ಮೂರ್ತಿ ಟಿ.ಸಿ.ಎಸ್ ತಿಪಟೂರು
ಬಿಸಿಲ ತಾಪಕ್ಕೆ ಒಣಗುವಂತಾಗಿದ್ದ ರಾಗಿ ಪೈರಿಗೆ ಹಸ್ತ ಮಳೆಯಿಂದ ಜೀವಕಳೆ ಬಂದಿದ್ದು,
ರೈತರ ಮೊಗದಲ್ಲಿ ಮಂದಹಾಸ ತರಿಸಿದೆ.
ಹೌದು.. ಈ ಬಾರಿ ಮುಂಗಾರು ಮಳೆ ಉತ್ತಮವಾಗಿದ್ದ ಕಾರಣ, ತಾಲೂಕಿನ ಒಟ್ಟು 50,722 ಹೆಕ್ಟೇರ್ ಬಿತ್ತನೆ ಪ್ರದೇಶದಲ್ಲಿ ಪ್ರಸ್ತುತ 23 ಸಾವಿರ ಹೆಕ್ಟೇರ್ ಪ್ರದೇಶದಲ್ಲಿ ಮುಖ್ಯ ಆಹಾರ ಬೆಳೆಯಾಗಿ ರಾಗಿ ವಿಸ್ತರಣೆಗೊಂಡಿತ್ತು. ಆದರೆ, ಒಂದು ತಿಂಗಳಿಂದ ಮಳೆಗಿಂತ ಬಿಸಿಲಿನ ತಾಪಮಾನ ಹೆಚ್ಚಾದ ಕಾರಣ ರಾಗಿ ಬೆಳೆಗೆ ಬೆಂಕಿ ರೋಗ ಕಾಣಿಸಿಕೊಂಡು ರೈತರು ರಾಗಿ ಆಸೆಯನ್ನೇ ಬಿಟ್ಟಿದ್ದರು. ಕೃಷಿ ಇಲಾಖೆ ಕೂಡಾ ರಾಗಿ ಪೈರಿನಲ್ಲಿ ರೋಗ ಲಕ್ಷಣ ಗುರುತಿಸಿತ್ತು. ಆದರೆ, ಅದೃಷ್ಟವಶಾತ್ ಒಂದು ವಾರದಿಂದ ಸುರಿಯುತ್ತಿರುವ ಹಸ್ತ ಮಳೆಯಿಂದ ರಾಗಿ ಪೈರು ನಿರೀಕ್ಷೆಗೂ ಮೀರಿ ಸುಧಾರಿಸುತ್ತಿದೆ. ಅ.10ರವರೆಗೂ ಹಸ್ತ ಮಳೆಯ ಸುರಿಯಲಿದ್ದು, ಬಾಡುವಂತಾಗಿದ್ದ ಎಲ್ಲ ಬೆಳೆಗಳಲ್ಲೂ ಜೀವಕಳೆ ಮರುಕಳಿಸುತ್ತಿದೆ. ಆದರೆ, ಮುಂಗಾರಿನ ಪ್ರಾರಂಭದಲ್ಲಿ ಮಳೆ ನಂಬಿ ನಿಗದಿಗಿಂತ ಹೆಚ್ಚು ಯೂರಿಯಾ ಗೊಬ್ಬರ ಬಳಸಿರುವ ಜತೆಗೆ ರಾಗಿ ಬಿತ್ತನೆ ಮಾಡುವ ಬದಲು ತರಾತುರಿಯಲ್ಲಿ ಇಡಿ ಹೊಲದ ತುಂಬ ರಾಗಿಕಾಳು ಬೀರಿದ ಕಾರಣ ಪೈರಿನ ಮಧ್ಯೆ ವಿಪರೀತ ಕಳೆ ಬೆಳೆದಿದ್ದು, ಇದನ್ನು ತೆರವುಗೊಳಿಸಲು ರೈತರು ಹರಸಾಹಸ ಪಡುವಂತಾಗಿದೆ.
