'ನಾನೇ 50 ಲಕ್ಷ ಕೊಡ್ತೀನಿ.. ಸರ್ಕಾರ ನನ್ನ ಮಗನನ್ನು ತಂದು ಕೊಡಲಿ'

ಕುಣಿಗಲ್​: ನಾನೇ 50 ಲಕ್ಷ ಕೊಡ್ತೀನಿ. ನನ್ನ ಮಗ ರ್ಬತಾನಾ... ಅವನು ಅಪ್ಪ ಅಂತ ಜಸ್ಟ್​ ಕೂಗಲಿ ಸಾಕು... ಸರ್ಕಾರ ನನ್ನ ಮಗನನ್ನು ತಂದು ಕೊಡುತ್ತಾ.. ಹೀಗೆಂದು ಆರ್​ ಸಿಬಿ ವಿಜಯೋತ್ಸವ ವೇಳೆ ಸಂಭವಿಸಿದ ಕಾಲ್ತುಳಿತದಲ್ಲಿ ಸಾವನ್ನಪ್ಪಿದ ಮಗನ ಶವದ ಮುಂದೆ ದೇವರಾಜು ರೋಧಿಸುತ್ತಿದ್ದ ಪರಿ! ಈ ದೃಶ್ಯ ಎಂಥವರಲ್ಲು ಕಣ್ಣೀರ ಬರಿಸುತ್ತಿತ್ತು.

ಆಚೆ ಹೋಗಿ ಮನೆಗೆ ಬರುತ್ತೀನಿ ಅಂತಾ ಹೇಳಿದ್ದ ಮಗೆ ಕೊನೆಗೆ ಬಂದದ್ದು ಶವವಾಗಿ. ಇದ್ದೋವ್ನ ಒಬ್ಬ ಮಗ. ಇನ್ಯಾರನ್ನ ಮನೋಜ್​ ಅಂತ ಕರೆಯಲಿ ಎನ್ನುತ್ತಾ ಅತ್ತು ಅತ್ತು ನಿತ್ರಾಣರಾಗಿದ್ದ ತಾಯಿ ಗೌರಮ್ಮರನ್ನು ಸಮಾಧಾನ ಪಡಿಸಲು ಯಾರಿಂದಲು ಆಗಲಿಲ್ಲ.

ಬುಧವಾರ ಸಂಜೆ ಆರ್​ಸಿಬಿ ವಿಜಯೋತ್ಸವ ಸಂಭ್ರಮ ಕಣ್ತುಂಬಿಕೊಳ್ಳಲು ಚಿನ್ನಸ್ವಾಮಿ ಸ್ಟೇಡಿಯಂ ಬಳಿ ತೆರಳಿ ಕಾಲ್ತುಳಿದಲ್ಲಿ ಸಾವನ್ನಪ್ಪಿದ 19 ವರ್ಷದ ಮನೋಜ್​ ಮೃತ ದೇಹದೊಂದಿಗೆ ಹುಟ್ಟೂರು ತಾಲೂಕಿನ ನಾಗಸಂದ್ರ ಗ್ರಾಮಕ್ಕೆ ಕರೆತಂದಾಗ ಸಂಬಂಧಿಕರ, ನೆರೆಹೊರೆಯವರ ದು:ಖ ಹೇಳತೀರದು.

ಮಕ್ಕಳ ಉತ್ತಮ ಭವಿಷ್ಯಕ್ಕಾಗಿ ಹುಟ್ಟೂರು ಬಿಟ್ಟು ಬೆಂಗಳೂರಿನ ನ್ಯೂ ಯಲಹಂಕ ಟೌನ್​ನಲ್ಲಿ ನೆಲೆಸಿದ್ದ ದೇವರಾಜು, ಸಂಸಾರ ನಿರ್ವಹಣೆಗೆ ಪಾನೀಪೂರಿ ವ್ಯಾಪಾರ ಮಾಡುತ್ತಾ ಕಷ್ಟಪಟ್ಟು ದುಡಿದು ಮಕ್ಕಳ ಓದಿಗೆ ಅಷ್ಟೋಇಷ್ಟೋ ಉಳಿಸುತ್ತಿದ್ದರು. ಮನೋಜ್​ ಸಹ ಅಪ್ಪ-ಅಮ್ಮನ ಕಷ್ಟ ಕಂಡು ಉತ್ತಮವಾಗಿ ಓದುತ್ತಿದ್ದ. ಎಸ್ಸೆಸ್ಸೆಲ್ಸಿ, ಪಿಯುಸಿಯಲ್ಲಿ ಡಿಸ್ಟಿಂಕ್ಷನ್​ನಲ್ಲಿ ತೇರ್ಗಡೆಹೊಂದಿದ್ದ. ಇತ್ತೀಚೆಗೆ ದೊಡ್ಡ ಕನಸನ್ನು ಇಟ್ಟುಕೊಂಡು ಬಿಬಿಎ ಸೇರಿದ್ದ ಮನೋಜ್​ 3ನೇ ಸೆಮಿಸ್ಟರ್​ಗೆ ದಾಖಲಾಗಬೇಕಿತ್ತು. ಮಗಳು 9ನೇ ತರಗತಿ ಓದುತ್ತಿದ್ದ ಅಣ್ಣನಂತೆ ಆಕೆ ಕೂಡ ಓದಿನಲ್ಲಿ ಚುರುಕಾಗಿದ್ದಾಳೆ.

ಈ ಪುಟ್ಟ ಕುಟುಂಬಕ್ಕೆ ಆರ್​ಸಿಬಿ ಗೆಲುವು ದೊಡ್ಡ ಆಘಾತವಾಗಿ ಪರಿಣಮಿಸಿದೆ. ತನ್ನ ನೆಚ್ಚಿನ ಆರ್​ಸಿಬಿ ವಿಜಯೋತ್ಸವದಲ್ಲಿ ಭಾಗಿಯಾಗಲು ಚಿನ್ನಸ್ವಾಮಿ ಸ್ಟೇಢಿಯಂ ಬಳಿ ಸ್ನೇಹಿತರೊಂದಿಗೆ ತೆರಳಿದ್ದ ಮನೋಜ್​ ದುರಂತ ಅಂತ್ಯ ಕಂಡಿದ್ದು ಅಪ್ಪ-ಅಮ್ಮನ ಕನಸನ್ನು ನುಚ್ಚುನೂರು ಮಾಡಿ ಬಾರದ ಲೋಕಕ್ಕೆ ಪಯಣ ಬೆಳೆಸಿ ಬಿಟ್ಟಿದ್ದಾನೆ. ಗುರುವಾರ ಹುಟ್ಟೂರು ನಾಗಸಂದ್ರದಲ್ಲಿ ಮನೋಜ್​ ಅಂತ್ಯಕ್ರಿಯೆ ನೆರವೇರಿತು. ಕುಟುಂಬಸ್ಥರ ಆಕ್ರಂದನ ಮುಗಿಲುಮುಟ್ಟಿತ್ತು.