ವಿದ್ಯುತ್​ ಸಂಪರ್ಕ ಕಾಯ್ದೆ ಮರುಪರಿಶೀಲನೆ ಮಾಡಿ

ಆನೇಕಲ್​ : ವಿದ್ಯುತ್​ ಸಂಪರ್ಕ ಕಾಯ್ದೆಯನ್ನು ಮರುಪರಿಶೀಲಿಸಬೇಕು. ಏಕಾಏಕಿ ನಿಯಮಗಳನ್ನು ಬದಲಾಯಿಸುವುದರಿಂದ ಸಾರ್ವಜನಿಕರಿಗೆ ಮತ್ತು ವಿದ್ಯುತ್​ ಗುತ್ತಿಗೆದಾರರಿಗೆ ತೊಂದರೆಯಾಗಲಿದೆ ಎಂದು ವಿದ್ಯುತ್​ ಗುತ್ತಿಗೆದಾರ ಶಿವಾನಂದ ರೆಡ್ಡಿ ಹೇಳಿದರು.

ವಿವಿಧ ಬೇಡಿಕೆ ಈಡೇರಿಕೆಗೆ ಒತ್ತಾಯಿಸಿ ಆನೇಕಲ್​ ತಾಲೂಕು ವಿದ್ಯುತ್​ ಗ್ರಾಹಕರಿಂದ ತಾಲೂಕಿನ ಸೂರ್ಯ ನಗರದಲ್ಲಿ ಶುಕ್ರವಾರ ಪ್ರತಿಭಟನೆ ನಡೆಸಿ ಮಾತನಾಡಿದ ಅವರು, ಸಾಲ ಮಾಡಿ ಮನೆ ಕಟ್ಟುವವರಿಗೆ ದಾಖಲೆಗಳು ಇಲ್ಲದೇ ವಿದ್ಯುತ್​ ಪೂರೈಕೆ ಮಾಡುತ್ತಿಲ್ಲ. ಬಿಬಿಎಂಪಿ ಖಾತೆಗಳಿಗೂ ಸಹ ವಿದ್ಯುತ್​ ಸಂಪರ್ಕ ಇಲ್ಲ. ರಾಜ್ಯ ಸರ್ಕಾರದ ವಿದ್ಯುತ್​ ಸಂಪರ್ಕ ಕಾಯ್ದೆಯನ್ನು ಮರುಪರಿಶೀಲನೆ ನಡೆಸುವ ಅವಶ್ಯಕತೆಯಿದೆ. ರಾಜ್ಯ ಸರ್ಕಾರ ತರಾತುರಿಯಲ್ಲಿ ಕಾಯ್ದೆ ಮಂಡಿಸಿದೆ. ತಾತ್ಕಾಲಿಕ ವಿದ್ಯುತ್​ ಸಂಪರ್ಕ ಪಡೆದಿರುವ ಕಟ್ಟಡಗಳಿಗೆ ವಿದ್ಯುತ್​ ಸಂಪರ್ಕ ಕಾಯ್ದೆಯಿಂದ ಹೆಚ್ಚು ತೊಂದರೆಯಾಗಲಿದೆ. ಹೊಸ ಮನೆಗಳನ್ನು ಕಟ್ಟುವವರಿಗೆ ಬೆಸ್ಕಾಂ ಇಲಾಖೆ ಸಿಸಿ(ಕಂಪ್ಲೆಷನ್​ ಸರ್ಟಿಫಿಕೇಟ್​) ಮತ್ತು ಓಸಿ(ಒಕ್ಯೂಪೆನ್ಸಿ ಸರ್ಟಿಫಿಕೇಟ್​) ಕೇಳುತ್ತಿದ್ದಾರೆ. ಏಕಾಏಕಿ ಹೊಸ ಹೊಸ ನಿಯಮ ರೂಪಿಸುವುದರಿಂದ ಸಾರ್ವಜನಿಕರಿಗೆ ತೊಂದರೆಯಾಗಲಿದೆ. ಇದನ್ನೇ ನಂಬಿರುವ ವಿದ್ಯುತ್​ ಗುತ್ತಿಗೆದಾರರಿಗೂ ನಷ್ಟವಾಗಲಿದೆ ಎಂದರು.

ಚಂದಾಪುರ ವಿಭಾಗದಲ್ಲಿ ವಿದ್ಯುತ್​ ಪರವಾನಗಿ ಪಡೆಯಲು ಅರ್ಜಿ ಸಲ್ಲಿಸಿದವರಿಗೆ ತ್ವರಿತವಾಗಿ ಆರ್​ಆರ್​ ನಂಬರ್​ ನೀಡಬೇಕು ವಿದ್ಯುತ್​ ಸಂಪರ್ಕ ಮೂಲ ಸೌಲಭ್ಯವಾಗಿದ್ದು, ತ್ವರಿತಗತಿಯಲ್ಲಿ ವಿದ್ಯುತ್​ ಸಂಪರ್ಕ ನೀಡಬೇಕು. ಸಾರ್ವಜನಿಕರು ಹಣ ಸಂದಾಯ ಮಾಡಿದ್ದರೂ ವಿದ್ಯುತ್​ ಮಾಪಕಗಳು ದೊರೆಯುತ್ತಿಲ್ಲ. ಈ ಬಗ್ಗೆ ಅಧಿಕಾರಿಗಳನ್ನು ಕೇಳಿದಾಗ ಓಸಿ, ಸಿಸಿಗೆ ಕೇಳುತ್ತಾರೆ. ಈ ದಾಖಲೆಗಳನ್ನು ಪಡೆಯುವುದೇ ಸಾರ್ವಜನಿಕರಿಗೆ ದೊಡ್ಡ ತೊಂದರೆಯಾಗಿದೆ ಎಂದರು.