ವಕ್ಫ್​ ಕಾಯ್ದೆ ರದ್ದುಪಡಿಸಿ ರೈತರನ್ನು ಉಳಿಸಿ

ವಿಜಯಪುರ: ವಕ್ಫ್​ ಕಾಯ್ದೆ ರದ್ದು ಪಡಿಸದಿದ್ದರೆ ಮುಂಬರುವ ದಿನಗಳಲ್ಲಿ ದೆಹಲಿಯ ಜಂತರ್​ ಮಂತರ್​ನಲ್ಲಿ ಉಪವಾಸ ಸತ್ಯಾಗ್ರಹ ಹಮ್ಮಿಕೊಳ್ಳಲಾಗುವುದು ಎಂದು ಅಖಂಡ ಕರ್ನಾಟಕ ರೈತ ಸಂದ ರಾಜ್ಯ ಕಾರ್ಯದರ್ಶಿ ಅರವಿಂದ ಕುಲಕರ್ಣಿ ಎಚ್ಚರಿಕೆ ನೀಡಿದ್ದಾರೆ.

ದೇಶದ ರೈತರ ಜಮೀನುಗಳನ್ನು ನುಂಗಿ ನೀರು ಕುಡಿದು ರೈತರ ಬದುಕನ್ನೇ ಬೀದಿಗೆ ತಳ್ಳಲು ಹೊಂಚು ಹಾಕಿರುವ ವಕ್ಫ್​ ಬೋರ್ಡ್​ ರೈತರಿಗೆ ಮೋಸ ಮಾಡುತ್ತಿದೆ. ಕಾನೂನು ಏನೇ ಇದ್ದರು ಕೂಡ ವಕ್ಫ್​ ಟ್ರಿಬ್ಯೂನಲ್​ನಲ್ಲಿಯೇ ರೈತರು ನ್ಯಾಯಕ್ಕಾಗಿ ಪಹಣಿ ಹಿಡಿದುಕೊಂಡು ಕೈ ಕಟ್ಟಿ ನಿಂತು ನ್ಯಾಯ ಕೇಳಬೇಕೆಂಬ ಹುನ್ನಾರ ಇಡೀ ದೇಶದ ರೈತರ ನಿದ್ದೆಗೆಡಿಸುವಂತೆ ಮಾಡಿದ್ದು, ನಮ್ಮದೆ ಆದ ಕಾನೂನನ್ನು ಹೊಂದಿದ್ದೇವೆ ಎಂದು ಬೀಗುತ್ತಿರುವ ವಕ್ಫ್​ ನವರಿಗೆ ಬುದ್ದಿ ಕಲಿಸಬೇಕಾದರೆ ಮುಂಬರುವ ಚಳಿಗಾಲದ ಸಂಸತ ಅಧಿವೇಶನದಲ್ಲಿ 1954 ರಲ್ಲಿ ರಚನೆಯಾದ ವಕ್ಪ್​ ಕಾಯ್ದೆಯನ್ನೇ ಸಂಪೂರ್ಣ ರದ್ದುಪಡಿಸಿ ಈ ದೇಶದಿಂದಲೇ ವಕ್ಫ್​ ಬೋರ್ಡ್​ ಪವಿತ್ರ ನೆಲದಿಂದಲೇ ಬೇರುಸಮೇತ ಕೀಳಬೇಕು ಎಂದು ಅವರು ಆಗ್ರಹಿಸಿದ್ದಾರೆ.

ಹಾಗೇ ಸುಮ್ಮನೆ ಬಿಟ್ಟರೇ, ಮುಂದಿನ ದಿನಗಳಲ್ಲಿ ದೇಶದ ವಕ್ಫ್​ ಬೋರ್ಡ್​ಗಳು ಇಡೀ ದೇಶವೇ ವಕ್ಪ್​ ಬೋರ್ಡ್​ಗೆ ಸಂಬಂಧಿಸಿದ್ದು ಎಂದು ವಾದ ಮಾಡಲು ಹಿಂದೆ ಮುಂದೆ ನೋಡುವುದಿಲ್ಲ. ಬ್ರಿಟಿಷರಂತೆ ಇವರು ಕೂಡಾ ವಕ್ಪ್​ ಬೋರ್ಡ್​ಗಳ ಮೂಲಕ ದೇಶವನ್ನೇ ಆಳುವ ಹುನ್ನಾರ ನಡೆಸಿದ್ದಾರೆ. ಬೆಳೆಯುವ ಸಿರಿ ಮೊಳಕೆಯಲ್ಲಿ ಎಂಬಂತೆ ವಕ್ಫ್​ ಬೋರ್ಡ್​ಗಳು ಹೆಮ್ಮರವಾಗಿ ಬೆಳೆಯುವ ಮುಂಚೆ ಇವುಗಳನ್ನು ಬೇರು ಸಮೇತ ಕಿತ್ತಿ ಬಿಸಾಕಬೇಕು. ಸದ್ಯ ವಿವಾದ ಸೃಷ್ಟಿಸಿರುವ ವಕ್ಪ್​ ಬೋರ್ಡ್​ಗಳ ಗಿಡಗಳನ್ನು ನೆಟ್ಟಿದ್ದೇ ಕಾಂಗ್ರೆಸ್​ನವರು. ಅದರ ಉದಯಕ್ಕೆ ಮೂಲ ಕಾರಣವೇ ಕಾಂಗ್ರೆಸ್​ ಎಂದು ಅವರು ಆಕ್ರೋಶ ಹೊರ ಹಾಕಿದ್ದಾರೆ.

ಹೊಲದಲ್ಲಿರುವ ಕಾಂಗ್ರೆಸ್​ ಕಸ (ಪಾರ್ಥೇನಿಯಂ) ಎಂಬುದು ಎಷ್ಟು ವಿಷಕಾರಿಯೋ ಕಾಂಗ್ರೆಸ್​ ಪಕ್ಷವು ಅಷ್ಟೇ ವಿಷಕಾರಿ. ದೇಶಕ್ಕೆ ಸ್ವಾತಂತ್ರ ನಾವೇ ತಂದು ಕೊಟ್ಟಿದ್ದೇವೆ ಎಂದು ಹೇಳುತ್ತಾ ಸಿಕ್ಕ ಸ್ವಾತಂತ್ರವನ್ನು ಕಸಿದುಕೊಂಡು ವಕ್ಫ್​ ಬೋರ್ಡ್​ನವರಿಗೆ ಕೊಡಲು ಹೊರಟ್ಟಿದ್ದಾರೆ. ಪ್ರಧಾನ ಮಂತ್ರಿಗಳು ವಕ್ಫ್​ ಬೋರ್ಡ್​ಗಳ ಪುಂಡಾಟವನ್ನು ಗಂಭೀರವಾಗಿ ಪರಿಗಣಿಸಿ ಮುಂಬರುವ ಚಳಿಗಾಲದ ಸಂಸತ ಅಧಿವೇಶನದಲ್ಲಿ ರ್ನಿಣಯ ಕೈಗೊಳ್ಳಬೇಕು. ಅಲ್ಲದೆ, ಇಡೀ ವಕ್ಪ್​ ಕಾಯ್ದೆಯನ್ನೇ ರದ್ದು ಪಡಿಸುವ ಮೂಲಕ ದೇಶದ ರೈತರು ನೆಮ್ಮದಿಯ ಜೀವನ ನಡೆಸುವಂತೆ ಕ್ರಮ ಕೈಗೊಳ್ಳಬೇಕು. ಇಲ್ಲದಿದ್ದರೆ, ದೆಹಲಿಯ ಜಂತರ್​ ಮಂತರ್​ನಲ್ಲಿ ಉಪವಾಸ ಸತ್ಯಾಗ್ರಹ ಕುಳಿತುಕೊಳ್ಳಲಾಗುವುದು ಎಂದು ಪ್ರಕಟಣೆಯ ಮೂಲಕ ಅರವಿಂದ ಕುಲಕರ್ಣಿ ಕೇಂದ್ರ ಸರ್ಕಾರಕ್ಕೆ ಎಚ್ಚರಿಕೆ ನೀಡಿದ್ದಾರೆ.