ದೊಡ್ಡಬಳ್ಳಾಪುರದಲ್ಲಿ ರಾಬರಿ ಗ್ಯಾಂಗ್​

ದೊಡ್ಡಬಳ್ಳಾಪುರ : ದೊಡ್ಡಬಳ್ಳಾಪುರದಲ್ಲಿ ರಾಬರಿ ಗ್ಯಾಂಗ್​ ಸಕ್ರಿಯವಾಗಿದ್ದು, ಜನರು ಬೆಚ್ಚಿಬಿದ್ದಿದ್ದಾರೆ. ರಾತ್ರಿ ಊಟ ಮುಗಿಸಿ, ಟಿವಿ ಧಾರಾವಾಹಿ ಅಥವಾ ಮನರಂಜನೆ ನೋಡಿ, ಗಾಢ ನಿದ್ರೆಗೆ ಜಾರಿದ ನಂತರ ನಡುರಾತ್ರಿ ಎರಡು ಗುಂಪುಗಳಲ್ಲಿ ಕಳ್ಳರ ಓಡಾಟ ಶುರುವಾಗಿದ್ದು, ಮುಖಕ್ಕೆ ಮಾಸ್ಕ್​, ತಲೆಗೆ ಟೋಪಿ, ಕೈಗಳಿಗೆ ಗವಸು, ಹೆಗಲ ಮೇಲೊಂದು ಬ್ಯಾಗ್​ ಏರಿಸಿಕೊಂಡು ಲಾಂಗ್​, ಮಚ್ಚು ಕಬ್ಬಿಣದ ರಾಡ್​, ಕಲ್ಲುಗಳನ್ನು ಹಿಡಿದು ರಾಜಾರೋಷವಾಗಿ ಮನೆಗಳ ಗೇಟ್​ ತೆಗೆಯುವುದು, ಕಾಂಪೌಡ್​ ಹತ್ತುವುದು, ಕಿಟಕಿಗಳಲ್ಲಿ ಬಗ್ಗಿ ನೋಡುವ ದೃಶ್ಯ ಸಿಸಿ ಕ್ಯಾಮರಾಗಳಲ್ಲಿ ಸೆರೆಯಾಗಿದೆ.

ನಗರದ ಅಂಚಿನಲ್ಲಿರುವ ನಿಜಗಲ್​, ನಂದಿ ಲೇಔಟ್​, ಯೋಗಿ ನಾರೇಯಣ ಬಡಾವಣೆ ಸುತ್ತಮುತ್ತಲಿರುವ ಪ್ರದೇಶಗಳಲ್ಲಿ ಮಂಗಳವಾರ ರಾತ್ರಿ ಕಳ್ಳರ ಚಲನವಲನ ಹಲವು ಮನೆಗಳ ಸಿಸಿ ಕ್ಯಾಮರಾಗಳಲ್ಲಿ ಸೆರೆಯಾಗಿದೆ. ಖದೀಮರ ಭಯಾನಕ ದೃಶ್ಯ ಕಂಡ ನಿವಾಸಿಗಳು ಭಯಭೀತರಾಗಿದ್ದಾರೆ. ಮಂಗಳವಾರ ಮಧ್ಯರಾತ್ರಿ ಸುಮಾರು 12.45ರಲ್ಲಿ ಆರಂಭವಾದ ಕಳ್ಳರ ಸಂಚಾರ ಬೆಳಗಿನ ಜಾವ 3 ಗಂಟೆವರೆಗೆ ಮುಂದುವರಿದಿದ್ದು, ವಿವಿಧ ಮನೆಗಳ ಸಿಸಿ ಕ್ಯಾಮರಾಗಳಲ್ಲಿ ಸೆರೆಯಾಗಿದೆ.

ಬೀಟ್​ ಪೊಲೀಸ್​ ನಿಯೋಜಿಸಲಿ: ಮಂಗಳವಾರ ರಾತ್ರಿ ನಡೆದ ಟನೆಯಿಂದ ಭಯಭೀತರಾಗಿದ್ದೇವೆ. ಜೀವ ಭಯದಲ್ಲಿ ರಾತ್ರಿ ಕಳೆಯಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ಜನಸ್ನೇಹಿ ಪೊಲೀಸ್​ ವ್ಯವಸ್ಥೆ ಬಲಪಡಿಸಲು ರಾಜ್ಯ ಪೊಲೀಸ್​ ಇಲಾಖೆ ಮನೆ&ಮನೆಗೆ ಪೊಲೀಸ್​ ಕಾರ್ಯಕ್ರಮ ಹಮ್ಮಿಕೊಂಡಿದೆ. ಆದರೆ, ಇದು ನೆಪ ಮಾತ್ರಕ್ಕೆ ಎಂಬಂತೆ ಇದೆ. ನಮ್ಮ ಏರಿಯಾದ ಮನೆಗಳಿಗೆ ಯಾವೊಬ್ಬ ಪೊಲೀಸ್​ ಸಿಬ್ಬಂದಿ, ಅಧಿಕಾರಿಗಳು ಬಂದು ನಮ್ಮ ಸಮಸ್ಯೆ ಆಲಿಸಿಲ್ಲ. ಬೀಟ್​ ಕಾನ್​ಸ್ಟೆಬಲ್​ಗಳು, ಇನ್​ಸ್ಪೆಕ್ಟರ್​ಗಳು ಮತ್ತು ಪೊಲೀಸ್​ ಸ್ವಯಂ ಸೇವಕರು ಸಕ್ರಿಯವಾಗಿ ಭಾಗವಹಿಸಿ, ನಿಯಮಿತವಾಗಿ ಮನೆಗಳಿಗೆ ಭೇಟಿ ನೀಡಿ ಸ್ಥಳಿಯ ಸಮಸ್ಯೆ ಕೇಳುತ್ತಿಲ್ಲ ಎಂದು ನಿಜಗಲ್​ ನಿವಾಸಿ ಸೋಮಣ್ಣ ಆರೋಪಿಸಿದ್ದಾರೆ.

ಕಳ್ಳರ ಕಾಟದಿಂದ ನೆಮ್ಮದಿ ಇಲ್ಲ : ಕಳ್ಳರ ಕಾಟದಿಂದ ನಾವು ಮನೆಗಳಲ್ಲಿ ನೆಮ್ಮದಿಯಿಂದ ಇರಲು ಸಾಧ್ಯವಾಗುತ್ತಿಲ್ಲ. ಪ್ರತಿದಿನ ಜೀವಭಯದಲ್ಲಿ ಜೀವನ ಸಾಗಿಸುತ್ತಿದ್ದೇವೆ. ನಗರ ಹಾಗೂ ಗ್ರಾಮಾಂತರ ಪೊಲೀಸ್​ ಠಾಣೆಗಳ ಕೂಗಳತೆ ದೂರದಲ್ಲಿರುವ ನಮ್ಮ ಮನೆಗಳ ಬಳಿ ಕಳ್ಳರು ಓಡಾಡುತ್ತಿದ್ದಾರೆ. ನಾವು ವಾಸ ಮಾಡುತ್ತಿರುವ ಏರಿಯಾಗಳ ಖಾಲಿ ಜಾಗಗಳು ಕುಡುಕರ ತಾಣವಾಗಿವೆ. ಇಲ್ಲಿ ಹೇಳೋರು ಕೇಳೋರು ಯಾರೂ ಇಲ್ಲ. ನಮಗೆ ಪೊಲೀಸರ ಸೂಕ್ತ ರಕ್ಷಣೆ ಅತ್ಯವಶ್ಯಕವಾಗಿದೆ. ಕೂಡಲೇ ಪೊಲೀಸ್​ ಬೀಟ್​ ಹೆಚ್ಚಿಸಬೇಕು. ಕಳ್ಳರ ಹೆಡೆಮುರಿಕಟ್ಟಿ ಇನ್ನು ಮುಂದೆ ಇಂತಹ ಟನೆಗಳು ಮರುಕಳಿಸದಂತೆ ಪೊಲೀಸರು ಎಚ್ಚರ ವಹಿಸಬೇಕು ಎಂದು ಯೋಗಿ ನಾರಾಯಣ ಬಡಾವಣೆ ನಿವಾಸಿ ಗೌರಮ್ಮ ಒತ್ತಾಯಿಸಿದ್ದಾರೆ.