ಪಟಾಕಿ ದರ ದುಬಾರಿ: ಎರಡು ದಿನ ದೀಪಾವಳಿ, ಕನ್ನಡ ರಾಜ್ಯೋತ್ಸವ ಸೇರಿ ವಾರಾಂತ್ಯದ ಸಾಲು ಸಾಲು ರಜೆಗಳಿಂದಾಗಿ ರಾಜ್ಯ ರಾಜಧಾನಿ ಬೆಂಗಳೂರು ಸೇರಿ ಹಲವು ಕಡೆ ಉದ್ಯೋಗ ನಿಮಿತ್ತ ನೆಲೆಕಂಡುಕೊಂಡಿರುವ ಗ್ರಾಮಾಂತರ ಜಿಲ್ಲೆಯ ಬಹುತೇಕರು ತವರಿಗೆ ಮರಳಿದ್ದರು. ಈ ಬಾರಿ ಪಟಾಕಿ ಅಬ್ಬರವಾರಗಲಿದೆ ಎಂಬ ಮಾತು ಕೇಳಿಬರುತ್ತಿತ್ತು. ಆದರೆ ಈ ಬಾರಿ ಅದೆಲ್ಲ ತಲೆಕೆಳಗಾಗಿದೆ. ಕಳೆದ ನಾಲ್ಕೈದು ವರ್ಷಗಳಿಗೆ ಹೋಲಿಸಿದರೆ ಈ ಬಾರಿ ಪಟಾಕಿ ದರದಲ್ಲಿ ಭಾರಿ ಏರಿಕೆ ಕಂಡುಬಂದಿತ್ತು, ಜಿಲ್ಲಾಡಳಿತದ ಕಠಿಣ ಕ್ರಮದಿಂದಾಗಿ ಅಕ್ರಮವಾಗಿ ಪಟಾಕಿ ಮಾರಾಟವವರಿಗೆ ಕಡಿವಾಣ ಬಿದ್ದಿತ್ತು. ಹಸಿರು ಪಟಾಕಿಗಳಿಗಷ್ಟೇ ಅನುಮತಿ ಹಿನ್ನೆಲೆಯಲ್ಲಿ ಪಟಾಕಿ ವ್ಯಾಪಾರಿಗಳು ಹೆಚ್ಚಿನ ಆಸಕ್ತಿ ತೋರಿಸಿರಲಿಲ್ಲ. ಪಟಾಕಿಗಳ ದಾಸ್ತಾನು ಸೇರಿ ಪಟಾಕಿ ಮಾರಾಟಕ್ಕೆ ನಿಗಧಿತ ಸ್ಥಳದ ನಿಗಧಿ ಮಾಡಿದ್ದರಿಂದ ಎಲ್ಲೆಂದರಲ್ಲಿ ಪಟಾಕಿ ಮಾರಲು ಅವಕಾಶವಿಲ್ಲದಂತಾಗಿತ್ತು. ಇದರಿಂದ ಬೆರಳೇಣಿಕೆಗಡೆಗಷ್ಟೇ ವ್ಯಾಪಾರ ಕಂಡುಬಂತು. ಈ ಹಿನ್ನೆಲೆಯಲ್ಲಿ ವ್ಯಾಪಾರಿಗಳೂ ಪಟಾಕಿ ದರ ಹೆಚ್ಚಿಸಿದ್ದರಿಂದ ಗ್ರಾಹಕರು ಪಟಾಕಿ ಖರೀದಿಗೆ ಹಿಂದೇಟು ಹಾಕುತ್ತಿದ್ದ ದೃಶ್ಯ ಕಂಡುಬಂತು.
