ರೆಪೊ ದರ ಕಡಿತದಿಂದ ಆರ್ಥಿಕ ಬೆಳವಣಿಗೆಗೆ ಉತ್ತೇಜನ: ಎಫ್​ಕೆಸಿಸಿಐ ಆಶಾಭಾವನೆ

ಬೆಂಗಳೂರು: ಐದು ವರ್ಷದ ಬಳಿಕ ರೆಪೊ ದರ ಕಡಿತಗೊಳಿಸಿರುವ ರಿಸರ್ವ್​ ಬ್ಯಾಂಕ್​ ಆಫ್​ ಇಂಡಿಯಾ (ಆರ್​ಬಿಐ) ಕ್ರಮವನ್ನು ಕರ್ನಾಟಕ ವಾಣಿಜ್ಯ ಮತ್ತು ಕೈಗಾರಿಕಾ ಮಹಾಸಂಸ್ಥೆ (ಎಫ್​ಕೆಸಿಸಿಐ) ಸ್ವಾಗತಿಸಿದೆ. ಇದರಿಂದಾಗಿ ಆರ್ಥಿಕ ಬೆಳವಣಿಗೆ ಪುನರುಜ್ಜೀವನಗೊಳಿಸುವ, ಕೈಗಾರಿಕೆಗಳಾದ್ಯಂತ ವ್ಯಾಪಾರ ಮನೋಭಾವವನ್ನು ಹೆಚ್ಚಿಸುವ ಮಹತ್ವದ ಹೆಜ್ಜೆಯಾಗಿದೆ ಎಂದು ಎಫ್​​​​​ಕೆಸಿಸಿಐ ಆಶಾಭಾವನೆ ವ್ಯಕ್ತಪಡಿಸಿದೆ.

ರೆಪೊ ದರ ಕಡಿತ ಕುರಿತು ಪ್ರತಿಕ್ರಿಯಿಸಿದ ಎಫ್​ಕೆಸಿಸಿಐ ಅಧ್ಯಕ್ಷ ಎಂ.ಜಿ.ಬಾಲಕೃಷ್ಣ, ಆರ್ಥಿಕತೆಯು ಮಂದಗತಿ ಎದುರಿಸುತ್ತಿರುವ ನಿರ್ಣಾಯಕ ಸಮಯದಲ್ಲಿ ರೆಪೋ ದರವನ್ನು ಕಡಿಮೆ ಮಾಡುವ ಆರ್​ಬಿಐನ ನಿರ್ಧಾರ ಅತ್ಯಂತ ಸೂಕ್ತವಾಗಿದೆ.ಈ ದರ ಕಡಿತವು ವ್ಯವಹಾರಗಳಿಗೆ ಸಾಲ ಪಡೆಯುವ ವೆಚ್ಚ ಕಡಿಮೆ ಮಾಡುತ್ತದೆ. ಹೊಸ ಹೂಡಿಕೆಗಳನ್ನು ಉತ್ತೇಜಿಸುತ್ತದೆ. ಹೆಚ್ಚಿನ ಬಡ್ಡಿ ದರಗಳೊಂದಿಗೆ ನರಳುತ್ತಿರುವ ಎಂಎಸ್​ಎಂಇ ಮತ್ತು ಕೈಗಾರಿಕೆಗಳಿಗೆ ಅಗತ್ಯ ಪರಿಹಾರ ನೀಡಲಿದೆ. ಜತೆಗೆ, ಭಾರತದ ಆರ್ಥಿಕ ಬೆಳವಣಿಗೆ ಪಥವನ್ನು ಇನ್ನಷ್ಟು ಬಲಪಡಿಸಲಿದೆ ಎಂದರು.

ಅಂದಾಜು ಐದು ವರ್ಷಗಳ ಸ್ಥಿರ ಅಥವಾ ಏರುತ್ತಿರುವ ಬಡ್ಡಿದರಗಳನ್ನು ಅನುಸರಿಸುವ ದರ ಕಡಿತವು ಆರ್ಥಿಕ ವಿಸ್ತರಣೆ ಉತ್ತೇಜಿಸುವ ಗುರಿಯನ್ನು ಹೊಂದಿರುವ ನೀತಿ ಬದಲಾವಣೆಯನ್ನು ಸೂಚಿಸುತ್ತದೆ. ಹಣದುಬ್ಬರವು ಆರ್​ಬಿಐ ಶೇ.4 ಗುರಿಯೊಂದಿಗೆ ಹೊಂದಿಕೆಯಾಗುವುದರೊಂದಿಗೆ ಮತ್ತು ಬೆಳವಣಿಗೆಯನ್ನು ನಿಧಾನಗೊಳಿಸುವ ಆತಂಕಗಳೊಂದಿಗೆ ಈ ಕ್ರಮವು ಮಾರುಕಟ್ಟೆಗೆ ಹೊಸ ಆಶಾವಾದ ತುಂಬುವ ನಿರೀೆಯಿದೆ. ಕಡಿಮೆ ಬಡ್ಡಿದರಗಳು ಸಾಲವನ್ನು ಹೆಚ್ಚು ಕೈಗೆಟುಕುವಂತೆ ಮಾಡುತ್ತವೆ. ಬಂಡವಾಳ ವೆಚ್ಚ, ಮೂಲಸೌಕರ್ಯ ಅಭಿವೃದ್ಧಿ,ಗ್ರಾಹಕ ವೆಚ್ಚವನ್ನು ಉತ್ತೇಜಿಸಲಿದೆ ಎಂದು ಸಂತಸ ವ್ಯಕ್ತಪಡಿಸಿದರು.

ಹೆಚ್ಚಿನ ಹಣಕಾಸು ವೆಚ್ಚಗಳನ್ನು ಎದುರಿಸುತ್ತಿದ್ದ ಉತ್ಪಾದನೆ, ರಿಯಲ್​ ಎಸ್ಟೇಟ್​, ಎಂಎಸ್​ಎಂಇ ವಲಯಗಳು ಗಮನಾರ್ಹ ಪ್ರಯೋಜನ ಪಡೆಯಲಿವೆ. ಈ ವಿತ್ತೀಯ ಸರಾಗಗೊಳಿಸುವಿಕೆಯು ದೇಶೀಯ ಉದ್ಯಮಗಳಿಗೆ ಬೆಂಬಲ ನೀಡುವುದಲ್ಲದೆ ವಿದೇಶಿ ಹೂಡಿಕೆಗಳನ್ನು ಆಕರ್ಷಿಸಲಿದೆ. ಕರ್ನಾಟಕ ಮತ್ತು ಭಾರತವನ್ನು ವ್ಯಾಪಾರ ವಿಸ್ತರಣೆಗೆ ಆಕರ್ಷಕ ತಾಣವನ್ನಾಗಿ ಮಾಡುತ್ತದೆ. ದರ ಕಡಿತದ ಪ್ರಯೋಜನ ಗ್ರಾಹಕರಿಗೆ ತ್ವರಿತವಾಗಿ ಸಿಗುವಂತಾಗಬೇಕು ಎಂದು ಎಫ್​ಕೆಸಿಸಿಐ ಅಧ್ಯಕ್ಷರು ಸಲಹೆ ನೀಡಿದರು.

https://www.vijayavani.net/eliminated-inequality-and-created-an-equal-society-in-the-mysore-state