ಪ್ರಾಕೃತಿಕ ವಿಕೋಪ ಸಂಭವಿಸಿದ್ದ ಪ್ರದೇಶದಲ್ಲಿ ಮತ್ತೆ ಅಂಥ ದುರ್ಘಟನೆಗಳು ನಡೆಯದಂತೆ ತಡೆಯಲು ಭಾರತೀಯ ಭೂ ಸರ್ವೇಕ್ಷಣಾ ಇಲಾಖೆಯ ತಜ್ಞರ ತಂಡ ಕೆಲವೊಂದು ಪರಿಹಾರೋಪಾಯಗಳನ್ನೂ ಸೂಚಿಸಿತ್ತು. ತಲಕಾವೇರಿಯಲ್ಲಿ ಭೂಕುಸಿತ ಸಂಭವಿಸದಂತೆ ತುರ್ತಾಗಿ ’ಸ್ಲೋಪ್ಗ್ರೇಡಿಂಗ್’ ಮತ್ತು ತಡೆಗೋಡೆ ನಿರ್ಮಿಸಬೇಕು, ಇಳಿಜಾರು ಪ್ರದೇಶಗಳಲ್ಲಿ ನೀರು ಸರಾಗವಾಗಿ ಹರಿಯಲು ಸಣ್ಣ ಏಕ ಸಾಲಿನ ಚರಂಡಿ ನಿರ್ಮಿಸಬೇಕು, ಇಳಿಜಾರು ಪ್ರದೇಶಗಳಲ್ಲಿ ಅಲ್ಲಲ್ಲಿ ಸಸ್ಯಗಳನ್ನು ನೆಡಬೇಕು, ಕೋರಂಗಾಲದಲ್ಲಿಯೂ ಇಳಿಜಾರು ಪ್ರದೇಶಗಳಲ್ಲಿ ಹೆಚ್ಚು ಸಸ್ಯಗಳನ್ನು ನೆಡಬೇಕು, ವಿರಾಜಪೇಟೆಯಲ್ಲಿ ಬೆಟ್ಟದ ಮೇಲೆ ಕಾಣಿಸಿಕೊಂಡಿರುವ ಬಿರುಕುಗಳನ್ನು ಅಗತ್ಯ ಸಾಮಗ್ರಿಗಳನ್ನು ಬಳಸಿ ಮುಚ್ಚಬೇಕು, ಆ ಸ್ಥಳದಲ್ಲಿ ತೇವಾಂಶ ಕಡಿಮೆಯಾಗುವಂತೆ ಮಾಡಬೇಕು, ಕೆಲವು ಸ್ಥಳಗಳಲ್ಲಿ ತಡೆಗೋಡೆ ನಿರ್ಮಿಸಿ ನೀರು ಸರಾಗ ಹರಿಯಲು ದಾರಿ ಮಾಡಿಕೊಡಬೇಕು, ಭೂಕುಸಿತ ಪ್ರದೇಶದ ಅಪಾಯಕಾರಿ ಮನೆಗಳನ್ನು ತೆರವುಗೊಳಿಸಬೇಕು, ತೋರದಲ್ಲೂ ’ಸ್ಲೋಪ್ ಗ್ರೇಡಿಂಗ್’ ತಡೆಗೋಡೆ ನಿರ್ಮಾಣ ಮಾಡಬೇಕು… ಹೀಗೆ ತಜ್ಞರು ನೀಡಿದ ಯಾವುದೇ ಸಲಹೆಗಳು ಕೂಡ ೬ ವರ್ಷಗಳಾದರೂ ಕಾರ್ಯರೂಪಕ್ಕೆ ಬಂದಿಲ್ಲ.
