ಹಫ್ತಾ ನೀಡಿಲ್ಲವೆಂದು ಮೀನು ವ್ಯಾಪಾರಿ ಮೇಲೆ ಲಾಂಗ್ ಬೀಸಿದ ಪುಡಿ ರೌಡಿ ಸೆರೆ…

ಬೆಂಗಳೂರು: ಮೀನಿನ ವ್ಯಾಪಾರಿ ಬಳಿ ಹಫ್ತಾ ವಸೂಲಿಗೆ ಲಾಂಗ್ ಬೀಸಿ ಹಲ್ಲೆಗೆ ಯತ್ನಿಸಿದ ಆರೋಪಿಯನ್ನು ಬಾಣಸವಾಡಿ ಪೊಲೀಸರು ಬಂಧಿಸಿದ್ದಾರೆ.

ಬಾಣಸವಾಡಿ ನಿವಾಸಿ ಸುದೇಶ್ ಬಂಧಿತ ವ್ಯಕ್ತಿ. ಬಾಣಸವಾಡಿಯ ಜೈಭಾರತನಗರದಲ್ಲಿ ಮನೋಜ್ ಎಂಬುವವರು ಮೀನಿನ ಅಂಗಡಿ ಇಟ್ಟುಕೊಂಡಿದ್ದರು. ಇಲ್ಲಿಗೆ ಡಿ.17ರ ಮಧ್ಯಾಹ್ನ ಬಂದ ಸುದೇಶ್, ಹಫ್ತಾ ಕೊಡುವಂತೆ ಕೇಳಿದ್ದಾನೆ. ಆದರೆ ಮೀನು ವ್ಯಾಪಾರಿ ಪುಡಿ ರೌಡಿ ಮಾತಿಗೆ ಬೆಲೆ ಕೊಟ್ಟಿರಲಿಲ್ಲ.

ಅಷ್ಟಕ್ಕೆ ಸಿಟ್ಟಾದ ಆರೋಪಿ, ಎಲ್ಲಿಂದಲೋ ಬಂದು ಇಲ್ಲಿ ವ್ಯಾಪಾರ ಮಾಡುತ್ತಿದ್ದೀಯಾ, ಹಣ ಕೊಡೋದಿಲ್ವಾ? ಎಂದು ಪ್ರಾಣ ಬೆದರಿಕೆ ಒಡ್ಡಿ ಹೋಗಿದ್ದ. ಮತ್ತೆ ಸಂಜೆ ಬಂದ ಸುದೇಶ್, ಲಾಂಗ್ ಹಿಡಿದು ಬಂದು ಮನೋಜ್ ಮೇಲೆ ಹಲ್ಲೆಗೆ ಯತ್ನಿಸಿದ್ದಾನೆ. ತಪ್ಪಿಸಿಕೊಂಡ ಮನೋಜ್ ಅಂಗಡಿ ಒಳಗೆ ಬಂದಿದ್ದ. ಲಾಂಗ್‌ನಿಂದ ಅಂಗಡಿ ಮುಂದಿಟ್ಟಿದ್ದ ಕೆಲ ವಸ್ತುಗಳಿಗೆ ಹಾನಿ ಮಾಡಿದ ಸುದೇಶ್, ಪೊಲೀಸರಿಗೆ ಏನಾದರು ದೂರು ನೀಡಿದರೆ ಸುಮ್ಮನೆ ಬಿಡಲ್ಲ ಎಂದು ಪ್ರಾಣ ಬೆದರಿಕೆ ಒಡ್ಡಿ ಹೋಗಿದ್ದ.

ಈ ಎಲ್ಲ ದೃಶ್ಯಾವಳಿ ಅಂಗಡಿ ಸಿಸಿ ಕ್ಯಾಮರಾದಲ್ಲಿ ಸೆರೆಯಾಗಿತ್ತು. ಅದರ ವಿಡಿಯೋ ಜಾಲತಾಣದಲ್ಲಿ ವೈರಲ್ ಆಗುತ್ತಿದಂತೆ ಎಚ್ಚೆತ್ತ ಪೊಲೀಸರು ಅಂಗಡಿ ಮಾಲೀಕ ಮನೋಜ್‌ನನ್ನು ಸಂಪರ್ಕ ಮಾಡಿ ದೂರು ಪಡೆದಿದ್ದಾರೆ. ನಂತರ ಕೆಲವೇ ನಿಮಿಷಗಳಲ್ಲಿ ಆರೋಪಿಯನ್ನೂ ಬಂಧಿಸಿ ವಿಚಾರಣೆಗೆ ಒಳಪಡಿಸಲಾಗಿದೆ. ಪ್ರಕರಣದ ಬಗ್ಗೆ ಪೂರ್ವ ವಿಭಾಗ ಡಿಸಿಪಿ ಡಾ.ಭೀಮಾಶಂಕರ್ ಗುಳೇದ್ ಮಾಹಿತಿ ನೀಡಿದ್ದಾರೆ. ಸದ್ಯ ಬಾಣಸವಾಡಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

https://www.vijayavani.net/woman-kills-herself-after-1-month-of-her-husband-sucide-incident/

https://www.vijayavani.net/car-prices-to-hike-in-2023/