ಬಿಯರ್​ ಮೇಲೆ 10-20 ರೂ.ಹೆಚ್ಚಳ: ಸದ್ಯದಲ್ಲೇ ಐಎಂಎಲ್​ ಲಿಕ್ಕರ್​ ದುಬಾರಿ?

ಬೆಂಗಳೂರು: ಹೊಸ ಆರ್ಥಿಕ ವರ್ಷ ಶುರುವಾಗಿ ತಿಂಗಳು ಮುಗಿಯುತ್ತಿರುವ ಬೆನ್ನಲ್ಲೇ ರಾಜ್ಯ ಸರ್ಕಾರ, ಬಿಯರ್​ ಪ್ರಿಯರರಿಗೆ ದರ ಏರಿಕೆ ಶಾಕ್​ ಕೊಟ್ಟಿದ್ದು, ಪ್ರತಿ ಬಾಟಲ್​ ಬಿಯರ್​ ಮೇಲೆ 10-20 ರೂ. ಹೆಚ್ಚಳ ಮಾಡಿದೆ.

ಅಲ್ಲದೆ, ಬಿಯರ್​ ಮೇಲಿನ ಎಇಡಿ ಏರಿಕೆ ಮೂಲಕ ಪರೋಕ್ಷವಾಗಿ ಐಎಂಎಲ್​ ಮಾರಾಟ ಹೆಚ್ಚಿಸಲು ಮುಂದಾಗಿದೆ. ಅಬಕಾರಿ ಇಲಾಖೆಯಿಂದ ಸರ್ಕಾರದ ಬೊಕ್ಕಸಕ್ಕೆ ಬರುವ ಆದಾಯದಲ್ಲಿ ಐಎಂಎಲ್​ ಸಿಂಹಪಾಲು ಹೊಂದಿವೆ. ಆದರೆ, ಬಿಯರ್​ ಮಾರಾಟದಿಂದ ಹೆಚ್ಚಿನ ಆದಾಯವಿಲ್ಲ. ಐಎಂಎಲ್​ ಮಾರಾಟ ಜಾಸ್ತಿಯಾದರೆ ದುಪ್ಪಟ್ಟು ಆದಾಯ ಬರುತ್ತದೆ. ಈ ಕಾರಣಕ್ಕೆ ಸರ್ಕಾರ, ಬಿಯರ್​ ಮಾರಾಟ ನಿರುತ್ತೇಜನಗೊಳಿಸಿ ಐಎಂಎಲ್​ ಮಾರಾಟ ಹೆಚ್ಚಳ ಪ್ರೋತ್ಸಾಹಿಸುತ್ತಿದೆ.

ಬಿಯರ್​ ಮೇಲಿನ ಹೆಚ್ಚುವರಿ ಅಬಕಾರಿ ಸುಂಕವನ್ನು (ಎಇಡಿ) ಶೇ.10ರಷ್ಟು ಹೆಚ್ಚಳ ಮಾಡಲು ನಿರ್ಧರಿಸಿದ ಸರ್ಕಾರ, ಈ ಸಂಬಂಧ ಕರಡು ಅಧಿಸೂಚನೆ ಹೊರಡಿಸಿದೆ. ಸಾರ್ವಜನಿಕರಿಗೆ ಆೇಪಣೆ ಸಲ್ಲಿಸಲು 7 ದಿನ ಕಾಲಾವಕಾಶ ನೀಡಿದೆ. ರಾಜ್ಯದಲ್ಲಿ ಸದ್ಯ ಬಿಯರ್​ ಮೇಲಿನ ಎಇಡಿಯು ಉತ್ಪಾದನಾ ವೆಚ್ಚದ ಶೇ.195ರಷ್ಟಿದೆ. ಇದೀಗ ಹೆಚ್ಚುವರಿ ಅಬಕಾರಿ ಸುಂಕವನ್ನು ಶೇ.205ಕ್ಕೆ ಹೆಚ್ಚಿಸುವ ಬಗ್ಗೆ ಅಧಿಸೂಚನೆಯಲ್ಲಿ ಉಲ್ಲೆಖಿಸಲಾಗಿದೆ. ಇದರೊಂದಿಗೆ ಪ್ರೀಮಿಯಂ ಅಥವಾ ಇತರೆ ಬಿಯರ್​ ಬ್ರ್ಯಾಂಡ್​​​ಗಳ ಬೆಲೆಯು ಉತ್ಪಾದನಾ ವೆಚ್ಚವನ್ನು ಅವಲಂಬಿಸಿ ಪ್ರತಿ ಬಾಟಲಿಗೆ ಸರಾಸರಿ 10ರಿಂದ 20 ರೂ. ಏರಿಕೆ ಆಗಬಹುದೆಂದು ಅಂದಾಜಿಸಲಾಗಿದೆ. ಒಟ್ಟಾರೆ ಎಇಡಿ ಹೆಚ್ಚಳದ ನಂತರ ಪ್ರೀಮಿಯಂ ಬ್ರ್ಯಾಂಡ್​​​ ಬಿಯರ್​ ದರ ಬಾಟಲಿಗೆ 10-20 ರೂ.ಏರಿಕೆಯಾಗಬಹುದು. ಮಧ್ಯಮ ಶ್ರೇಣಿಮತ್ತು ಅಗ್ಗದ ಸ್ಥಳಿಯ ಬ್ರ್ಯಾಂಡ್​​​ಬಿಯರ್​ ದರ 5 ರೂ.ವರೆಗೆ ಏರಿಕೆಯಾಗುವ ಸಾಧ್ಯತೆಯಿದೆ. ಬೆಲೆ ಏರಿಕೆಯು ಬ್ರ್ಯಾಂಡ್​​​ನಿಂದ ಬ್ರ್ಯಾಂಡ್​​​ಗೆ ವ್ಯತ್ಯಾಸವಾಗಲಿದೆ. ಆಲ್ಕೋಹಾಲ್​ ಪ್ರಮಾಣ ಹೆಚ್ಚಿರುವ ಬ್ರ್ಯಾಂಡ್​​​ ಬಿಯರ್​ ಬೆಲೆಯು ಗಣನೀಯವಾಗಿ ಏರಿಕೆಯಾಗಲಿದೆ ಎಂದು ಅಬಕಾರಿ ಇಲಾಖೆ ಮೂಲಗಳು ತಿಳಿಸಿವೆ.

3ನೇ ಬಾರಿಗೆ ದರ ಏರಿಕೆ: ಕರಡು ಅಧಿಸೂಚನೆಯಲ್ಲಿನ ಪ್ರಸ್ತಾವಿತ ಎಇಡಿ ಹೆಚ್ಚಳದೊಂದಿಗೆ 2 ವರ್ಷಗಳ ಅವಧಿಯಲ್ಲಿ ಬಿಯರ್​ ಮೇಲಿನ ತೆರಿಗೆಯನ್ನು 4ನೇ ಬಾರಿಗೆ ಏರಿಕೆ ಮಾಡಿದಂತಾಗಲಿದೆ. 2023ರ ಜುಲೈನಲ್ಲಿ ಕಾಂಗ್ರೆಸ್​ ಸರ್ಕಾರ ಹೆಚ್ಚುವರಿ ಅಬಕಾರಿ ಸುಂಕವನ್ನು ಶೇ.175ರಿಂದ ಶೇ.185ಕ್ಕೆ ಹೆಚ್ಚಿಸಿತ್ತು. ನಂತರ 2025ರ ಜ.20ರಂದು ಬಜೆಟ್​ಗೂ ಮುನ್ನವೇ ಮತ್ತೊಮ್ಮೆ ಎಇಡಿ ಪರಿಷ್ಕರಣೆ ಮಾಡಲಾಗಿತ್ತು. ಆಗ ಹೆಚ್ಚುವರಿ ಅಬಕಾರಿ ಸುಂಕವನ್ನು ಶೇ.185ರಿಂದ ಶೇ.195ಕ್ಕೆ (ಪ್ರತಿ ಬಲ್ಕ್​ ಲೀಟರ್​ಗೆ ರೂ.130ರವರೆಗೆ) ಹೆಚ್ಚಿಸಲಾಗಿತ್ತು. ಇದೀಗ ಸರಕಾರಕ್ಕೆ ಮೂರನೇ ಬಾರಿಗೆ ತೆರಿಗೆ ಹೆಚ್ಚಳ ಮಾಡಲು ಮುಂದಾಗಿದೆ. ಮೂಲ ಅಬಕಾರಿ ಸುಂಕವನ್ನು ಸಹ ಪರಿಷ್ಕರಿಸಲಾಗಿದೆ. ರೇಟ್​ ಬದಲಿಗೆ, ಆಲ್ಕೋಹಾಲ್​ ಪ್ರಮಾಣವನ್ನು ಆಧರಿಸಿದ ಶ್ರೇಣಿಕೃತ ವ್ಯವಸ್ಥೆಯನ್ನು ಪರಿಚಯಿಸಲಾಗಿದೆ. ಶೇ.5 ಅಥವಾ ಅದಕ್ಕಿಂತ ಕಡಿಮೆ ಆಲ್ಕೋಹಾಲ್​ ಪ್ರಮಾಣ ಹೊಂದಿರುವ ಬಿಯರ್​ಗೆ ಪ್ರತಿ ಬಲ್ಕ್​ ಲೀ.ಗೆ 12 ರೂ. ಮತ್ತು ಶೇ.5ರಿಂದ ಶೇ.8ರಷ್ಟು ಆಲ್ಕೋಹಾಲ್​ ಹೊಂದಿರುವ ಬಿಯರ್​ಗೆ 20 ರೂ. ನಿಗದಿಪಡಿಸಲಾಗಿದೆ.

ಆಲ್ಕೋಹಾಲ್​ ಪ್ರಮಾಣಕ್ಕೆ ತಕ್ಕಂತೆ ಎಇಡಿ: ಹಿಂದೆ ರಾಜ್ಯದಲ್ಲಿ ಬಿಯರ್​ಗೆ 2 ಹಂತದ ಎಇಡಿ ವ್ಯವಸ್ಥೆಯಿತ್ತು. ಕೆಳ ಹಂತದ ಬ್ರ್ಯಾಂಡ್​​ಗಳ ಬಿಯರ್​ ಲೀಟರ್​ಗೆ 130 ರೂ.ವರೆಗೆ ತೆರಿಗೆ ವಿಧಿಸಲಾಗುತ್ತಿತ್ತು. ಇತರೆ ಬ್ರ್ಯಾಂಡ್​​ಗಳ ಬಿಯರ್​ಗೆ ಶೇಕಡಾವಾರು ತೆರಿಗೆ ವಿಧಿಸಲಾಗುತ್ತಿತ್ತು. ಈ ತೆರಿಗೆ ವ್ಯವಸ್ಥೆಯನ್ನು ರದ್ದುಗೊಳಿಸಲಾಗಿದ್ದು, ಎಲ್ಲ ಬ್ರ್ಯಾಂಡ್ ಬಿಯರ್​ಗೆ ಏಕರೂಪದ ಶೇ.195ರಷ್ಟು ತೆರಿಗೆ ನಿಗದಿಪಡಿಸಲಾಗಿದೆ. ಸರ್ಕಾರ ಮದ್ಯಗಳ ಮೇಲಿನ ತೆರಿಗೆ ವ್ಯವಸ್ಥೆಯನ್ನು ಸರಳಗೊಳಿಸುವ ಗುರಿಯೊಂದಿಗೆ ನೆರೆಯ ರಾಜ್ಯಗಳಲ್ಲಿನ ಮದ್ಯದ ಬೆಲೆಗೆ ಅನುಗುಣವಾಗಿ ದೇಶೀಯ ಮದ್ಯಗಳು (ಐಎಂಎಲ್​) ಹಾಗೂ ಬಿಯರ್ ​ಸ್ಲ್ಯಾಬ್​ಗಳನ್ನು ಇತ್ತೀಚೆಗೆ ಪರಿಷ್ಕರಿಸಿತ್ತು. ಬಿಯರ್​ ಮೇಲಿನ ಎಇಡಿಯನ್ನು ಆಲ್ಕೋಹಾಲ್​ ಪ್ರಮಾಣಕ್ಕೆ ತಕ್ಕಂತೆ ನಿಗದಿಪಡಿಸಿತ್ತು. ಕಡಿಮೆ ತೆರಿಗೆ ಶ್ರೇಣಿಯನ್ನು ತೆಗೆದು ಹಾಕುವುದರೊಂದಿಗೆ ಎಲ್ಲಾ ಬ್ರ್ಯಾಂಡ್​​​ ಬಿಯರ್​ಗೆ ಒಂದೇ ರೀತಿಯ ತೆರಿಗೆ ವಿಧಿಸುವ ವ್ಯವಸ್ಥೆ ಜಾರಿಗೊಳಿಸಿತ್ತು.

https://www.vijayavani.net/caste-census-cm-siddaramaiah-welcomes-central-governments-decision