ರಟ್ಟಿಹಳ್ಳಿ ಪಪಂ ಆಗಿ ಮೇಲ್ದರ್ಜೆಗೆ : ಜನಪ್ರತಿನಿಧಿಗಳಿಲ್ಲದೆ ಅಭಿವೃದ್ಧಿ ಕುಂಠಿತ

ರಟ್ಟಿಹಳ್ಳಿ: ರಟ್ಟಿಹಳ್ಳಿ ಗ್ರಾಪಂ ಅನ್ನು ಸರ್ಕಾರ 2020ರ ಫೆಬ್ರವರಿ 12ರಂದು ಪಟ್ಟಣ ಪಂಚಾಯಿತಿಯನ್ನಾಗಿ ಮೇಲ್ದರ್ಜೆಗೇರಿಸಿದೆ. 2020ರ ಏಪ್ರಿಲ್ 21ರಿಂದ ರಟ್ಟಿಹಳ್ಳಿ ಪಟ್ಟಣ ಪಂಚಾಯಿತಿಯಾಗಿ ಕಾರ್ಯಾರಂಭ ಮಾಡಿದೆ. ಆದರೆ, ಇನ್ನೂತನಕ ಪಟ್ಟಣ ಪಂಚಾಯಿತಿಗೆ ಚುನಾವಣೆ ನಡೆಸದೇ ಇದ್ದರಿಂದ ಪಟ್ಟಣದಲ್ಲಿ ಕಳೆದ ನಾಲ್ಕು ವರ್ಷಗಳಿಂದ ಅಭಿವೃದ್ಧಿ ಕಾಮಗಾರಿಗಳು ಕುಂಠಿತಗೊಂಡಿವೆ.

ವಾರ್ಡ್​ಗಳಲ್ಲಿನ ಗಟಾರ, ರಸ್ತೆ, ವಿದ್ಯುತ್ ಕಂಬದ ಸಮಸ್ಯೆ, ಸ್ವಚ್ಛತೆ ಮರೀಚಿಕೆಯಾಗಿದೆ. ಬೀದಿ ನಾಯಿ, ಹಂದಿಗಳ ಹಾವಳಿ, ಕುಡಿಯುವ ನೀರಿನ ಸಮಸ್ಯೆ ಹೀಗೇ ಹಲವು ಸಮಸ್ಯೆಗಳು ಜನರನ್ನು ಕಾಡುತ್ತಿವೆ. ಇವುಗಳಿಗೆ ಪರಿಹಾರ ಕಂಡುಕೊಳ್ಳಲು ಜನಪ್ರತಿನಿಧಿಗಳೇ ಇಲ್ಲ. ಹೀಗಾಗಿ, ಜನರು ಸಮಸ್ಯೆಯನ್ನು ಯಾರಿಗೆ ಹೇಳಬೇಕು ಎಂಬುದು ಯಕ್ಷ ಪ್ರಶ್ನೆಯಾಗಿದೆ.

15 ವಾರ್ಡ್​ಗಳಾಗಿ ಮರುವಿಂಗಡಣೆ

ಪಟ್ಟಣ ಪಂಚಾಯಿತಿಯಾಗಿ ಮೇಲ್ದರ್ಜೆಗೇರಿದ ಬಳಿಕ ಜನಸಂಖ್ಯೆ ಮತ್ತು ಚೆಕ್​ಬಂದಿ ಅನುಗುಣವಾಗಿ ವಾರ್ಡ್​ಗಳನ್ನು ವಿಂಗಡಣೆ ಮಾಡಲಾಗಿದೆ. ಉಪವಿಭಾಗಾಧಿಕಾರಿಗಳು 2020ರ ಡಿಸೆಂಬರ್​ನಲ್ಲಿ 15 ವಾರ್ಡ್​ಗಳನ್ನು ವಿಂಗಡಣೆ ಮಾಡಿ ವರದಿಯನ್ನು ಸರ್ಕಾರಕ್ಕೆ ಸಲ್ಲಿಸಿದ್ದಾರೆ. ವಾರ್ಡ್ ವಿಂಗಡಣೆ ಬಳಿಕ 2022ರಲ್ಲಿ ಮೀಸಲಾತಿ ಘೊಷಿಸಲಾಗಿತ್ತು. ಮೀಸಲಾತಿ ಘೊಷಣೆ ಬಳಿಕ ವಾರ್ಡ್​ಗಳಲ್ಲಿ ಆಯಾ ಮೀಸಲಾತಿ ಸ್ಥಾನದ ಆಕಾಂಕ್ಷಿಗಳು ಪಟ್ಟಣದಲ್ಲಿ ಅನೇಕ ಕೆಲಸ ಕಾರ್ಯಗಳನ್ನು ಕೈಗೊಂಡಿದ್ದಾರೆ. ಚುನಾವಣೆ ಘೊಷಣೆಗೆ ಚಾತಕ ಪಕ್ಷಿಗಳಂತೆ ಕಾಯತ್ತಿದ್ದಾರೆ.

ಮೀಸಲಾತಿ ವಿವರ

ವಾರ್ಡ್ ಸಂಖ್ಯೆ-1 ಪರಿಶಿಷ್ಟ ಪಂಗಡ, ವಾ-2 ಹಿಂದುಳಿದ ವರ್ಗ (ಎ), ವಾ-3 ಹಿಂದುಳಿದ ವರ್ಗ (ಎ) ಮಹಿಳೆ, ವಾ-4 ಸಾಮಾನ್ಯ, ವಾ-5 ಹಿಂದುಳಿದ ವರ್ಗ (ಬಿ), ವಾ-6 ಸಾಮಾನ್ಯ ಮಹಿಳೆ, ವಾ-7 ಹಿಂದುಳಿದ ವರ್ಗ (ಎ) ಮಹಿಳೆ, ವಾ-8 ಸಾಮಾನ್ಯ ಮಹಿಳೆ, ವಾ-9 ಸಾಮಾನ್ಯ, ವಾ-10 ಹಿಂದುಳಿದ ವರ್ಗ (ಎ), ವಾ-11 ಸಾಮಾನ್ಯ ಮಹಿಳೆ, ವಾ-12 ಸಾಮಾನ್ಯ ಮಹಿಳೆ, ವಾ-13 ಸಾಮಾನ್ಯ, ವಾ-14 ಪರಿಶಿಷ್ಟ ಜಾತಿ, ವಾ-15 ಸಾಮಾನ್ಯ ವರ್ಗಕ್ಕೆ ಮೀಸಲಿರಿಸಿ ನಗರಾಭಿವೃದ್ಧಿ ಇಲಾಖೆ ಮೀಸಲಾತಿ ಘೊಷಿಸಿದೆ.