ಏಳು ಕೋಟಿ ರೂ. ವೆಚ್ಚದ ಏತ ನೀರಾವರಿ ಯೋಜನೆಗೆ ಇದುವರೆಗೆ 22 ಕೋಟಿ ರೂ. ವಿನಿಯೋಗ ಮಾಡಲಾಗಿದೆ. ಆದರೂ ಕೆರೆಗಳಿಗೆ ನೀರು ಹರಿದಿಲ್ಲ. 2008ರಲ್ಲಿ ಈ ಯೋಜನೆಯ ಕಾಮಗಾರಿ ಆರಂಭವಾಗಿದ್ದು, 14 ವರ್ಷ ಕಳೆದರೂ ಮುಕ್ತಾಯವಾಗಿಲ್ಲ. ಉಳಿಕೆ ಕಾಮಗಾರಿ ನೆಪದಲ್ಲಿ ಹಣದ ಹೊಳೆಯನ್ನೇ ಹರಿಸಲಾಗಿದ್ದು, ಕಂಡಕಂಡವರ ಜೇಬು ತುಂಬಿಸುತ್ತಿದೆ. ತಾಲೂಕಿನ ಹರಮಘಟ್ಟ ಹಾಗೂ ಆಲ್ದಳ್ಳಿ ಭಾಗದ ನಾಲ್ಕು ಕೆರೆಗಳಿಗೆ ನೀರು ತುಂಬಿಸಿ ನೀರಾವರಿ ಸೌಲಭ್ಯ ಕಲ್ಪಿಸಲು 7.05 ಕೋಟಿ ರೂ. ವೆಚ್ಚದಲ್ಲಿ ಹೊಳಲೂರು ಏತ ನೀರಾವರಿ ಯೋಜನೆ ರೂಪಿಸಲಾಗಿದೆ. ಈ ಯೋಜನೆಯ ಗುತ್ತಿಗೆ ಪಡೆದ ಮೊದಲ ಗುತ್ತಿಗೆದಾರ ಹೊಳಲೂರು ಬಳಿ ತುಂಗಭದ್ರಾ ನದಿಗೆ ಜಾಕ್ವೆಲ್ ನಿರ್ಮಾಣ ಮಾಡಿ ಪಿಎಎಸ್ಸಿ ಪೈಪ್ಗಳನ್ನು ಬಳಕೆ ಮಾಡಿ ಪೈಪ್ಲೈನ್ ನಿರ್ವಿುಸಿದ್ದರು. ಪ್ರಾಯೋಗಿಕವಾಗಿ ನೀರು ಹರಿಸಿದಾಗ ಏರು ಕೊಳವೆ ಮಾರ್ಗದ ಪೈಪ್ ಜಾಯಿಂಟ್ಗಳಲ್ಲಿ ನೀರು ಸೋರಿಕೆಯಾಗಿದ್ದರಿಂದಾಗಿ ವೆಚ್ಚ ಮತ್ತು ಹೊಣೆಗಾರಿಕೆ(ರಿಸ್ಕ್ ಅಂಡ್ ಕಾಸ್ಟ್) ಆಧಾರದ ಮೇಲೆ ಗುತ್ತಿಗೆ ರದ್ದುಪಡಿಸಲಾಯಿತು. ಜತೆಗೆ ಈ ಕಾಮಗಾರಿ ಬಿಲ್ ತಡೆ ಹಿಡಿಯಲಾಯಿತು. ಬಳಿಕ ಪೈಪ್ಗಳನ್ನು ಮತ್ತೆ ತೆಗೆದು ಸರಿಯಾಗಿ ಜಾಯಿಂಟ್ ಮಾಡಲು ಎರಡನೆ ಗುತ್ತಿಗೆದಾರನಿಗೆ ಟೆಂಡರ್ ನೀಡಲಾಯಿತು. ಆದರೆ, ಈತ ಮಾಡಿದ ಕೆಲಸವೇ ಬೇರೆ.
