ಉಳ್ಳಾಲ ನಗರ ಸುಂದರಗೊಳಿಸಬೇಕು ಎನ್ನುವ ನೆಲೆಯಲ್ಲಿ ಹಿಂದಿನ ಪೌರಾಯುಕ್ತೆ ವಾಣಿ ಆಳ್ವ ಹಲವು ಯೋಜನೆಗಳನ್ನು ಜಾರಿಗೆ ತಂದಿದ್ದರು. ನಗರಸಭಾ ವ್ಯಾಪ್ತಿಯಲ್ಲಿ ಘನತ್ಯಾಜ್ಯ ಪೂರ್ಣ ಪ್ರಮಾಣದಲ್ಲಿ ವಿಲೇವಾರಿ ಆಗಬೇಕು, ಸ್ವಚ್ಛ ಉಳ್ಳಾಲ ನಿರ್ಮಿಸಬೇಕು ಎನ್ನುವ ನೆಲೆಯಲ್ಲಿ ಅವರು ಸ್ವಯಂ ಮುತುವರ್ಜಿ ವಹಿಸಿದ್ದರು. ಪೌರಕಾರ್ಮಿಕರಿಗೆ ಗುತ್ತಿಗೆದಾರರಿಂದ ತೊಂದರೆಯಾಗಿ ತ್ಯಾಜ್ಯ ವಿಲೇವಾರಿ ಸಮಸ್ಯೆ ಎದುರಾದ ಸಂದರ್ಭ ನಗರಸಭೆಯಿಂದಲೇ ವೇತನದ ವ್ಯವಸ್ಥೆ ಮಾತ್ರವಲ್ಲದೆ ಆರೋಗ್ಯ ತಪಾಸಣೆ, ಭತ್ಯೆ, ಆಟೋಟ ಸ್ಪರ್ಧೆ, ಬಹುಮಾನದಂತಹ ಯೋಜನೆಗಳನ್ನು ಜಾರಿಗೆ ತಂದು ಪೌರಕಾರ್ಮಿಕರಲ್ಲಿ ಉತ್ಸಾಹ ತುಂಬಿದ್ದರು. ಅವರ ವರ್ಗಾವಣೆ ಬಳಿಕ ರಾಯಪ್ಪ ಪೌರಾಯುಕ್ತರಾಗಿ ಬಂದಿದ್ದು ಆರಂಭದಲ್ಲೇ ಸ್ವಚ್ಛ ಉಳ್ಳಾಲದ ಕನಸು ಕಂಡರು. ಹಸಿಕಸ ಮನೆಯಲ್ಲೇ ವಿಲೇವಾರಿ ಮಾಡಿಸುವ ಸಲುವಾಗಿ ತರಕಾರಿ ಬೆಳೆಗೆ ಆದ್ಯತೆ ನೀಡಿದ್ದರು.
