ಜಯಪಾಲ್ ಪಾಟೀಲ್, ಡಾ. ಅನಿಲಕುಮಾರ ಸೇರಿದಂತೆ ಮೂರು ತಾಲೂಕುಗಳ ಅಧಿಕಾರಿಗಳು ಸಭೆಯಲ್ಲಿದ್ದರು.