ಅಲ್ಲಲ್ಲಿ ಏರು ತಗ್ಗು, ಸರಾಗವಾಗಿ ಹರಿಯದ ನೀರು, ವಾರ್ಡುಗಳಲ್ಲಿ ಪರಸ್ಪರ ಒಂದಕ್ಕೊಂದು ಲಿಂಕ್ ಇಲ್ಲದಿರುವಿಕೆ, ತುಂಬಿ ತುಳುಕಾಡುವ ತ್ಯಾಜ್ಯ. ಇದು ನಾನಾ ಕಡೆ ಚರಂಡಿಗಳ ದುಸ್ಥಿತಿಯ ಪರಿಸ್ಥಿತಿ. ಪ್ರಸ್ತುತ ಮುಂಗಾರಿನಲ್ಲಿ ಆಗಾಗ ಮಳೆ ಸುರಿಯುತ್ತಿದೆ. ಇದೇ ವೇಳೆ ಚರಂಡಿಗಳ ಬದಲಿಗೆ ರಸ್ತೆಯ ಮೇಲೆ ನೀರು ಹರಿಯುತ್ತಿದೆ. ದೊಡ್ಡ ದೊಡ್ಡ ಚರಂಡಿಗಳು ನಿಂತುಕೊಂಡಿರುವ ಕೊಳಚೆ ನೀರಿನಿಂದ ತುಂಬಿವೆ. ಇದರ ನಡುವೆ ಇಂದಿರಾನಗರದಿಂದ ವಾಪಸಂದ್ರದ ಬೈಪಾಸ್ ಕಡೆಗೆ ಹೋಗುವ, ಎಂ.ಜಿ.ರಸ್ತೆಯಲ್ಲಿ ಬಾಲಕಿಯರ ಹಾಸ್ಟೆಲ್- ನಗರ ಪೊಲೀಸ್ ಠಾಣೆಯ ಮಾರ್ಗದ ದೊಡ್ಡ ಚರಂಡಿಯಲ್ಲಿ ವಾರ್ಡಿನ ಸದಸ್ಯರು ಮುಂಜಾಗ್ರತಾ ಕ್ರಮವಾಗಿ ತ್ಯಾಜ್ಯವನ್ನು ತೆರವುಗೊಳಿಸಿ, ನೀರು ಸರಾಗವಾಗಿ ಹರಿಯುವಂತೆ ಮಾಡಿದ್ದಾರೆ. ಉಳಿದಂತೆ ಲಕ್ಕಮ್ಮ ದೊಡ್ಡ ಮುನಿಯಪ್ಪ ಕಲ್ಯಾಣ ಮಂಟಪ, ಕೊರಚರಪೇಟೆ, ಸಾಧುಮಠ ರಸ್ತೆಯಲ್ಲಿ ಚರಂಡಿಗಳು ಮತ್ತು ವಾಪಸಂದ್ರ ಹಾಲಿನ ಡೈರಿ ಸಮೀಪದ ರಾಜಕಾಲುವೆಯಲ್ಲಿನ ತುಂಬಿ ತುಳುಕಾಡುವ ತ್ಯಾಜ್ಯ, ಕೊಳಚೆ ನೀರಿನಿಂದ ದುರ್ವಾಸನೆ ಹರಡುತ್ತಿರುತ್ತದೆ.
