ಬೈಕ್ ಅಪಘಾತದಲ್ಲಿ ಸವಾರ ದುರ್ಮರಣ

ಹಾನಗಲ್ಲ: ಬೈಕ್​ಗಳ ಅಪಘಾತದಲ್ಲಿ ಓರ್ವ ಸ್ಥಳದಲ್ಲೇ ಮೃತಪಟ್ಟು, ಇನ್ನೋರ್ವ ಸವಾರ ಗಾಯಗೊಂಡ ಘಟನೆ ತಾಲೂಕಿನ ಗೆಜ್ಜಿಹಳ್ಳಿ ಸಮೀಪದ ಮೂರರ ಕ್ರಾಸ್​ನಲ್ಲಿ ಬುಧವಾರ ಸಂಭವಿಸಿದೆ. ಶಾಡಗುಪ್ಪಿ ಗ್ರಾಮದ ರೈತ ಮಲ್ಲಿಕಾರ್ಜುನ ಗಂಗಪ್ಪ ಹಲಸೂರ (38) ಮೃತ ಬೈಕ್ ಸವಾರ. ಮಲ್ಲಿಕಾರ್ಜುನ ಶಾಡಗುಪ್ಪಿಯಿಂದ ಹಾನಗಲ್ಲಿಗೆ ಬೈಕ್​ನಲ್ಲಿ ಬರುವಾಗ ಅಪಘಾತ ಸಂಭವಿಸಿದೆ. ಇನ್ನೊಂದು ಬೈಕ್​ನ ಸವಾರನ ಕಾಲು ಮುರಿದಿದ್ದು, ಹಾನಗಲ್ಲ ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ದಾಖಲಿಸಲಾಗಿದೆ.

ನೇತ್ರದಾನ: ಅಪಘಾತದ ದುಃಖದ ಮಧ್ಯೆಯೂ ಮಲ್ಲಿಕಾರ್ಜುನ ಹಲಸೂರ ಅವರ ಕುಟುಂಬದವರು ಮೃತನ ಕಣ್ಣುಗಳನ್ನು ಅಕ್ಕಿಆಲೂರಿನ ಸ್ನೇಹಮೈತ್ರಿ ನೇತ್ರದಾನಿಗಳ ಬಳಗದ ಸಹಕಾರದೊಂದಿಗೆ ಶಿರಸಿಯ ಲಯನ್ಸ್ ನಯನ ಭಂಡಾರಕ್ಕೆ ದಾನ ಮಾಡಿ ಮಾನವೀಯತೆ ಮೆರೆದಿದ್ದಾರೆ.