ವಿಜಯವಾಣಿ ಸುದ್ದಿಜಾಲ ಧಾರವಾಡ
ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ ಜನ್ಮದಿನ ಹಾಗೂ ಸ್ವಾತಂತ್ರ್ಯೋತ್ಸವ ನಿಮಿತ್ತ ಹುಬ್ಬಳ್ಳಿಯಿಂದ ನಂದಗಡವರೆಗೆ ಅಂತಾರಾಷ್ಟ್ರೀಯ ಮ್ಯಾರಾಥಾನ್ ಓಟಗಾರ ಮಲ್ಲಪ್ಪಾ ಪೂಜೇರಿ ಓಟ ನಡೆಸಲಿದ್ದಾರೆ ಎಂದು ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ ಅಭಿಮಾನಿ ಬಳಗದ ಅಧ್ಯಕ್ಷ ಸುರೇಶ ಗೋಕಾಕ ತಿಳಿಸಿದರು.
ನಗರದಲ್ಲಿ ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಆ. 14ರಂದು ರಾತ್ರಿ 1 ಗಂಟೆಗೆ ಹುಬ್ಬಳ್ಳಿ ಚನ್ನಮ್ಮವೃತ್ತದಿಂದ ನಂದಗಡವರೆಗೆ ಓಟ ನಡೆಸಲಿದ್ದಾರೆ. ಹುಬ್ಬಳ್ಳಿ, ಧಾರವಾಡ, ಕಿತ್ತೂರ, ಬೀಡಿ ಮಾರ್ಗವಾಗಿ ಆ. 15ರಂದು ಬೆಳಗ್ಗೆ 9 ಗಂಟೆಗೆ ನಂದಗಡ ತಲುಪಲಿದ್ದಾರೆ. ನಂತರ ಅಲ್ಲಿ ಸಭಾ ಕಾರ್ಯಕ್ರಮ ನಡೆಯಲಿದೆ ಎಂದರು.
ಸುಮಾರು 85 ಕಿ.ಮೀ ಮಾರ್ಗವನ್ನು 9 ಗಂಟೆಯಲ್ಲಿ ಕ್ರಮಿಸಲಿದ್ದಾರೆ. 9 ವರ್ಷಗಳಿಂದ ಈ ಓಟ ನಡೆಸುತ್ತಿದ್ದಾರೆ. ಸಂಗೊಳ್ಳಿ ರಾಯಣ್ಣ ಅಭಿಮಾನಿಗಳು ರಸ್ತೆ ಸುತ್ತ ಮಲ್ಲಪ್ಪ ಅವರಿಗೆ ಹುರುದುಂಬಿಸಲಿದ್ದಾರೆ. ಅಂತಾರಾಷ್ಟ್ರೀಯ ಮಟ್ಟದ ಓಟದಲ್ಲೂ ಸಾಧನೆ ಮಾಡಿರುವ ಮಲ್ಲಪ್ಪ ಅವರಿಗೆ ಜಿಲ್ಲಾ ಉಸ್ತುವಾರಿ ಸಚಿವ ಸಂತೋಷ ಲಾಡ್ ಅವರು ಕಾರ್ಮಿಕ ಇಲಾಖೆಯಲ್ಲಿ ಉದ್ಯೋಗ ನೀಡಿ ಆರ್ಥಿಕವಾಗಿ ಸಬಲರಾಗುವಂತೆ ಮಾಡಬೇಕು ಎಂದು ಆಗ್ರಹಿಸಿದರು.
ಅಶೋಕ ಹಾದಿಮನಿ, ಚನ್ನಪ್ಪ ಅಸುಂಡಿ, ಪ್ರವಿಣ ಗೋಕಾವಿ, ಮಲ್ಲಪ್ಪ ಪೂಜೇರಿ, ಇತರರು ಇದ್ದರು.
