ಪಾರ್ಶ್ವಸಂಗೀತ ನಾಟಕ ಇಂದಿಗೂ ಜನಮಾನಸದಲ್ಲಿ ಉಳಿದಿರುವ 1940ರ ದಶಕದಿಂದ 70ರ ದಶಕಗಳವರೆಗಿನ ಹಿಂದಿ ಚಿತ್ರಗೀತೆಗಳೊಂದಿಗಿನ ಅವಿನಾಭಾವ ಸಂಬಂಧವನ್ನು ತೆರೆದಿಡುತ್ತದೆ. ಶಾಮಾ ಚಿಕ್ಕಪ್ಪನಿಗೆ ಹಾಡುಗಳೆಂದರೆ ಪಂಚಪ್ರಾಣ. ಓದೆಂದರೆ ಪ್ರಾಣಸಂಕಟ. ಬೆಂಕಿ ನವಾಬನಂತಿರುವ ಅಜ್ಜನಿಗೋ ಮಗನನ್ನು ಕಂಡರೆ ಅಸಹನೆ. ಈ ಕೋಪ-ತಾಪಗಳ ನಡುವೆಯೇ ಶಾಮಾ ಚಿಕ್ಕಪ್ಪ-ಕಾಕೂವಿನ ಮದುವೆ. ನವದಂಪತಿ ಸರಸ-ವಿರಸ, ನಾಟಕದುದ್ದಕ್ಕೂ ತಿಳಿಗಾಳಿಯಂತೆ ಆವರಿಸಿಕೊಳ್ಳುವ ಹಾಸ್ಯ, ಅಲ್ಲಲ್ಲಿ ಹಿಂದಿ ಗಾನಲೋಕದ ದಂತಕತೆಗಳೆನಿಸಿದ ಕೆ.ಎಲ್.ಸೈಗಲ್, ತಲತ್ ಮಹಮೂದ್, ಮಹಮದ್ ರಫಿ, ಕಿಶೋರ್ಕುಮಾರ್, ಶಂಶಾದ್ ಬೇಗಂ, ಲತಾಮಂಗೇಶ್ಕರ್, ಮನ್ನಾಡೆ ಅವರ ಬಂಗಾರದ ಹಾಡುಗಳು ಪ್ರೇಕ್ಷಕರನ್ನು ಬೇರೆಯದೇ ಲೋಕಕ್ಕೆ ಕೈಹಿಡಿದು ಕರೆದೊಯ್ಯುತ್ತವೆ.
