ಬನಹಳ್ಳಿಯಲ್ಲಿ ಭಾರಿ ಶಬ್ದದೊಂದಿಗೆ ಸ್ಫೋಟಗೊಂಡ ರಸ್ತೆ

ಆನೇಕಲ್​: ಚಂದಾಪುರ ಸಮೀಪದ ಬನಹಳ್ಳಿಯಲ್ಲಿ ರಸ್ತೆ ಸ್ಫೋಟಗೊಂಡು ಆತಂಕ ಸೃಷ್ಟಿಸಿದೆ. ಸೋಮವಾರ ಮಧ್ಯಾಹ್ನದ ಸುಮಾರಿಗೆ ಕಾಂಕ್ರೀಟ್​ ರಸ್ತೆ ಭಾರಿ ಶಬ್ದದೊಂದಿಗೆ ಸ್ಫೋಟಗೊಂಡಿದೆ. ರಸ್ತೆಯ ಸಿಮೆಂಟ್​ ಹಾಗೂ ಜಲ್ಲಿ ಕಲ್ಲುಗಳು ಕಿತ್ತು ಬಂದಿದ್ದು, ಸುಮಾರು ನೂರು ಮೀಟರ್​ ದೂರಕ್ಕೆ ಅವಶೇಷ ಹಾರಿದೆ. ಸ್ಫೋಟದ ಜತೆ ಬೆಂಕಿ ಕಿಡಿ ಕೂಡ ಕಾಣಿಸಿಕೊಂಡಿದೆ. ಸ್ಫೋಟಕ್ಕೆ ಕೆಲವೇ ಕ್ಷಣದ ಮೊದಲು ವಾಟರ್​ ಟ್ಯಾಂಕರ್​ ವಾಹನ ಹಾದು ಹೋಗಿತ್ತು, ಮುಂದಕ್ಕೆ ಟ್ಯಾಂಕರ್​ ಸಾಗುತ್ತಿದ್ದಂತೆ ಸ್ಫೋಟಗೊಂಡಿದೆ ಎಂದು ಪ್ರತ್ಯಕ್ಷ ದರ್ಶಿಗಳು ತಿಳಿಸಿದ್ದಾರೆ.

ವಿದ್ಯುತ್​ ತಂತಿ ಕಾರಣ: ರಸ್ತೆ ಮೇಲೆ ಹಾದು ಹೋಗಿರುವ 220 ಕೆವಿ ಹೈವೋಲ್ಟೆಜ್​ ವಿದ್ಯುತ್​ ತಂತಿಯಿಂದಾಗಿ ಈ ಅವಡ ಸಂಭವಿಸಿದೆ ಎಂದು ಚಂದಾಪುರ ಕೆಪಿಟಿಸಿಎಲ್​ ಜೆಇ ಮಹೇಶ್​ ತಿಳಿಸಿದ್ದಾರೆ.

220 ಕೆವಿ ವಿದ್ಯುತ್​ ತಂತಿ ಕೆಳಗೆ ಜೋತು ಬಿದ್ದಿದ್ದು, ಅದರ ಕೆಳಗೆ ಎತ್ತರದ ವಾಹನ ಹಾದು ಹೋದರೆ ಅರ್ಥಿಂಗ್​ ಜೋನ್​ಗೆ ಾಲ್ಟ್​ ಕರೆಂಟ್​ ನುಗ್ಗಿ ಸ್ಫೋಟಗೊಳ್ಳುವ ಸಾಧ್ಯತೆ ಹೆಚ್ಚಿರುತ್ತದೆ. ಸ್ಫೋಟ ಆಗುತ್ತಿದ್ದಂತೆ ಲೈನ್​ ಟ್ರಿಪ್​ ಆಗಿದೆ. ಹಾಗಾಗಿ ಸ್ಫೋಟದಿಂದ ಯಾರಿಗೂ ತೊಂದರೆ ಆಗಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಯಾರಂಡಹಳ್ಳಿಯಿಂದ ತಮಿಳುನಾಡಿಗೆ ವಿದ್ಯುತ್​ ಪೂರೈಸುವ ಮಾರ್ಗ ಇದಾಗಿದ್ದು, ತುಂಬಾ ಹಳೆಯ ಲೈನ್​ ಆಗಿದ್ದರಿಂದ ಬಿಸಿಲಿಗೆ ಜೋತು ಬೀಳುತ್ತವೆ. ಲೈನ್​ ದುರಸ್ತಿಗೆ ಈಗಾಗಲೇ ಹಿರಿಯ ಅಧಿಕಾರಿಗಳ ಗಮನಕ್ಕೆ ತರಲಾಗಿದೆ. ತಾತ್ಕಾಲಿಕವಾಗಿ ಜೋತು ಬಿದ್ದಿರುವ ಲೈನ್​ ಸರಿಪಡಿಸಲಾಗುವುದು ಎಂದು ಕೆಪಿಟಿಸಿಎಲ್​ ಅಧಿಕಾರಿ ಮಹೇಶ್​ ತಿಳಿಸಿದ್ದಾರೆ.