ಉಡುಪಿ: ಕಟ್ಟಡ ಕಾರ್ಮಿಕ ಕಲ್ಯಾಣ ಮಂಡಳಿ ಕಾಯಿದೆ ಅಡಿಯಲ್ಲಿ ರಚಿತವಾದ ಕಲ್ಯಾಣ ಮಂಡಳಿಯಲ್ಲಿ ಬೋಗಸ್ ಕಾರ್ಡುಗಳು ಹೆಚ್ಚಾಗಿವೆ ಎಂಬ ನೆಪವೊಡ್ಡಿ ಈ ಬಾರಿ ರಾಜ್ಯ ಸರ್ಕಾರ ಶೇ. 75 ರಿಂದ -80 ರಷ್ಟು ಸ್ಕಾಲರ್ಶಿಪ್ ಕಡಿತ ಮಾಡುತ್ತಿರುವುದು ಖಂಡನೀಯ ಎಂದು ಸಿಡಬ್ಲೂಎಫ್ಐ ರಾಜ್ಯ ಅಧ್ಯಕ್ಷ ಬಾಲಕೃಷ್ಣ ಶೆಟ್ಟಿ ಹೇಳಿದ್ದಾರೆ.
ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಹಿಂದಿನ ಸರ್ಕಾರ 1 ರಿಂದ 4 ತರಗತಿವರೆಗೆ 5000 ರೂ. ನೀಡಿತ್ತು. ಈಗ ಕೇವಲ 1100 ರೂ. ನೀಡಿದ್ದಾರೆ. 5 ರಿಂದ 8ನೇ ತರಗತಿವರೆಗೆ 8000 ಇತ್ತು. ಈಗ 1250 ರೂ., 9 ರಿಂದ 10ನೇ ತರಗತಿವರಿಗೆ 12000 ಇದ್ದದ್ದು 3000 ರೂ., ಪ್ರಥಮ ಮತ್ತು ದ್ವೀತಿಯ ಪಿಯುಸಿ 15000 ದಿಂದ 4600 ರೂ. ಪದವಿ 25000 ದಿಂದ 6000 ರೂ., ಸ್ನಾತಕೋತ್ತರ ಪದವಿ 35000 ದಿಂದ 10,000 ರೂ., ಪಾಲಿಟೆಕ್ನಿಕ್, ಡಿಪ್ಲಮೋ, ಐಟಿಐ 20000ದಿಂದ 4600, ಬಿಎಸ್ ನರ್ಸಿಂಗ್, ಪ್ಯಾರಾ ಮೆಡಿಕಲ್ 40,000 ದಿಂದ 10,000 ರೂ., ವೈದ್ಯಕಿಯ 60,000 ದಿಂದ 11000ಕ್ಕೆ ಇಳಿಕೆಯಾಗಿದೆ. ಇದರಿಂದ ಬಡ ವಿದ್ಯಾರ್ಥಿಗಳಿಗೆ ಬಹಳಷ್ಟು ತೊಂದರೆ ಉಂಟಾಗಿದೆ. ಸ್ಕಾಲರ್ಶಿಪ್ ಸಿಗುತ್ತದೆ ಎಂದು ಅನೇಕ ಕಟ್ಟಡ ಕಾರ್ಮಿಕರು ತಮ್ಮ ಮಕ್ಕಳನ್ನು ಉನ್ನತ ಶಿಕ್ಷಣಕ್ಕೆ ಕಳುಹಿಸುತ್ತಿದ್ದಾರೆ ಎಂದು ಹೇಳಿದರು.
