ನರೇಂದ್ರ ಎಸ್. ಮರಸಣಿಗೆ
ಹೆಬ್ರಿಯ ಕೆಳಪೇಟೆಯಲ್ಲಿ ಹೆಬ್ರಿ ಭಾಗದ ಚರಂಡಿ ನೀರು ನಿರಂತರವಾಗಿ ಹರಿದು ರಸ್ತೆ ಸಂಪೂರ್ಣ ಹಾಳಾಗಿದೆ. ಅಲ್ಲೇ ಸಮೀಪ ಬೃಹತ್ ಗಾತ್ರದ ಗುಂಡಿಯೊಂದು ಸೃಷ್ಟಿಯಾಗಿ ಜೀವ ಕಂಟಕವಾಗಿದೆ.
ರಾಷ್ಟ್ರೀಯ ಹೆದ್ದಾರಿ 169ಎ ಇದರ ಭಾಗವಾಗಿರುವ ಈ ರಸ್ತೆ ಪ್ರತಿವರ್ಷ ಸಮಸ್ಯೆ ಇರುತ್ತದೆ. ಅಧಿಕಾರಿಗಳಿಗೆ ಈ ಬಗ್ಗೆ ಗಮನಕ್ಕೆ ತಂದಾಗ ಕೇವಲ ತಾತ್ಕಾಲಿಕವಾಗಿ ದುರಸ್ತಿ ಕಾರ್ಯ ಮಾಡಿ ಕೈತೊಳೆದುಕೊಳ್ಳುತ್ತಾರೆ. ಪ್ರತಿ ವರ್ಷ ಮಳೆಗಾಲದಲ್ಲಿ ಸಮಸ್ಯೆ ಉದ್ಭವಿಸುತ್ತದೆ. ಸಮಸ್ಯೆಗೆ ಶಾಶ್ವತ ಪರಿಹಾರ ಕಲ್ಪಿಸಬೇಕೆಂದು ಅಂಗಡಿಯವರು ಒತ್ತಾಯಿಸಿದ್ದಾರೆ.
ಕೆಸರು ನೀರಿನ ಸಿಂಚನ
ರಾಷ್ಟ್ರೀಯ ಹೆದ್ದಾರಿಯಾಗಿರುವುದರಿಂದ ವೇಗಕ್ಕೆ ಮಿತಿಯೇ ಇಲ್ಲವೆಂಬಂತೆ ವಾಹನಗಳು ಸಂಚರಿಸುತ್ತವೆ. ಜೋರಾಗಿ ಮಳೆ ಬಂದಾಗ ಹಳ್ಳದ ರೀತಿಯಲ್ಲಿ ಒಂದು ಕಡೆಯಿಂದ ಇನ್ನೊಂದು ಕಡೆಗೆ ಚರಂಡಿ ನೀರು ಹರಿಯುತ್ತದೆ. ವಾಹನಗಳು ವೇಗವಾಗಿ ಚಲಿಸುವಾಗ ಕೆಸರು ನೀರು ಚಿಮ್ಮುತ್ತದೆ. ಸಾರ್ವಜನಿಕರು, ವಿದ್ಯಾರ್ಥಿಗಳಿಗೆ ಕೆಸರು ನೀರು ಎರಚುತ್ತದೆ. ಅಲ್ಲದೆ ಹೆದ್ದಾರಿ ಪಕ್ಕದ ಅಂಗಡಿಗಳಿಗೂ ಕೆಸರು ನೀರು ಹಾರುತ್ತದೆ.
