ಯುವಕನ ಮೇಲೆ ಪೆಟ್ರೋಲ್ ಸುರಿದು ಕೊಲೆಗೆ ಯತ್ನ

ಸಂಬಂಧಿ ಯುವತಿಯನ್ನೇ ಪ್ರೀತಿಸುತ್ತಿದ್ದ ಯುವಕ, ಅಪಹರಿಸಿ ಕೊಲೆಗೆ ಯತ್ನ

ರಾಮನಗರ: ಪ್ರೀತಿಗೆ ವಿರೋಧ ವ್ಯಕ್ತಪಡಿಸಿದ್ದ ಯುವತಿ ಸಂಬಂಧಿಕರು, ಯುವಕನ ಮೇಲೆ ಪೆಟ್ರೋಲ್​ ಸುರಿದು ಕೊಲೆಗೆ ಯತ್ನಿಸಿರುವ ಘಟನೆ ಶನಿವಾರ ಕುಂಬಳಗೂಡು ಪೊಲೀಸ್​ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ.

ಬೆಂಗಳೂರಿನ ರಾಜರಾಜೇಶ್ವರಿ ನಗರದ ನಿವಾಸಿ ಶಶಾಂಕ್​ (18) ತೀವ್ರ ಸುಟ್ಟಗಾಯಗಳಿಂದ ಚಿಕಿತ್ಸೆ ಪಡೆಯುತ್ತಿರುವ ಪ್ರೇಮಿ.
ಆರ್​ ಆರ್​ ನಗರದ ನಿವಾಸಿ ರಂಗನಾಥ್​ ಮತ್ತು ಸತ್ಯಪ್ರೇಮ ದಂಪತಿಯ ಪುತ್ರ ಶಶಾಂಕ್​, ರಾಜರಾಜೇಶ್ವರಿ ಮೆಡಿಕಲ್​ ಕಾಲೇಜು ಬಳಿ ಇರುವ ಎಸಿಎಸ್​ ಇಂಜಿನಿಯರಿಂಗ್​ ಕಾಲೇಜಿನಲ್ಲಿ ಕಂಪ್ಯೂಟರ್​ ಸೈನ್ಸ್​ ವ್ಯಾಸಂಗ ಮಾಡುತ್ತಿದ್ದು, ತನ್ನ ಹತ್ತಿರದ ಸಂಬಂಧಿ ಯುವತಿಯನ್ನು ಪ್ರೀತಿಸುತ್ತಿದ್ದಾನೆ.

ಈ ಪ್ರೀತಿಗೆ ಯುವತಿ ಮನೆಯಲ್ಲಿ ವಿರೋಧವಿತ್ತು. ಇದರ ಹೊರತಾಗಿಯೂ ಯುವತಿ ಕಳೆದ ಸೋಮವಾರ ಶಶಾಂಕ್​ ಜೊತೆಗೆ ಅವರ ಮನೆಗೂ ತೆರಳಿದ್ದಳು. ಈ ಮಾಹಿತಿ ಪಡೆದ ಯುವತಿ ಪಾಲಕರು ಶಶಾಂಕ್​ ಮನೆಗೆ ನುಗ್ಗಿದ್ದ, ಆತನ ಮೇಲೆ ಹಲ್ಲೆ ನಡೆಸಿ, ಯುವತಿಯನ್ನು ಕರೆದುಕೊಂಡು ಹೋಗಿದ್ದರು.

ಆದರೆ, ಶನಿವಾರ ತಂದೆ ರಂಗನಾಥ್​ ಅವರ ಬಳಿ ಕಾಲೇಜಿಗೆ ಡ್ರಾಪ್​ ಪಡೆದುಕೊಂಡು, ನಂತರ ತರಗತಿಗಳು ಇಲ್ಲ ಎನ್ನುವ ಕಾರಣ ಮನೆಗೆ ತೆರಳಲು ಬಸ್​ಗೆ ಕಾಯುತ್ತಿದ್ದ ವೇಳೆ ಶಶಾಂಕ್​ ದೊಡ್ಡಪ್ಪ ಎನ್ನಲಾದ ಮನು ಇತರೆ 6 ಮಂದಿ ಅಪಹರಣ ಮಾಡಿ, ನಂತರ ಕಣಿಮಿಕೆ ಬಳಿ ರ್ನಿಜನ ಪ್ರದೇಶದಲ್ಲಿ ಈತನ ಮೇಲೆ ಹಲ್ಲೆ ನಡೆಸಿ, ಪೆಟ್ರೋಲ್​ ಸುರಿದು ಬೆಂಕಿ ಹಚ್ಚಿ ಪರಾರಿಯಾಗಿದ್ದರು.

ನಂತರ ಹೊರಳಾಡಿ ಬೆಂಕಿ ನಂದಿಸಿಕೊಂಡಿದ್ದ ಶಶಾಂಕ್​, ತನ್ನ ಸ್ನೇಹಿತರಿಗೆ ಕರೆ ಮಾಡಿ ಪರಿಸ್ಥಿತಿಯನ್ನು ತಿಳಿಸಿದ್ದ. ನಂತರ ಈತನ ಸ್ನೇಹಿತರು ತಕ್ಷಣವೇ ಈತನ್ನು ಆಸ್ಪತ್ರೆಗೆ ದಾಖಲು ಮಾಡಿದ್ದಾರೆ. ಈ ಸಂಬಂಧ ಕುಂಬಳುಗೂಡು ಪೊಲೀಸ್​ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.