ಮುಂಡರಗಿ: ತಾಪಂ ಆವರಣದ ವಾಣಿಜ್ಯ ಮಳಿಗೆಗಳ ಮೇಲ್ಛಾವಣಿ ಸಂಪೂರ್ಣ ಶಿಥಿಲಾವಸ್ಥೆಯಲ್ಲಿದ್ದು, ಅಪಾಯಕ್ಕೆ ಆಹ್ವಾನ ನೀಡುವಂತಿದೆ. ಪಟ್ಟಣದ ಹೇಮರಡ್ಡಿ ಮಲ್ಲಮ್ಮ ವೃತ್ತದ (ಬೃಂದಾವನ ಸರ್ಕಲ್) ಹತ್ತಿರದ ತಾಪಂ ಕಚೇರಿ ಮುಂಭಾಗದ ಜಾಗದಲ್ಲಿ ತಾಪಂನಿಂದ 1998-99ನೇ ಸಾಲಿನಲ್ಲಿ 8 ವಾಣಿಜ್ಯ ಮಳಿಗೆಗಳನ್ನು ನಿರ್ವಿುಸಲಾಗಿದೆ. ಅವುಗಳ ಮೇಲ್ಛಾವಣಿ ಶಿಥಿಲಗೊಂಡು ನಾಲ್ಕೈದು ವರ್ಷಗಳಾಗಿವೆ. ಅವುಗಳಲ್ಲಿ ತೀರ ಶಿಥಿಲಗೊಂಡ 3 ಮಳಿಗೆಗಳನ್ನು ಬಂದ್ ಮಾಡಿದ್ದು, ಉಳಿದ 5 ಮಳಿಗೆಗಳನ್ನು ಬಾಡಿಗೆಗೆ ನೀಡಲಾಗಿದೆ. ಆದರೆ, ಅವು ಸಹ ಸಂಪೂರ್ಣ ಶಿಥಿಲಾವಸ್ಥೆಯಲ್ಲಿದ್ದು, ಯಾವಾಗಲಾದರೂ ಕುಸಿಯುವ ಸ್ಥಿತಿಯಲ್ಲಿವೆ. ಅಪಾಯ ಸಂಭವಿಸುವ ಮುನ್ನ ಸಂಬಂಧಿಸಿದ ಅಧಿಕಾರಿಗಳು ದುರಸ್ತಿ ಮಾಡಿಸಬೇಕಾದ ಅವಶ್ಯಕತೆಯಿದೆ.
