ಬಿ&ಖಾತಾ ಅಭಿಯಾನಕ್ಕೆ ಸ್ಪಂದನೆ

ನೆಲಮಂಗಲ : ಅನಧಿಕೃತ ನಿವೇಶನ, ಮನೆಗಳಿಗೆ ಬಿ&ಖಾತೆ ಕೊಡುವ ನಿಟ್ಟಿನಲ್ಲಿ ಸರ್ಕಾರ ನಡೆಸಿದ ಅಭಿಯಾನದಲ್ಲಿ ನೆಲಮಂಗಲ ನಗರಸಭೆಯಿಂದ ಅತಿಹೆಚ್ಚು ಸಂಖ್ಯೆಯ ಬಿ&ಖಾತಾ ನೀಡಿರುವ ಮಾಹಿತಿ ಲಭ್ಯವಾಗಿದೆ.

ನಗರ, ಪಟ್ಟಣ ಸ್ಥಳಿಯ ಸಂಸ್ಥೆಗಳ ವ್ಯಾಪ್ತಿಯಲ್ಲಿನ ಅನಧಿಕೃತ ನಿವೇಶನಗಳು, ಮನೆಗಳ ಮಾಲೀಕರಿಗೆ ಮೂರು ತಿಂಗಳ ಹಿಂದೆ ಸಿಹಿಸುದ್ದಿ ನೀಡಿದ್ದ ರಾಜ್ಯ ಸರ್ಕಾರ ಒಂದೇ ಬಾರಿಗೆ ಇ&ಖಾತಾಗೆ ಸಮಾನಂತರವಾದ ಬಿ&ಖಾತಾ ನೀಡುವ ಉದ್ದೇಶದಿಂದ ನಗರಾಭಿವೃದ್ಧಿ ಇಲಾಖೆ ಕೆಲ ನಿಯಮ ತಿದ್ದುಪಡಿ ಮಾಡಿದೆ. ನಗರ ಪಟ್ಟಣ ಸ್ಥಳಿಯ ಸಂಸ್ಥೆಗಳಿಗೆ 3 ತಿಂಗಳ ಗಡುವು ನೀಡಿ ಆದೇಶ ಹೊರಡಿಸಿತ್ತು.

ಮೇ 10ವರೆಗೆ ಇದ್ದ 3 ತಿಂಗಳ ಅಭಿಯಾನದ ಗಡುವು ಮುಂದಿನ (ಆಗಸ್ಟ್​ 10) 3 ತಿಂಗಳವರೆಗೂ ವಿಸ್ತರಣೆ ಮಾಡಿದ್ದು, ಅವಕಾಶ ವಂಚಿತ ಅನಧಿಕೃತ ಮನೆ, ನಿವೇಶನ ಮಾಲೀಕರು ಪ್ರಯೋಜನ ಪಡೆದುಕೊಳ್ಳಬೇಕಾಗಿದೆ. 3 ತಿಂಗಳ ಕಾಲ ನಡೆಸಿದ ಬಿ&ಖಾತಾ ಅಭಿಯಾನದಲ್ಲಿ 5,158 ಸಂಖ್ಯೆ ಅನಧಿಕೃತ ಆಸ್ತಿಗಳಿಗೆ ಬಿ&ಖಾತಾ ನೀಡಿದ್ದರೆ, ಅಧಿಕೃತ 12,016 ಎ&ಖಾತೆ ಸೇರಿ ಒಟ್ಟು 17,174 ಖಾತೆ ವಿತರಣೆ ಮಾಡಿದ್ದು, ಅನಧಿಕೃತ ಆಸ್ತಿ ಮಾಲೀಕರಿಗೆ ನಿರಾಳ ತಂದಿದೆ. ನಗರಸಭೆ ವ್ಯಾಪ್ತಿಯಲ್ಲಿ ಕಂದಾಯ ಜಮೀನಿನಲ್ಲಿ ಮನೆ ನಿರ್ಮಿಸಿಕೊಂಡಿರುವುದು ಒಂದೆಡೆಯಾದರೆ, 2019ರಲ್ಲಿ ಪುರಸಭೆ, ನಗರಸಭೆಗೆ ಮೇಲ್ದರ್ಜೆಗೇರಿದ ಬಳಿಕ ವಿಲೀನಗೊಂಡ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಬಹುತೇಕ ವಸತಿ ಬಡಾವಣೆಗಳು ಅನಧಿಕೃತವಾಗಿವೆ.

ಗ್ರಾಮೀಣಾಭಿವೃದ್ಧಿ ಪಂಚಾಯತ್​ ರಾಜ್​ ಇಲಾಖೆಯಿಂದ (ಕ್ರಮಬದ್ದವಲ್ಲದ) ಆಸ್ತಿಗಳೆಂದು ನಮೂದಿಸಿ ನಮೂನೆ 11 ಬಿ ಹೆಸರಿನಲ್ಲಿ ಇ&ಖಾತಾ ನೀಡಿತ್ತು. ಇನ್ನೂ ಕೆಲ ವಸತಿ ಬಡಾವಣೆಗಳಲ್ಲಿ ನಿವೇಶನ ಖರೀದಿಸಿದ್ದ ಕೆಲವರು ಇ&ಸ್ವತ್ತು ಪಡೆಯದೇ ಕೈಬರಹ ಖಾತಾ ಇಟ್ಟುಕೊಂಡಿದ್ದರು. ಇದೀಗ ಸರ್ಕಾರ ನಡೆಸಿದ ಅಭಿಯಾನದಲ್ಲಿ ಎಲ್ಲರೂ ಬಿ&ಖಾತಾ ಪಡೆದುಕೊಂಡಿದ್ದು ಪರಬಾರೆ, ಬ್ಯಾಂಕುಗಳಲ್ಲಿ ಸಾಲಸೌಲಭ್ಯ ಪಡೆಯಲು ಸಹಕಾರಿಯಾಗಿದೆ.

ಜನಪ್ರತಿನಿಧಿಗಳಿಗೆ ಹೆಸರು ತಂದ ಕಾರ್ಯಕ್ರಮ : ಬಿ&ಖಾತಾ ಅಭಿಯಾನಕ್ಕೆ ಚಾಲನೆ ನೀಡಿದ ೇತ್ರದ ಶಾಸಕರು, ಅಧಿಕಾರಿಗಳು, ಸಿಬ್ಬಂದಿಗೆ ಪ್ರಗತಿಯಲ್ಲಿ ಜನಸಾಮಾನ್ಯರಿಗೆ ಅಭಿಯಾನದ ಪ್ರಯೋಜನ ದೊರಕಿಸಿಕೊಡುವಂತೆ ತಾಕೀತು ಮಾಡಿದ್ದಲ್ಲದೇ ಮಾಲೀಕರಿಂದ ಯಾವುದೇ ಹಣ ಪಡೆಯದಂತೆ ತಾಕೀತು ಮಾಡಿದ್ದರು. ನಗರಸಭೆಯ ಸದಸ್ಯರು ವಾರ್ಡ್​ನ ನಿವಾಸಿಗಳಿಗೆ ಬಿ&ಖಾತಾ ಮಾಡಿಸಿಕೊಟ್ಟು ಪ್ರಶಂಸೆಗೆ ಪಾತ್ರರಾದರು.

ಹರಿದು ಬಂದ ತೆರಿಗೆ : ಅನಧಿಕೃತ ನಿವೇಶನ ಹೊಂದಿದ್ದ ಮಾಲೀಕರಿಂದ 2024&25 ಸಾಲಿಗೆ ದುಪ್ಪಟ್ಟು ತೆರಿಗೆ (ಡಬಲ್​ ಟ್ಯಾಕ್ಸ್​) ಪಾವತಿಸಿಕೊಂಡು ಬಿ&ಖಾತಾ ನೀಡಿ ನಗರ, ಪಟ್ಟಣ, ಸ್ಥಳಿಯ ಸಂಸ್ಥೆಗಳ ಖಜಾನೆಗೆ ಕೋಟ್ಯಂತರ ರೂ. ತೆರಿಗೆ ರೂಪದಲ್ಲಿ ಸಂಗ್ರಹವಾಗಿದ್ದು, ಅಭಿವೃದ್ಧಿ ಕೆಲಸಗಳಿಗೆ ಸಹಕಾರಿಯಾಗಲಿದೆ.