ಕರ್ನಾಟಕ ರಾಜ್ಯ ಮುಕ್ತ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕಿ ಡಾ.ಜ್ಯೋತಿ ಶಂಕರ್ ‘ಮೂಕಜ್ಜಿಯ ಕನಸುಗಳು’ ಕೃತಿ ಕುರಿತು ಮಾತನಾಡಿ, ಕಾರಂತರು ಮಲೆನಾಡಿನ ಪ್ರದೇಶಕ್ಕೆ ಸೀಮಿತವಾದವರಲ್ಲ, ವಿಶ್ವಸಾಹಿತ್ಯಕ್ಕೆ ಸೇರಿದವರು. ಇವರ ವೈಚಾರಿಕ ವಿಶ್ಲೇಷಣೆಗಳು ಮೂಕಜ್ಜಿಯ ಕನಸುಗಳಲ್ಲಿ ವ್ಯಕ್ತವಾಗಿವೆ. ಈ ಕೃತಿಯು ಕಾರಂತರ ಬಗ್ಗೆ ನೂರಾರು ಪ್ರಶ್ನೆಗಳನ್ನು ಹುಟ್ಟುಹಾಕಿ ವಿಭಿನ್ನ ನೆಲೆಯಲ್ಲಿ ಯೋಚಿಸುವಂತೆ ಮಾಡಿದೆ. ಇಡೀ ಕಾದಂಬರಿ ಜೀವನದ ಸಂಬಂಧವನ್ನು ಕುರಿತು ಹೇಳುತ್ತದೆ. ಇಲ್ಲಿ ಯಾವುದೇ ಕಥಾ ನಾಯಕ-ನಾಯಕಿ ಇರದೆ ಮೂಕಾಂಬಿಕೆಯ ಮುಖಾಂತರವೇ ಕಾರಂತರು ವಿಶ್ಲೇಷಣೆಯನ್ನು ಮಾಡುತ್ತಾರೆ. ಇಲ್ಲಿ ವಿಧವೆಯರನ್ನು ಸಮಾಜ ನೋಡುವ ರೀತಿ, ಹೆಣ್ಣಿನ ಶೋಷಣೆ, ಸಮಾಜದ ನಂಬಿಕೆ-ಅಪನಂಬಿಕೆಗಳ ಬಗ್ಗೆ ವಿಸ್ತೃತವಾದ ಚರ್ಚೆಯನ್ನು ಹಲವು ಪಾತ್ರಗಳ ಮುಖಾಂತರ ವ್ಯಕ್ತಪಡಿಸಿದ್ದಾರೆ ಎಂದರು.
