ದಿನಂಪ್ರತಿ ನೂರಾರು ವಾಹನ ಸಂಚರಿಸುವ ಈ ರಸ್ತೆಯನ್ನು ಕೃಷಿಕರು, ವಿದ್ಯಾರ್ಥಿಗಳು ಸೇರಿ ಸಾರ್ವಜನಿಕರು ಬಳಸುತ್ತಿದ್ದಾರೆ. ಮಳೆಗಾಲದಲ್ಲಿ ಈ ರಸ್ತೆ ಪರಿಸ್ಥಿತಿ ಸಂಪೂರ್ಣ ಹದಗೆಟ್ಟು, ವಾಹನ ಸಂಚಾರ ಬಿಡಿ ಜನರು ನಡೆದು ಹೋಗಲೂ ದುಸ್ತರವಾಗುತ್ತದೆ. 40 ವರ್ಷಗಳಿಂದ ಈ ರಸ್ತೆಯನ್ನು ಅಭಿವೃದ್ಧಿಪಡಿಸದ ಹಿನ್ನೆಲೆಯಲ್ಲಿ ಸ್ಥಳೀಯರು ಸೇರಿ ‘ರಸ್ತೆ ಇಲ್ಲ, ಮತ ಇಲ್ಲ’ ಎಂಬ ಅಭಿಯಾನ ನಡೆಸಿದ್ದ ವೇಳೆ ರಾಜಕೀಯ ಪ್ರಮುಖರು ಭರವಸೆ ನೀಡಿದ್ದು ಬಿಟ್ಟರೆ ಯಾವುದೇ ಪ್ರಯೋಜನವಾಗಿಲ್ಲ. ಬಳಿಕ ದ.ಕ. ಜಿಲ್ಲಾಧಿಕಾರಿಗಳಿಗೆ, ಪುತ್ತೂರಿನ ಉಪ ಆಯುಕ್ತರಿಗೆ, ಕಡಬ ತಹಸೀಲ್ದಾರ್ಗೆ, ಪಟ್ಟಣ ಪಂಚಾಯಿತಿ ಮುಖ್ಯಾಧಿಕಾರಿ, ಚುನಾವಣೆಗಳ ಸಂದರ್ಭ ಚುನಾವಣಾಧಿಕಾರಿಗಳಿಗೂ ದೂರು ನೀಡಲಾಗಿತ್ತು. ಆದರೆ ದೂರನ್ನು ಯಾರೊಬ್ಬರೂ ಗಂಭೀರವಾಗಿ ಪರಿಗಣಿಸಿಲ್ಲ. ಅಧಿಕಾರಿಗಳು ಸೇರಿದಂತೆ ಜಿಲ್ಲಾಧಿಕಾರಿಯವರು ರಸ್ತೆ ಸರಿಪಡಿಸುವ ಭರವಸೆ ನೀಡಿದರೂ ಅನುದಾನ ಇಲ್ಲ ಎಂಬ ಕಾರಣ ಹೇಳಿಕೊಂಡು ರಸ್ತೆ ಅಭಿವೃದ್ಧಿ ಕಾಮಗಾರಿ ಇನ್ನೂ ನಡೆದಿಲ್ಲ.
