ಅಧ್ವಾನಗೊಂಡಿದ್ದ ಟೆನಿಸ್​ ಕೋರ್ಟ್​ಗೆ ಮರುಜೀವ

ತುಮಕೂರು: ವಿವಿ ಆವರಣದಲ್ಲಿ ನಿರ್ವಹಣೆ ಇಲ್ಲದೆ ಹಾಳಾಗಿದ್ದ ಟೆನಿಸ್​ ಕೋರ್ಟ್​ಗೆ ಮರುಜೀವ ನೀಡಲು ಜಿಲ್ಲಾಡಳಿತ ಮುಂದಾಗಿದೆ. ಕರ್ನಾಟಕ ಸೌರಶಕ್ತಿ ಅಭಿವೃದ್ಧಿ ನಿಗಮದ ಸಹಯೋಗದಲ್ಲಿ 75 ಲಕ್ಷ ರೂ., ವೆಚ್ಚದಲ್ಲಿ ಟೆನಿಸ್​ ಕ್ರೀಡಾಂಗಣ ಹಾಗೂ ಆಟಗಾರರ ಕೊಠಡಿ ನವೀಕರಣ ಕಾಮಗಾರಿಗೆ ಶನಿವಾರ ಜಿಲ್ಲಾ ಉಸ್ತುವಾರಿ ಸಚಿವ ಡಾ.ಜಿ.ಪರಮೇಶ್ವರ ಚಾಲನೆ ನೀಡಿದರು.

ಈ ವೇಳೆ ಮಾತನಾಡಿದ ಅವರು, ಟೆನಿಸ್​ ಕೋರ್ಟ್​ ನವೀಕರಣ ಕಾಮಗಾರಿ ನಾಲ್ಕು ತಿಂಗಳಲ್ಲಿ ಪೂರ್ಣಗೊಳ್ಳಲಿದ್ದು, ಉದ್ಘಾಟನೆ ಸಂದರ್ಭದಲ್ಲಿ ಎಟಿಪಿ ಟೂರ್ನಿ ಆಯೋಜಿಸುವ ಭರವಸೆಯಿತ್ತರು. 2003ರಲ್ಲಿ ಎಟಿಪಿ ರ್ಯಾಂಕ್​ ಟೆನಿಸ್​ ಟೂರ್ನಮೆಂಟ್​ ಆಯೋಜಿಸಲು ಮನವಿ ಬಂದ ಹಿನ್ನೆಲೆ ಈ ಜಾಗವನ್ನು ಗುರುತಿಸಿ, ಎರಡೇ ತಿಂಗಳಲ್ಲಿ ಅಂತಾರಾಷ್ಟ್ರೀಯ ಗುಣಮಟ್ಟದ ಟೆನಿಸ್​ ಅಂಕಣಗಳನ್ನು ನಿರ್ಮಿಸಲಾಯಿತು. ಅಂದಿನ ಟೂರ್ನಿಯಲ್ಲಿ ಅಂತಾರಾಷ್ಟ್ರೀಯ ಟೆನಿಸ್​ ಕ್ರೀಡಾಪಟುಗಳು ಭಾಗವಹಿಸಿದ್ದರು. ತದನಂತರ ಇದರ ನಿರ್ವಹಣೆ ಹೊಣೆಯನ್ನು ತುಮಕೂರು ಟೆನಿಸ್​ ಅಸೋಸಿಯೇಷನ್​ಗೆ ವಹಿಸಲಾಯಿತು. ಕೆಲವು ದಿನ ನಿರ್ವಹಣೆ ಮಾಡಲಾಯಿತಾದರೂ ಸಂಪನ್ಮೂಲ ಕೊರತೆಯಿಂದ ಕೈಚೆಲ್ಲಿದರು. ಆ ನಂತರ ಟೆನಿಸ್​ ಅಂಕಣದ ರ್ಟ್​ ಕಿತ್ತುಬರಲಾರಂಭವಾಯಿತು. ಈಗ ಕೋರ್ಟ್​ಗೆ ಮರುಜೀವ ನೀಡಲಾಗುವುದು ಎಂದರು.

ರಾಜ್ಯಮಟ್ಟದ ಕ್ರೀಡಾಕೂಟ: ಅಂರಾಷ್ಟ್ರೀಯ ಗುಣಮಟ್ಟದ ಕ್ರೀಡಾಂಗಣ ತುಮಕೂರಿನಲ್ಲಿದ್ದು ಈ ಬಾರಿ ರಾಜ್ಯಮಟ್ಟದ ಕ್ರೀಡಾಕೂಟದ ಆತಿಥ್ಯವಹಿಸುವ ಅವಕಾಶ ಒದಗಿಬಂದಿದೆ. ಅಥ್ಲೆಟಿಕ್ಸ್​, ಬ್ಯಾಸ್ಕೆಟ್​ಬಾಲ್​, ಜಿಮ್ನಾಸ್ಟಿಕ್ಸ್​, ಈಜು, ಶಟಲ್​ ಬ್ಯಾಡ್ಮಿಂಟನ್​ ಸೇರಿದಂತೆ ಎಲ್ಲ ರೀತಿಯ ಕ್ರೀಡೆಗಳನ್ನು ಆಯೋಜಿಸಲಾಗುವುದು ಎಂದು ಪರಮೇಶ್ವರ ತಿಳಿಸಿದರು.

ಈ ಸಂದರ್ಭದಲ್ಲಿ ಜಿಲ್ಲಾಧಿಕಾರಿ ಶುಭಕಲ್ಯಾಣ್​, ಜಿಪಂ ಸಿಇಒ ಜಿ.ಪ್ರಭು, ತುಮಕೂರು ವಿವಿ ಕುಲಪತಿ ಪ್ರೊ.ಎಂ.ವೆಂಕಟೇಶ್ವರಲು, ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ ಕೆ.ವಿ.ಅಶೋಕ್​, ಎಡಿಸಿ ಡಾ.ಎನ್​.ತಿಪ್ಪೇಸ್ವಾಮಿ, ಕುಲಸಚಿವ ಪ್ರೊ.ಕೆ.ಪ್ರಸನ್ನಕುಮಾರ್​, ಕ್ರೀಡಾ ಇಲಾಖೆ ಸಹಾಯಕ ನಿರ್ದೇಶಕ ರೋಹಿತ್​ ಗಂಗಾಧರ ಮತ್ತಿತರರು ಉಪಸ್ಥಿತರಿದ್ದರು.