ಮೂಡುಬಿದಿರೆ ಕೇಂದ್ರ ಸ್ಥಳದಿಂದ ಸುಮಾರು 400 ಮೀ. ಅಂತರವಿರುವ ಈ ಪ್ರದೇಶದಲ್ಲಿ ಐದು ವಸತಿ ಸಮುಚ್ಛಯಗಳು, ಹತ್ತಕ್ಕೂ ಅಧಿಕ ಮನೆಗಳಿವೆ. ದಿನಾಲೂ ನೂರಾರು ಮಂದಿ ಓಡಾಡುತ್ತಾರೆ. ಕಾರು, ದ್ವಿಚಕ್ರ ವಾಹನಗಳು, ಶಾಲಾ - ಕಾಲೇಜು ಬಸ್ಗಳು ಈ ಪ್ರದೇಶದಲ್ಲಿ ಓಡಾಡುತ್ತಿರುತ್ತವೆ. ಆದರೆ ಕಳಪೆ ಕಾಮಗಾರಿಯಿಂದಾಗಿ ಚರಂಡಿಯ ಬದಿಗೆ ಬರುವ ಕಾರುಗಳು, ಸಿಮೆಂಟ್ ಸ್ಲ್ಯಾಬ್ ಗಳಿಗೆ ಹೂತು ಹೋಗಿ ಜಖಂಗೊಂಡಿರುವ ಹಲವು ಘಟನೆಗಳು ಇಲ್ಲಿ ನಡೆದಿವೆ. ದ್ವಿಚಕ್ರ ವಾಹನಗಳು ಕೂಡ ಚರಂಡಿಯೊಳಗೆ ಬಿದ್ದಿವೆ. ಸ್ಥಳೀಯರು ಈ ಕುರಿತು ಪುರಸಭೆಗೆ ಮಾಹಿತಿ ನೀಡಿದರೂ, ಸಾಮಾಜಿಕ ಜಾಲತಾಣಗಳಲ್ಲಿ ನಿರಂತರವಾಗಿ ಈ ಕುರಿತು ಪೋಸ್ಟ್ ಹಾಕಿದ್ದರೂ, ಪುರಸಭೆ ಆಡಳಿತ ಈ ಬಗ್ಗೆ ಸೂಕ್ತ ಕ್ರಮ ಕೈಗೊಂಡಿಲ್ಲ. ಪುರಸಭೆಯ ಈ ಕಳಪೆ ಕಾಮಗಾರಿ ವಾಹನ ಸವಾರರಿಗೆ ಹಾಗೂ ಪಾದಚಾರಿಗಳಿಗೂ ಅಪಾಯಕಾರಿಯಾಗಿ ಅವಘಡಗಳಿಗೆ ಆಹ್ವಾನ ನೀಡುತ್ತಿದೆ.
