ಇಸ್ಲಾಮಿಕ್ ಕ್ಯಾಲೆಂಡರ್ನಲ್ಲಿ ಬರುವ ಒಂಬತ್ತನೇ ತಿಂಗಳು ರಂಜಾನ್. ಜೀವಮಾನವಿಡೀ ಮಾಡಿದ ಪಾಪ ಮುಕ್ತಿಗೆ ಈ ತಿಂಗಳು ಪರಿಹಾರ ಎನ್ನುವುದು ಗ್ರಂಥಗಳಲ್ಲಿ ಉಲ್ಲೇಖವಿದೆ. ಈ ತಿಂಗಳು ಪ್ರಾತಃಕಾಲದಿಂದ ಮುಸ್ಸಂಜೆವರೆಗೆ 14 ತಾಸು ನೀರನ್ನೂ ಸೇವಿಸದೆ ವ್ರತಾನುಷ್ಠಾನ ಮಾಡಬೇಕಾಗುತ್ತದೆ. ದೇವಾರಾಧನೆ, ದಾನಕ್ಕೆ ಮೊದಲ ಆದ್ಯತೆ. ತಿಂಗಳ ಕೊನೆಯಲ್ಲಿ ಕಡ್ಡಾಯ ದಾನವೂ ನಡೆಯುತ್ತದೆ. ಅಪ್ರಾಪ್ತರು, ಬುದ್ಧಿಮಾಂದ್ಯರು, ರೋಗಿಗಳು, ಬಾಣಂತಿಯರಿಗೆ ರಿಯಾಯಿತಿ ಇದೆ. ಉಳಿದವರಿಗೆ ವ್ರತಾನುಷ್ಠಾನ ಕಡ್ಡಾಯ. ಈ ತಿಂಗಳಾರಂಭ ಚಂದ್ರ ದರ್ಶನದ ಮೂಲಕ ನಿರ್ಧಾರವಾಗಲಿದೆ. ಶನಿವಾರ ರಾತ್ರಿ ಚಂದ್ರದರ್ಶನವಾದರೆ ಶಾಬಾನ್ ತಿಂಗಳು ಕೊನೆಯಾಗಿ ಭಾನುವಾರದಿಂದ ರಂಜಾನ್ ಆರಂಭಗೊಳ್ಳಲಿದೆ. ಶನಿವಾರ ಚಂದ್ರದರ್ಶನ ಆಗದಿದ್ದರೆ ಸೋಮವಾರದಿಂದ ರಂಜಾನ್ ಆರಂಭಗೊಳ್ಳಲಿದೆ.
