ರಾಣೆಬೆನ್ನೂರ- ಹರಿಹರ ಮಧ್ಯದ 22 ಕಿ.ಮೀ. ಪ್ರಯಾಣಕ್ಕೆ 49 ರೂಪಾಯಿ ಟಿಕೆಟ್ ದರ, ಪ್ರಯಾಣಿಕರ ಸ್ಥಿತಿ ಹರೋಹರ!

ವಿಜಯವಾಣಿ ವಿಶೇಷ ರಾಣೆಬೆನ್ನೂರ
ರಾಣೆಬೆನ್ನೂರ ನಗರದಿಂದ ಹರಿಹರ ಕೇವಲ 22 ಕಿ.ಮೀ. ದೂರದಲ್ಲಿದೆ. ಆದರೆ, ಇಲ್ಲಿಗೆ ಸಾರಿಗೆ ಸಂಸ್ಥೆಯ ಬಸ್ ಮೂಲಕ ತಲುಪಬೇಕಾದರೆ 49 ರೂ. ಟಿಕೆಟ್ ದರ ಕೊಡಬೇಕು. 22 ಕಿ.ಮೀ.ಗೆ ಇಷ್ಟೊಂದು ಹಣ ಎಂದು ಅಚ್ಚರಿ ಪಟ್ಟರೂ ಇದು ನಿಜ…!

ಹೌದು ರಾಣೆಬೆನ್ನೂರ ಬಸ್ ನಿಲ್ದಾಣದಿಂದ ಹರಿಹರಕ್ಕೆ ಸಾರಿಗೆ ಸಂಸ್ಥೆಯಿಂದ ತಡೆರಹಿತ ಬಸ್ ವ್ಯವಸ್ಥೆ ಮಾಡಲಾಗಿದೆ. ಈ ಬಸ್​ಗೆ ಟಿಕೆಟ್ ದರ 49 ರೂ. ನಿಗದಿಪಡಿಸಿರುವುದಕ್ಕೆ ಪ್ರಯಾಣಿಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ರಾಣೆಬೆನ್ನೂರ ನಗರದಿಂದ ಹಾವೇರಿ 36 ಕಿ.ಮೀ. ದೂರದಲ್ಲಿದೆ. ಇದರ ಪ್ರಯಾಣಕ್ಕೆ ತಡೆ ರಹಿತ ಬಸ್​ಗಳಿಗೆ 40 ರೂ. ಹಾಗೂ ಇತರ ಬಸ್​ಗಳಿಗೆ 36 ರೂ. ದರವಿದೆ. ಆದರೆ, ಇದಕ್ಕೂ ಹತ್ತಿರವಿರುವ ಹರಿಹರಕ್ಕೆ 49 ರೂ. ದರ ನಿಗದಿಪಡಿಸಿರುವುದು ಸರಿಯಲ್ಲ ಎಂಬುದು ಪ್ರಯಾಣಿಕರ ಅಳಲು.
ಟೋಲ್ ಹಣ ಪ್ರಯಾಣಿಕರಿಂದ ವಸೂಲಿ: ರಾಣೆಬೆನ್ನೂರ-ಹರಿಹರ ನಡುವೆ ರಾಷ್ಟ್ರೀಯ ಹೆದ್ದಾರಿ-48ರ ಚಳಗೇರಿ ಬಳಿ ಟೋಲ್ ಇದೆ. ಇಲ್ಲಿ ಸಾರಿಗೆ ಸಂಸ್ಥೆ ಬಸ್​ಗಳಿಗೆ ಒಂದು ಬಾರಿಗೆ 440 ರೂ. ಶುಲ್ಕವಿದೆ. ಎರಡೂ ಸೈಡ್ ಸೇರಿ 880 ರೂ. ಆಗುತ್ತದೆ. ಈ ಶುಲ್ಕವನ್ನು ಪ್ರಯಾಣಿಕರಿಂದ ಟಿಕೆಟ್ ಹಣದ ರೂಪದಲ್ಲಿ ವಸೂಲಿ ಮಾಡಲಾಗುತ್ತಿದೆ.

ಬಡವರಿಗೆ ಹೊರೆ: ರಾಣೆಬೆನ್ನೂರಿನಿಂದ ಹರಿಹರಕ್ಕೆ ನಿತ್ಯವೂ ಕೂಲಿ ಕಾರ್ವಿುಕರು, ಚಿಕ್ಕಪುಟ್ಟ ವ್ಯಾಪಾರ ಮಾಡುವವರು, ವಿದ್ಯಾರ್ಥಿಗಳು ಓಡಾಡುತ್ತಾರೆ. ಇವರಿಗೆ 22 ಕಿ.ಮೀ. ಪ್ರಯಾಣಕ್ಕೆ 49 ರೂ. ದರ ನೀಡುವುದು ಕಷ್ಟಕರವಾಗಿದೆ. ಬಸ್​ಗಿಂತ ಬೈಕ್​ನಲ್ಲಿ ಕಡಿಮೆ ಖರ್ಚಿನಲ್ಲಿ ಹೋಗಿ ಬರಬಹುದು. ಕಡಿಮೆ ಅಂತರದಲ್ಲಿರುವ ಹರಿಹರಕ್ಕೆ ಸಾರಿಗೆ ಸಂಸ್ಥೆಯವರು ಹೆಚ್ಚಿನ ದರ ನಿಗದಿ ಪಡಿಸಿರುವುದು ಸರಿಯಲ್ಲ. ಆದ್ದರಿಂದ ಟಿಕೆಟ್ ದರ ಕಡಿಮೆ ಮಾಡಬೇಕು ಎಂಬುದು ಪ್ರಯಾಣಿಕರ ಒತ್ತಾಯವಾಗಿದೆ.