ಕಲ್ಪತರು ನಾಡಿನ ಜನರ ನಿರೀಕ್ಷೆ ಹುಸಿಗೊಳಿಸಿದ ಬಜೆಟ್‌

ತುಮಕೂರು : ಬಜೆಟ್‌ನಲ್ಲಿ ಜಿಲ್ಲೆಗೆ ಯಾವುದೇ ಕೊಡುಗೆಯನ್ನು ಸಿಎಂ ಯಡಿಯೂರಪ್ಪ ನೀಡದೇ ಇರುವುದು ಕಲ್ಪತರು ನಾಡಿನ ಜನರ ನಿರೀಕ್ಷೆ ಹುಸಿಗೊಳಿಸಿದೆ. ಹೇಮೆನಾಲೆ ಆಧುನೀಕರಣಕ್ಕೆ ಅನುದಾನ ನಿರೀಕ್ಷೆ, ಸ್ನಾತಕೋತ್ತರ ವೈದ್ಯಕೀಯ ಶಿಕ್ಷಣ ಸಂಸ್ಥೆ ಸ್ಥಾಪನೆ, ಗಣಿಬಾಧಿತ ತಿಪಟೂರು ತಾಲೂಕು ಕಿಬ್ಬನಹಳ್ಳಿಯಲ್ಲಿ ಸರ್ಕಾರಿ ವೈದ್ಯಕೀಯ ಕಾಲೇಜು ಸ್ಥಾಪನೆ ಸೇರಿ ಜಿಲ್ಲೆಯ ಜನಪ್ರತಿನಿಧಿಗಳ ಬೇಡಿಕೆಗಳಿಗೆ ಸಿಎಂ ಸ್ಪಂದಿಸದೇ ಇರುವುದು ಐವರು ಬಿಜೆಪಿ ಶಾಸಕರಿಗೆ ಆಘಾತ ತಂದಿದೆ.

ಮಹಿಳಾ ದಿನಾಚರಣೆಯಂದು ಬಜೆಟ್ ಮಂಡಿಸಿದ ಸಿಎಂ ಯಡಿಯೂರಪ್ಪ ಸ್ತ್ರೀ ಕಲ್ಯಾಣಕ್ಕಾಗಿ 37188 ಕೋಟಿ ರೂ., ಅನುದಾನ ಮೀಸಲಿಡುವ ಮೂಲಕ ಮಹಿಳಾ ಸ್ನೇಹಿ ಬಜೆಟ್ ಮಂಡಿಸಿರುವುದು ಸ್ವಾಗತಾರ್ಹವೆನಿಸಿದರೂ ಜಿಲ್ಲೆಯ ಪಾಲಿಗೆ ‘ಬಜೆಟ್’ ನಿರಾಸೆ ತಂದಿದೆ. ಕಳೆದ ಬಾರಿಯಂತೆ ಯಾವುದೇ ಹೊಸ ಯೋಜನೆಗಳು ಬಜೆಟ್‌ನಲ್ಲಿ ಜಿಲ್ಲೆಗೆ ದೊರೆತಿಲ್ಲ.

ಶ್ರೀಗಳ ಹೆಸರಲ್ಲಿ ಸ್ಮತಿವನಕ್ಕೆ 2 ಕೋಟಿ: ಶಿವಕುಮಾರ ಶ್ರೀಗಳ ಹೆಸರಲ್ಲಿ ಸಿದ್ಧಗಂಗಾ ತಾಂತ್ರಿಕ ಮಹಾವಿದ್ಯಾಲಯ ವತಿಯಿಂದ ತುಮಕೂರು ತಾಲೂಕಿನ ಬಸದಿಬೆಟ್ಟದ ತಪ್ಪಲಲ್ಲಿ ಶಿವಕುಮಾರ ಶ್ರೀಗಳ ಜೈವಿಕವನ ಅಭಿವೃದ್ಧಿ ಪಡಿಸಲಾಗುತ್ತಿದ್ದು, ಈ ಜೈವಿಕವನವನ್ನು ಸಸ್ಯಕಾಶಿಯನ್ನಾಗಿ ಮಾಡಲು ಶ್ರೀಗಳ ಹೆಸರಲ್ಲಿ ‘ಸ್ಮತಿವನ’ಕ್ಕೆ 2 ಕೋಟಿ ರೂ.,ಗಳನ್ನು ಘೋಷಣೆ ಮಾಡಿರುವುದಷ್ಟೇ ಸಮಾಧಾನಕರ ಅಂಶವೆನಿಸಿದೆ.

ಬೆಂಗಳೂರಿನ ತ್ಯಾಜ್ಯ ನೀರನ್ನು ಸಂಸ್ಕರಿಸಿ ತುಮಕೂರು ಹಾಗೂ ಇತರ 4 ಜಿಲ್ಲೆಗಳಿಗೆ ಹರಿಸುವ ಮೂಲಕ ಅಂತರ್ಜಲ ಅಭಿವೃದ್ಧಿಗೆ ಒತ್ತುಕೊಡಲು ಅನುದಾನ ನೀಡಿರುವುದು ಬಿಟ್ಟರೆ ಹೇಮೆ ನಾಲೆ ಆಧುನೀಕರಣ, ಎತ್ತಿನಹೊಳೆ ಯೋಜನೆ, ಭದ್ರಾ ಮೇಲ್ಡಂಡೆ ಯೋಜನೆಗೆ ಹೆಚ್ಚಿನ ಅನುದಾನ ನೀಡದಿರುವುದು ಅಸಮಾಧಾನವೆನಿಸಿದೆ. ತುಮಕೂರಿನಲ್ಲಿ ಎತ್ತಿನಹೊಳೆ ಭೂ ಸ್ವಾಧೀನಕ್ಕೆ ನೆರವು ಘೋಷಣೆ ಭೂಮಿ ಕಳೆದುಕೊಂಡಿರುವ ರೈತರಿಗೆ ಸ್ವಲ್ಪ ಸಮಾಧಾನದ ನಿಟ್ಟುಸಿರು ಬಿಡುವಂತೆ ಮಾಡಿದೆ.

ಇನ್ನುಳಿದಂತೆ ವಿಮಾನ ನಿಲ್ದಾಣಕ್ಕೆ ಜಾಗ ಕೊಡುವ ಬಗ್ಗೆ ಪ್ರಸ್ತಾಪ ಮಾಡಿಲ್ಲ. ಹೇಮೆ ನಾಲೆ ಅಭಿವೃದ್ಧಿಗೆ ಹೆಚ್ಚಿನ ಅನುದಾನ ಕೊಟ್ಟಿಲ್ಲ. ವಿವಿ ಹೊಸ ಕ್ಯಾಂಪಸ್‌ಗೆ ಅನುದಾನಕ್ಕೆ ಸಲ್ಲಿಸಿದ್ದ ಪ್ರಸ್ತಾವನೆ ಬಗ್ಗೆಯೂ ಚಕಾರವೆತ್ತಿಲ್ಲ. ತೋಟಗಾರಿಕಾ ಕಾಲೇಜು, ಕೋಕನಟ್ ಟೆಕ್ನಾಲಜಿ ಪಾರ್ಕ್ ಹಾಗೂ ಶಿರಾ ತಾಲೂಕು ಚಿಕ್ಕನಹಳ್ಳಿಯಲ್ಲಿರುವ ಕೃಷಿ ತರಬೇತಿ ಕೇಂದ್ರದಲ್ಲಿ ಕೃಷಿ ಪದವಿ ಕಾಲೇಜು ಸ್ಥಾಪನೆ ಸೇರಿ ಎಲ್ಲ ನಿರೀಕ್ಷೆಗಳು ಹುಸಿಯಾಗಿವೆ.