ಉಡುಪಿಯಲ್ಲಿ ಅಪಾಯಕಾರಿ ಸಿಗ್ನಲ್​ ಲೈಟ್​ ಕಂಬಗಳ ತೆರವು

ಪೊಲೀಸರಿಂದ ತೆರವು ಕಾರ್ಯಾಚರಣೆ

ವಿಜಯವಾಣಿ ಸುದ್ದಿಜಾಲ ಉಡುಪಿ

ನಗರದ ರಸ್ತೆಗಳ ಪಕ್ಕದಲ್ಲಿ ಅಪಾಯಕಾರಿ ಸ್ಥಿತಿಯಲ್ಲಿದ್ದ ಅನುಪಯುಕ್ತ ಸಿಗ್ನಲ್​ ಲೈಟ್​ ಕಂಬಗಳ ತೆರವು ಕಾರ್ಯಾಚರಣೆ ನಡೆಯಿತು.

ಜಿಲ್ಲಾ ಪೋಲಿಸ್​ ವರಿಷ್ಠಾಧಿಕಾರಿ ಹರಿರಾಮ ಶಂಕರ್​ ನೇತೃತ್ವದಲ್ಲಿ ನಗರದ ವಿವಿಧೆಡೆ ಇದ್ದ ಅನುಪಯುಕ್ತ ಕಂಬಗಳನ್ನು ಕ್ರೇನ್​ ಬಳಸಿ ಜುಲೈ 27ರಂದು ತೆರವು ಮಾಡಲಾಯಿತು. ಮುನ್ನೆಚ್ಚರಿಕೆಯ ಕ್ರಮವಾಗಿ ಕೆಲಸಮಯ ವಾಹನ ಸಂಚಾರ ನಿಯಂತ್ರಿಸಲಾಗಿತ್ತು.

ಕಬ್ಬಿಣದ ಕಂಬಗಳಾಗಿದ್ದರಿಂದ ತುಕ್ಕು ಹಿಡಿದಿತ್ತು. ನಿರಂತರ ಮಳೆ-ಗಾಳಿಗೆ ಉರುಳಿ ಬೀಳುವ ಸ್ಥಿತಿಯಲ್ಲಿದ್ದವು. ಅಂತಹ ಸಿಗ್ನಲ್​ ಕಂಬಗಳನ್ನು ತೆರವುಗೊಳಿಸಿ ಸಂಭವನೀಯ ದುರಂತ ತಪ್ಪಿಸಬೇಕೆಂದು ಇತ್ತೀಚೆಗೆ ಸಾಮಾಜಿಕ ಕಾರ್ಯಕರ್ತರಾದ ನಿತ್ಯಾನಂದ ಒಳಕಾಡು ಹಾಗೂ ತಾರಾನಾಥ​ ಮೇಸ್ತ ಶಿರೂರು ಮಾಧ್ಯಮಗಳ ಮೂಲಕ ಒತ್ತಾಯಿಸಿದ್ದರು.