ಐಪಿಎಸ್ ಮರಿಸ್ವಾಮಿ ಎಂದೇ ಖ್ಯಾತಿ ಪಡೆದಿದ್ದ ಇವರು ಇಲಾಖೆಯಲ್ಲಿ ದಕ್ಷ ಹಾಗೂ ಪ್ರಾಮಾಣಿಕ ಪೊಲೀಸ್ ಅಧಿಕಾರಿ ಎಂಬ ಖ್ಯಾತಿ ಪಡೆದಿದ್ದರು. ಸೇವೆಯಿಂದ ನಿವೃತ್ತರಾದ ಬಳಿಕ ಸಮಾಜಮುಖಿ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. ಸ್ವಗ್ರಾಮದಲ್ಲಿ ನಾನು ಓದಿದ ಶಾಲೆ ಶಿಥಿಲಾವಸ್ಥೆಗೊಂಡಿದೆ ಎಂದು ತಿಳಿದ ಮರಿಸ್ವಾಮಿ ಅವರು ಸೇರಿದಂತೆ ತನ್ನೊಟ್ಟಿಗಿನ 63 ದಾನಿಗಳ ಜತೆಗೂಡಿ ಸುಮಾರು 2 ಕೋಟಿ ರೂ.ವೆಚ್ಚದಲ್ಲಿ ಸೂಸಯ್ಯ ಮತ್ತು ಲಕ್ಷ್ಮಮ್ಮ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯನ್ನು ಕಟ್ಟಿಸಿದ್ದಾರೆ. ಬಂಡವಾಳಶಾಯಿಗಳ ಶಿಕ್ಷಣ ಸಂಸ್ಥೆಯ ಕಟ್ಟಡಗಳನ್ನೇ ಮೀರಿಸುವ ರೀತಿಯಲ್ಲಿ 12 ಕೊಠಡಿವುಳ್ಳ ಸುಸಜ್ಜಿತ ಶಾಲೆಯನ್ನು ಕಟ್ಟಿಸಿದ್ದಾರೆ. ನೆಲ ಹಂತಸ್ತು ಹಾಗೂ 1ನೇ ಹಂತಸ್ತಿನ ಕಟ್ಟಡ ಇದಾಗಿದೆ. ಶಾಲಾ ಆವರಣದಲ್ಲಿ ವಿಶಾಲವಾದ ಮೈದಾನವಿದೆ. ತರಗತಿ ಕೊಠಡಿ, ಕಂಪ್ಯೂಟರ್ ಕೊಠಡಿ, ಶೌಚಗೃಹ ಒಳಗೊಂಡ ವ್ಯವಸ್ಥಿತವಾದ ಶಾಲೆ ನಿರ್ಮಾಣವಾಗಿದೆ. ಕಳೆದ 3 ವರ್ಷಗಳಿಂದ ನಿವೃತ್ತ ಐಪಿಎಸ್ ಅಧಿಕಾರಿ ಮರಿಸ್ವಾಮಿ ಅವರು ಶ್ರಮ ವಹಿಸಿದ ಫಲವಾಗಿ ಸುಂದರ ಶಾಲೆ ಲೋಕಾರ್ಪಣೆಗೆ ಸಜ್ಜುಗೊಂಡಿದೆ.
